Read Boros Dusun YESAYA 32 Bible Online

YESAYA 32 - Boros Dusun bible

YESAYA 32

¹Engke bakal aya hiji raja anu ngarajaanana satuhuna, jeung bakal aya pamingpin-pamingpin bangsa anu marentahna adil.

²Aranjeunna ibarat tempat nyalindung ari keur hujan jeung angin, ibarat kokocoran cai di tanah keri, ibarat batu gede di tengah tegal garing pikeun ngiuhan.

³Panon jeung ceulina maruka kana kasusah-kasusah rahayat.

⁴Marentahna lain ku sentak jeung haok. Asak sasar, ana nyarita dipikir heula.

⁵Anu burung ku aranjeunna moal disebut luhung, anu baragajul moal disebut jelema jujur.

⁶Anu burung, omonganana ngacapruk, eusi hatena ge goreng. Lampah jeung ucapna ngagogoreng ka PANGERAN, jeung cadu mere dahar ka nu lapar mere cai ka nu hanaang.

⁷Nu gejul, adat jeung lampahna goreng, karepna ngan ngarah jeung macikeuh ka nu eukeur kasangsara, megatan hak jalma malarat.

⁸Sabalikna nu berbudi mah lampahna satuhu, teguh dina perkara nu bener.

⁹Eh awewe-awewe anu keur garenah hirup, anu taya kasalempang, dengekeun ieu omongan.

¹⁰Maraneh ayeuna keur garenah, tapi taun hareup mah bakal rarumahuh. Sabab moal aya anggur alaeun.

¹¹Hirup maraneh ayeuna gampang, taya kahariwang. Engke malah bakal pinuh ku kasieun! Geura ganti pakean ku karung.

¹²Teunggeulan harigu, tembongkeun ulat susah. Sabab tanah lendo jeung kebon-kebon anggur geus lebur,

¹³sakuliahna geus pinuh ku rungkun cucuk jeung jukut cucuk. Geura ceungceurikan imah paranti maraneh senang-senang. Geura ceungceurikan kota tempat maraneh suka-suka.

¹⁴Karaton ge bakal sepi, ibu kota bakal jempling. Puri-puri jeung munara-munara anu ngawal maranehna bakal rata jeung taneuh, jadi tempat liar kalde alas, tempat nyaratuan domba.

¹⁵Tapi Allah bakal maparin deui sumanget ka urang. Tanah anu geus kalantar teh bakal lendo deui, lahan-lahan bakal pinuh deui ku pepelakan.

¹⁶Di sakuliah tanah, di mana-mana pinuh ku perkara anu bener jeung adil.

¹⁷Ku lantaran unggal jalma lampahna bener, tanah teh bakal aman santosa sapapanjangna.

¹⁸Umat Allah bakal bebas tina kasalempang, rumah tanggana bakal repeh-rapih reugreug pageuh. (

¹⁹Tapi leuweung-leuweung bakal katinggang ku hujan es, sarta kota bakal ruksak.)

²⁰Unggal jelema bakal ngarasa bagja, pepelakanana sugih ku cai, loba sampalan pikeun kalde jeung sapi, tur aman.