Read Boros Dusun KIDUNG AGUNG 7 Bible Online

KIDUNG AGUNG 7 - Boros Dusun bible

KIDUNG AGUNG 7

¹Duh ku agung, enung teh terah linuhung. Sampean mutuh ku sieup tur payus nganggo selop. Bitis lir jaksi sajantung, lir beunang masieup seniman.

²Udel lir cacangkir cekong moal bahe anggur nu jadi eusina. Lambut lir tumpukan gandum diriung ku kembang bakung.

³Pinareup siga uncal sakembaran, siga uncal bikang papasangan.

⁴Tenggek lir munara gading, soca lir empang di kota Hesbon deukeut gapura eta kota gede. Pangambung lir munara Libanon anu nanjeur neuteup ka Damsik.

⁵Mastaka dangah lir Gunung Karmel, rambut ririakan, cahayaan, lemes lir sutra, kaendahanana sanggup ngunduh jajantung raja.

⁶Ku manis enung, ku geulis! Sugri pangemat cinta, di enung nyampak sadia.

⁷Salira lampanyat lir tangkal korma, pinareup lir ranggeuyan buahna.

⁸Eta korma engke arek ditaekan arek diunduh buahna. Pinareup enung lir rantuyan buah anggur. Seungit napas enung, seger lir serengna jeruk.

⁹Baham enung saibarat cianggur petingan. Saupama kitu, eta anggur baris ngocor ka panutan baris nyegeran lambeyna baris maseuhan waosna.

¹⁰Da kuring anu anjeunna, nu teu kendat mikatineung.

¹¹Mangga panutan, urang iang ka padesan urang ngendong di tegalan,

¹²ngarah enjing-enjing pisan bisa ningalian pelak anggur, parantos marentik atawa tacan, kembangna parantos beukah atawa tacan. Kitu deui dalima, parantos pentilan atawa tacan. Tah di dinya, abdi sumeja ngalayanan kacinta engkang.

¹³Engke ku engkang kaangseu seungitna tangkal arak katut bubuahan nu raraos, parantos aya caket panto, nu anyar sareng nu parantos lami, kenging abdi nyimpen haturan engkang, jungjunan!