Read Boros Dusun IMAMAT 4 Bible Online

IMAMAT 4 - Boros Dusun bible

IMAMAT 4

¹Aya deui pangandika PANGERAN ka Musa.

²Musa kudu ngembarkeun ka urang Israil, yen lamun aya anu boga dosa lantaran ngalanggar cegahan PANGERAN teu kahaja, kudu nekanan ieu aturan.

³Upama anu boga dosa teh Imam Agung, anu geus tangtu mawa ka sakumna rayat, manehna kudu ngurbankeun sapi jalu ngora anu mulus ka PANGERAN, pikeun nebus dosana.

⁴Jogokeun sapina di hareupeun lawang Kemah Tepangan, tumpangkeun leungeun kana sirah eta sapi, peuncit sapina di dinya payuneun PANGERAN.

⁵Imam Agung kudu nyokot getihna saeutik bawa asup ka jero Kemah.

⁶Anclomkeun ramona kana eta getih, kepret-kepret getihna tujuh kali ka hareupeun lalangse suci.

⁷Sawareh deui oles-oles kana juru tatandukan pangukusan di eta Kemah. Getih sesana bahekeun kana dasar liang altar anu di lawang Kemah, pikeun kurban beuleuman.

⁸Sapi teh ala kabeh gajihna, gajih anu ngabulen eusi beuteung,

⁹giginjel duanana jeung gajihna, jeung babagian ati anu pangalusna.

¹⁰Gajihna beuleum ku imam dina altar, kurbankeun sakumaha halna gajih sato kurban-panarima.

¹¹Ari kulitna, kabeh dagingna, sirahna, sukuna, jeroanana, peujit jeung eusina,

¹²bawa ka luareun pasanggrahan ka tempat beberesih, nya eta tempat miceun lebu, beuleum di dinya make suluh.

¹³Upama anu dosana sakumna bangsa Israil, sarta jadi kasalahan anu ngalanggar cegahan PANGERAN ngan teu kahaja,

¹⁴ti barang eta dosa kanyahoan, jalma kabeh kudu nyokot sapi keur kurban pamupus dosa. Bawa sapina ku maranehna ka hareupeun Kemah Tepangan.

¹⁵Para kokolot kudu narumpangkeun leungeun kana sirah eta sapi, tuluy peuncit sapina di dinya.

¹⁶Getihna sawareh kudu dibawa ku Imam Agung ka jero Kemah Tepangan,

¹⁷celupkeun ramona kana eta getih, tuluy kepret-kepret ka hareupeun lalangse tujuh kali.

¹⁸Sawareh deui ku Imam Agung kudu dioles-oles kana juru tatandukan altar pangukusan di eta Kemah. Getih sesana bahekeun kana dasar liang altar anu di lawang Kemah, pikeun kurban beuleuman.

¹⁹Gajihna kabeh kudu dibeuleum dina altar.

²⁰Prakprakanana sakumaha halna ngurbankeun sapi jalu pikeun kurban pamupus dosa. Ku jalan kitu rahayat sakumna dipangurbankeun ku imam tangtu dosana dihampura.

²¹Awak sapina bawa ka luareun pasanggrahan tuluy beuleum sakumaha kurban pikeun nebus dosa imam. Kitu carana kurban pikeun nebus dosa sakumna rayat.

²²Upama anu boga dosa teh gegeden, teu kahaja ngalanggar salah sarupa cegahan PANGERAN,

²³ti barang ngarasa yen boga dosa, eta gegeden kudu buru-buru nyokot embe jalu anu mulus keur kurban.

²⁴Eta gegeden kudu numpangkeun leungeun kana sirah eta embe, tuluy embena peuncit gigireun altar beulah kaler, paranti meuncit kurban beuleuman. Eta teh kurban pamupus dosa.

²⁵Imam kudu nyelupkeun ramo kana getih eta embe, tuluy getihna oles-oles kana tatandukan altar. Getih sesana bahekeun kana dasar liang altar.

²⁶Kabeh gajihna ku imam kudu dibeuleum dina altar sakumaha gajih sato kurban panarima. Ku jalan kitu eta gegeden teh ku eta imam dipangnyieunkeun kurban pikeun nebus dosana, tangtu dihampura.

²⁷Upama anu boga dosana rayat biasa, teu kahaja ngalanggar salah sarupa cegahan PANGERAN,

²⁸ti barang dibejaan yen salah kudu ngahaturkeun embe bikang anu mulus.

²⁹Tumpangkeun leungeun kana huluna, peuncit gigireun altar sisi kaler paranti meuncit sato kurban beuleuman.

³⁰Imam kudu nyelupkeun ramo kana eta getih embe, oles-oles kana juru tatandukan altar. Getih sesana bahekeun kana dasar liang altar.

³¹Gajihna kabeh ala sakumaha sato anu dijieun kurban panarima, tuluy beuleum dina altar, seungitna bakal katampi ku PANGERAN. Ku jalan kitu eta jelema teh ku imam dipangnyieunkeun kurban dosa, tangtu dihampura.

³²Upama sato kurban pamupus dosa teh domba, kudu nu bikang jeung mulus.

³³Tumpangkeun leungeun kana sirah eta domba, peuncit dombana di gigireun altar beulah kaler paranti meuncit kurban beuleuman.

³⁴Imam kudu nyelupkeun ramona kana getih eta domba, tuluy oles-oles kana juru tatandukan altar. Getih sesana bahekeun kana dasar liang altar.

³⁵Gajihna ala kabeh sakumaha gajih domba keur kurban panarima, tuluy beuleum hijikeun jeung kurban kadaharan haturan PANGERAN. Ku jalan kitu eta jelema ku imam dipangnyieunkeun kurban dosa, tangtu dihampura.