Read Boros Dusun SILOKA 9 Bible Online

SILOKA 9 - Boros Dusun bible

SILOKA 9

¹Hikmah geus ngadegkeun imahna, tihangna tujuh.

²Keur kaperluan pesta, sasatoan geus dipangmeuncitkeun, kitu deui anggurna geus dicampur sarta idangan geus sayagi.

³Seug miwarang lanjang-lanjang, sina cumeluk kieu ti tempat nu pangluhurna di kota,

⁴”Nu barodo ka darieu!” Ari ka nu gejul, saurna teh,

⁵”Hiap dahar di imah kami. Inum anggurna beunang kami nyampuran.

⁶Lamun hayang jamuga, geura tinggalkeun lingkungan jalma-jalma barodo teh, taluturkeun jalan pangarti.”

⁷Jelema sombong dielingan teh kalah ka ngajebian, jelema jahat diingetan teh kalah ka ngambek.

⁸Nu sombong mah teu kudu dipepelingan, kalah ka matak dipikangewa. Teu cara ngageuing ka nu bijaksana, tangtu ditarimakeun.

⁹Keur nu bijaksana mah nasehat urang teh matak nambahan kabijaksanaanana. Naon bae anu diomongkeun ka jelema bener, tangtu matak nambahan kanyahona.

¹⁰Pikeun jadi bijaksana, kudu boga rasa hormat jeung sieun ku PANGERAN. Nyaho ka Nu Maha Suci, baris meunang ngarti.

¹¹Hikmah teh bakal mere umur panjang ka maneh.

¹²Mun maneh boga hikmah, nu untung nya maneh keneh. Sabalikna lamun maneh nolak hikmah, maneh keneh anu rugi.

¹³Kabodoan teh ibarat awewe anu cerewed, teu boga pikiran, teu boga kaera,

¹⁴ngalong di lawang, atawa diuk anjeucleu dina korsi, di tempat anu pangluhurna di kota,

¹⁵ngadon gera-gero, ka nu laliwat, anu keur malikiran urusanana sorangan.

¹⁶Ari pokna, ”Heuy nu teu boga pikiran, ka dieu!” Ari ka nu gejul pokna teh,

¹⁷”Cai beunang maling karasana leuwih amis. Kadaharan beunang maling karasana leuwih ngeunah.”

¹⁸Korban-korbanna teu nyarahoeun, yen anu nyimpang ka manehna tinemu jeung ajalna di dinya, anu geus arasup ka jero imahna ayeuna geus araya di dunyana nu paraeh.