Read Boros Dusun YESAYA 3 Bible Online

YESAYA 3 - Boros Dusun bible

YESAYA 3

¹Gusti, PANGERAN Nu Maha Kawasa, ayeuna geus rek ngarampas sakur anu jadi harepan urang Yerusalem jeung urang Yuda. Mantenna geus meh ngarampas bahan dahareun, cai,

²para pahlawan, prajurit-prajurit, hakim-hakim, nabi-nabi, tukang-tukang ramal, ahli-ahli nagara,

³angkatan perang, para pamingpin sipil, ahli-ahli politik, jeung tukang-tukang jampe.

⁴Urang dinya sina diparentah ku barudak tanggung.

⁵Maranehna bakal silih incer kana piuntungeun. Barudak moal hormat ka saluhureun, kuricakan moal serabeun ku anu baroga pangkat.

⁶Bakal aya waktuna baraya maksa baraya, sangkan jadi kapala ngapalaan pada baraya, pokna, ”Urang keur kacida susahna. Tapi anjeun baju-baju bae mah boga, anu matak pek kapalaan baraya urang.”

⁷Tapi ceuk anu dititahna, ”Embung! Kuring bisa naon? Kuring oge teu beas, teu baju. Ulah kuring kapala mah!”

⁸Nya cilaka Yerusalem! Yuda nya kitu, keur sakarat. Sagala ucap jeung lampahna ngalawan ka PANGERAN. Ngagogoreng ka PANGERAN geus teu dipinding-pinding deui.

⁹Panerka-panerkana anu goreng natrat katara dina ulatna. Dosana geus teu disumput-sumput, geus cara dosa urang Sadumu. Tangtu bakal carilaka, karingkus ku dosana.

¹⁰Ngan anu balener anu pisenangeun teh. Eta mah dina sagala perkara babari, sagala pagaweanana mulus hasilna.

¹¹Cilaka nu goreng lampah, bakal karingkus ku kajahatanana.

¹²Umat kami pada neungteuinganan ku tukang ngarinjeumkeun duit, diperes ku anu ngaharutangkeun. Eh umat kami, maraneh teh dibawa sasar ku para pamingpin, nepi ka geus teu nyaraho jalan mana anu bener.

¹³PANGERAN geus sayagi muka perkara, seja mutus urusan umat-Na.

¹⁴Para kokolot jeung para kapala umat-Na dibawa ka pangadilan, tuluy ku Mantenna didakwa kieu, ”Maraneh ngarampogan kebon anggur. Imah maraneh pinuh ku barang-barang beunang nyokotan ti nu mariskin.

¹⁵Maraneh teu wenang meres ka umat Kami, teu meunang macikeuh kaom miskin. Kitu timbalan Kami, PANGERAN Nu Maha Kawasa.”

¹⁶PANGERAN ngadawuh, ”Awewe urang Yerusalem kacida garumedena. Leumpangna mani darangah, bari gular-giler maen mata. Ngalengkah diaced-aced semu ditenjrag-tenjragkeun ngarah geulang-geulang dina mumuncanganana tingkirincing.

¹⁷Ku Kami rek dihukum, rek digundulan sina lalenang.”

¹⁸Bakal aya waktuna, barang-barang kaagulan awewe urang Yerusalem ku PANGERAN dirampas: Perhiasan-perhiasanana, kayaning gengge suku, sasrangengean tarang, kongkorong,

¹⁹jeung geulang. Kitu deui cindungna,

²⁰tiungna, jeung jimat peletna anu sok diparake dina leungeunna jeung dina cangkengna,

²¹cingcin ramona, anting irungna,

²²pakean midangna, erokna, mantelna, rajut peperenianana,

²³pakean jerona, saputanganna, karembongna, jeung kukudungna anu tinggarebay.

²⁴Urut awak sarareungit jadi bau, urut diarangkin sutra jadi dibaleubeur ku lulub, urut buuk aralus jadi garundul, urut dangdan pipidangan jadi marake bubututan, urut gareulis jadi garoreng patut matak era.

²⁵Pangeusi eta kota, najan anu panggagahna kabeh bakal tiwas ku perang.

²⁶Panto-panto kota bakal tingharegung humarurung, kotana ge pijadieun lir awewe anu emok cameot dina taneuh awakna sataranjang.