Read Boros Dusun YESAYA 52 Bible Online

YESAYA 52 - Boros Dusun bible

YESAYA 52

¹Eh Yerusalem, geura jagjag jaya deui! Eh kota Allah nu suci, geura disalin ku baju anu aralus! Lawang maneh moal kaasupan deui ku urang kapir.

²Geura kikirab, cengkat ti nu ngebul, geura diuk deui dina singgasana! Eh urang Sion nu dibaroyong, geura buka eta belenggu barogod teh!

³PANGERAN ngadawuh ka umat-Na, ”Basa maraneh jaradi badega batur, tanaga henteu dibayar. Jadi ngabebaskeunana oge henteu kudu ngaluarkeun duit.

⁴Basa maraneh ngaradon ngumbara di Mesir, ka daritu teh andon suka. Sabalikna waktu maraneh ka Asur mah dibawana kalawan paksa, boro-boro meunang bayaran.

⁵Ayeuna maraneh dikitukeun teh ku Babul, jadi tawanan tanpa bayaran. Anu karumawasa ka maraneh teh nya garumede nya suaban jeung ngagogoreng bae ka Kami.

⁶Tapi engke ku maraneh bakal katenjo yen anu diandikakeun ka maraneh teh bener, yen Kami teh Allah.”

⁷Resep temen engke nenjo nu datang meuntas gunung-gunung, mawa beja matak suka, hal pitengtremeun jeung hal kaunggulan! Eta utusan ngomong ka Sion, ”Allah maraneh jumeneng Raja!”

⁸Ger surak nu eukeur jaraga kota, awahing ku bungah! Sabab narenjo sorangan PANGERAN sumping ka Sion.

⁹Gederkeun surak, eh ruruntuhan Yerusalem! PANGERAN rek mulihkeun kota kagungana-Na, sarta ngalilipur umat-Na.

¹⁰PANGERAN rek metakeun pangawasa-Na nu suci, rek ngarahayukeun umat-Na, bakal katenjo ku saalam dunya.

¹¹Sing tumaninah kalaluar ti Babul, eh anu ngagarotong parabot Bait Allah! Ati-ati, bisi antel kana barang larangan, usahakeun supaya maraneh tetep beresih.

¹²Maraneh henteu kudu rurusuhan, ulah jiga nu rek kalabur. PANGERAN Allah maraneh nu bakal nungtun, ngaping ngajaring ti saban madhab.

¹³PANGERAN ngadawuh, ”Abdi Kami bakal hasil digawena, anjeunna bakal kacida dihormatna.

¹⁴Tadina loba jalma anu karageteun barang narenjo anjeunna, sabab awakna kacida ruksakna, geus meh teu jiga jelema.

¹⁵Tapi ayeuna! Bangsa-bangsa mani bengong ku anjeunna. Raja-raja nepi ka baralem ku helok-helokna, narenjo perkara anu tadina can kadenge-denge acan bejana.”