Read Boros Dusun SILOKA 7 Bible Online

SILOKA 7 - Boros Dusun bible

SILOKA 7

¹Anaking, ingetkeun papatah Bapa. Piwuruk nu enggeus-enggeus ulah poho.

²Jalankeun sangkan jamuga. Lampahkeun sakumaha ceuk Bapa. Jaga eta teh sing ati-ati sakumaha kana siki panon.

³Mumule sapapanjangna, tulis dina ati.

⁴Anggap hikmah teh dulur awewe, pangarti jieun sobat dalit,

⁵anu baris ngajaring hidep sangkan teu kagoda ku pamajikan batur, ku awewe pangoloan.

⁶Hiji mangsa Bapa di imah ngalong tina jandela.

⁷Katenjo aya barudak ngora, can baroga luang. Aya saurang anu sologoto pisan,

⁸leumpang ngaliwat pengkolan palebah imah hiji awewe. Ari ka dinyana

⁹wanci sareupna.

¹⁰Awewe teh nyampeurkeun, meunang dangdan kumaha biasa awewe bangor, arek ngeret.

¹¹Nyampeurkeunana teu asa-asa, euweuh kaera, kawantu kembang jalan,

¹²geus tuman megat di pengkolan-pengkolan, di sisi jalan, di pasar.

¹³Budak ngora tea jol-jol ditangkeup jeung digalemoh, bari diteuteup beungeutna. Pok diolo, pokna,

¹⁴”Euceu teh wajib mere kurban kasalametan, ari poe ieu eta nadar teh geus kabayar.

¹⁵Sukur encep aya di dieu, memang keur diteangan.

¹⁶Ranjang geus beunang euceu ngamparan ku sepre kembang-kembang ti Mesir,

¹⁷malah meunang nyeungitan ku emur, candana jeung kayu manis.

¹⁸Yap geura urang ka rorompok, urang sosonoan masing wareg sawewengi, urang silih keukeupan.

¹⁹Keun bae akangna mah da keur teu aya, keur nyaba jauh.

²⁰Saurna mah bade dua minggu, da nyandak artos seueur pisan.”

²¹Kitu ngolona ka budak ngora teh, paromanna marahmay, atuh budak ngora teh teu bisa nampik.

²²Ngiclik budak ngora teh nuturkeun, lir sapi nu ditungtun rek dipeuncit, lir uncal nyampeurkeun burang.

²³Henteu engeuh yen awakna baris kapanggang ruruhit. Teu beda ti manuk anu sologoto asup kana jaring, henteu engeuh yen rek manggih bahya pati.

²⁴Ku sabab eta, barudak, darengekeun, perhatikeun ieu papatah Bapa.

²⁵Kade ulah nepi ka ngiclik eleh ku awewe kitu.

²⁶Geus loba lalaki anu ancur ku nu kitu nepi ka naremahan pati. Geus meh teu kaitung.

²⁷Datang ka imah awewe kitu teh sarua jeung asup ka tempat nu maraot, ibarat jalan torobosan nu brasna kana paeh.