Read Boros Dusun PANDITA 11 Bible Online

PANDITA 11 - Boros Dusun bible

PANDITA 11

¹Pilukeun duit maneh kana usaha batur sina golang, tan wande mere untung.

²Pelak modal di sababaraha tempat, malah mun bisa mah melak modal teh sing loba, geusan ngajaga dina bancang pakewuh, anu datangna moal kanyahoan.

³Tangkal rubuhna teh nurutkeun ka mana condongna. Mega mendung ari geus ngagarayot mah cur bae jadi hujan.

⁴Lamun arek pepelakan ngadadago heula angin jeung musim bae mah atuh rek iraha bisa cebna, panen-panen pimanaeun.

⁵Allah ngadamel sagala rupa, ku urang moal kaharti maksad-Na, cara urang hamo ngarti kumaha jabang bayi di jero kandungan bisa ngamimitian hirup.

⁶Arek pepelakan mah ceb, ceb bae rek isuk rek sore oge, da moal ngarti ieuh urang mah kumaha pijadieunana, naha baris alus kabeh, atawa nu mana nu bakal leuwih montok.

⁷Mutuh ku alus bisa ngararasakeun genahna beurang nu caang teh.

⁸Tarimakeun hirup urang teh sataun-sataunna. Tapi sing inget, najan sakumaha lilana waktu hirup di alam dunya, waktu di alam maot mah leuwih lila deui. Jadi taya gunana hayang nyaho ka mangsa engke.

⁹Barudak! Umur ngora teh rarasakeun niʼmatna. Sing galumbira meungpeung keur ngora. Tedunan sagala kahayang, ayunkeun kabeh karesep. Ngan kudu aringet, sagala kalakuan maraneh teh engke baris dipariksa ku Allah.

¹⁰Ulah ngukut kabingung, ulah miara kasusah, da moal ngora saumur-umur.