Read Boros Dusun IMAMAT 1 Bible Online

IMAMAT 1 - Boros Dusun bible

IMAMAT 1

¹Musa ku PANGERAN disaur ti jero Kemah Tepangan PANGERAN tuluy dipaparin aturan

²tina hal kurban pikeun urang Israil. Kieu: Lamun aya anu ngurbankeun sato, meunang sapi atawa domba atawa embe.

³Lamun anu rek dijieun kurban beuleuman teh sapi, kudu anu jalu sarta mulus. Jogokeun sapina hareupeun lawang Kemah Tepangan, sina kamanah ku PANGERAN.

⁴Tumpangkeun leungeun nu boga kurban kana sirah eta sapi, geus kitu kakara bakal katampi keur kurban pamupus dosa.

⁵Peuncit di dinya, getihna sanggakeun ka PANGERAN ku imam turunan Harun, kepret-kepret kana sakuriling altar anu aya di lawang Kemah.

⁶Kulitna sisit, awakna potongan.

⁷Imam kudu nyuluhan altar, sakalian ngahurungkeun suluhna.

⁸Sapi beunang motongan teh tumpangkeun luhureun seuneu katut sirah jeung gajihna.

⁹Jeroan jeung pingping tukang duanana ku nu boga kurban kudu dikumbah sing beresih, tuluy teundeun ku imam kana altar, hijikeun jeung baturna. Jadi kabeh kurbankeun. Ieu kurban kadaharan, anu bakal katampi ku PANGERAN nya eta seungitna.

¹⁰Lamun pikurbaneunana domba atawa embe, sarua keneh kudu jalu tur mulus.

¹¹Peuncit gigireun altar sisi kaler, kepret-kepret getihna ku imam kana sakuriling altar.

¹²Awakna potongan ku nu boga kurban, sagala babagian katut sirah jeung gajihna teundeun ku imam kana altar.

¹³Jeroan jeung pingping tukang duanana sina dikumbah ku nu boga kurban, kakara haturkeun ku imam ka PANGERAN, beuleum kabeh dina altar. Anu bakal katampi ku PANGERAN nya eta seungitna.

¹⁴Lamun manuk, kudu manuk japati atawa tikukur.

¹⁵Eta manuk ku imam kudu dibawa kana altar, beuheungna palitekkeun, sirahna beuleum dina altar. Urutan getihna sina ngeclak kana biwir altar.

¹⁶Telih jeung eusina piceun alungkeun kana tempat lebu wetaneun altar.

¹⁷Cekel puhu jangjangna, sowehkeun dadana sina beulah, tapi jangjangna ulah nepi ka semplak. Beuleum dina altar. Anu bakal katampi ku PANGERAN nya eta seungitna.