Read Boros Dusun YESAYA 17 Bible Online

YESAYA 17 - Boros Dusun bible

YESAYA 17

¹Timbalan PANGERAN, ”Damsik moal jadi kota deui, engke mah ngan jadi tumpukan ruruntuhan.

²Kota-kota di Asur bakal suwung sapapanjangna. Bakal jadi tempat domba jeung sapi nyaratuan moal aya anu ngabuburak.

³Nagara Israil moal boga benteng. Damsik leungit pananggeuhanana. Urang Asur anu nyesa bakal nandang hina, mo beda ti urang Israil. Kitu timbalan Kami, PANGERAN Nu Maha Kawasa.”

⁴PANGERAN ngandika, ”Poena bakal datang, kaagungan Israil bakal sirna, anu asalna beunghar bakal jadi miskin.

⁵Mun sawah mah Israil teh bakal kari jarami, geus dipibuatan, geus suwung cara lahan di Lebak Repaim sanggeus dipibuatan.

⁶Nu bakal harirup keneh teh ngan saeutik. Urang Israil bakal saperti hiji tangkal jetun anu geus diunduh buahna dijieun minyak, kari dua tilu siki di pucukna pisan, atawa sababaraha siki deui dina dahan anu rada handap. Kitu timbalan Kami PANGERAN, Allah Israil.”

⁷Lamun eta mangsa geus datang, jalma-jalma bakal baralik menta tulung ka anu ngadamelna, ka Allah Israil anu suci.

⁸Maranehna geus moal nolih deui kana altar-altar buatanana, moal ngandel deui kana titironan-titironanana anu dirupakeun arca Asera, moal nolih deui kana parukuyan paragi ngukusna.

⁹Lamun geus jejeg mangsana, kota-kota anu dibenteng reugreug teh bakal suwung, kari ruruntukna cara kota-kota urang Hiwi jeung urang Emor basa urang dinya kalabur ku urang Israil.

¹⁰Eh urang Israil, maraneh geus nyaho ka Allah anu nulungan, anu ngaraksa lir gunung batu anu weweg. Tapi maraneh kalah ka nyarieun taman-taman anu husus dipelakan tangkal-tangkal keur tempat nyembah ka dewa asing.

¹¹Tapi, sanajan upama eta pepelakan teh ari ceb ari jadi jeung karembangan, pamohalan hasilna kaala. Kalah ka matak susah jeung nyeri anu moal bisa kaubaran.

¹²Bangsa-bangsa nu karuat keur gujrud lir laut gumuruh ombakna tingjalegur,

¹³tuluy maraju lir ombak tingsuruwuk. Tapi ku Allah diseuseul, seug malundur, tuluy diubrak-abrik nepi ka paburisat kawas kekebul, kawas huut katiup ku angin.

¹⁴Basa peutingna eta teh nyieun gujrud, barang isuk bet geus euweuh deui. Kabeh ge bakal kitu nasibna anu ngaranjah ka tanah urang teh.