Read Boros Dusun YERMIA 37 Bible Online

YERMIA 37 - Boros Dusun bible

YERMIA 37

¹Nebukadnesar, raja Babul, ngangkat Sidkia putra Yosia jadi raja Yuda, ngaganti Yoyakin putra Yoyakim.

²Tapi Sidkia henteu tumut kana timbalan PANGERAN anu diandikakeun ka kaula, kitu deui para pajabat jeung rahayatna.

³Dina hiji waktu aya piwarangan Raja Sidkia ka kaula, nya eta Yukal bin Selemya jeung Imam Sepanya bin Maaseya, mundut dipangnedakeun ka PANGERAN, pikeun kapentingan bangsa.

⁴Harita mah kaula can dipanjara, bebas keneh ka mana-mana di tengah jalma rea.

⁵Ari balad Babul anu keur ngepung Yerusalem harita mundur, sabab meunang beja yen balad Mesir geus budal, sarta geus meuntasan tapel wates Mesir.

⁶Ti dinya PANGERAN, Allah Israil nimbalan ka kaula

⁷pikeun Sidkia. Timbalana-Na, ”Balad Mesir anu geus satengah jalan arek ngabantu maneh, bakal baralik deui ka nagrina.

⁸Ari balad Babul bakal daratang narajang deui. Ibukota bakal karebut terus dihuru.

⁹Kami, PANGERAN mere nyaho. Maraneh ulah ngabobodo diri sorangan, boga pikir urang Babul moal narajang deui. Sabab tangtu eta teh narajang deui.

¹⁰Malah-malah najan upama balad Babul tea eleh ku maraneh, datang ka anu kari teh ngan tinggal anu raraheut parna tinggaloler sakemahna-sakemahna, eta anu raraheut parna teh tangtu tingkorejat deui, tuluy ngahuru ieu kota nepi ka rata jeung taneuh.”

¹¹Ku sabab balad Babul geus undur ti Yerusalem nyingkiran balad Mesir anu keur datang,

¹²kaula indit ti Yerusalem ka daerah Binyamin, arek nyokot warisan bagian kaula ti kulawarga.

¹³Barang nepi ka Gapura Binyamin, kaula ditahan ku kapala jaga di dinya, ngaranna Yeria bin Selemya, incuna Hananya. Carekna, ”Maneh rek belot ka urang Babul, hah!”

¹⁴Ceuk kaula, ”Paliyas teuing! Bapa lain rek ngejat ka ditu!” Tapi Yeria embungeun ngadenge, malah terus nyerek, tuluy kaula dibawa ka para pajabat.

¹⁵Para pajabat kacida arambekeunana, tuluy nitah supaya kaula disiksa, geus kitu kaula dikerem di imah jurutulis anu ngaran Yonatan, anu imahna geus dijadikeun panjara.

¹⁶Di dinya kaula diteundeun di kamar leutik di jero taneuh, kacida lilana.

¹⁷Dina hiji waktu diala ka karaton ku Raja Sidkia, dipariksa ririkipan, saurna, ”Kumaha, aya pangandika ti PANGERAN?” ”Aya,” jawab kaula, ”Sang Raja bakal diselehkeun ka raja Babul.”

¹⁸Kaula unjukan deui, ”Naon dosa abdi ka Sang Raja, atanapi ka para pajabat, atanapi ka rahayat, dugi ka dipanjara?

¹⁹Kumaha nasibna nabi-nabi Sang Raja, anu nyebatkeun raja Babul moal narajang ka Sang Raja sareng ka ieu nagri?

²⁰Gusti Sang Raja, abdi nyanggakeun panuhun, mugi kersa ngadangukeun sareng ngabulkeun. Abdi ulah diwangsulkeun deui ka jero panjara di rorompok Yonatan, margi tinangtos abdi teh maot di dinya.”

²¹Raja Sidkia nimbalan supaya kaula ditahan di buruan karaton bae. Di dinya saban poe sok dianteuran roti sasiki ti tukangna. Tapi lila-lila mah di kota teh geus teu aya deui dahareun.