Read Boros Dusun TANGIS YERMIA 3 Bible Online

TANGIS YERMIA 3 - Boros Dusun bible

TANGIS YERMIA 3

¹Kuring teh jalma nu geus ngarasa sangsarana dihukum ku Allah.

²Ku Mantenna terus disedek-sedek, beuki jero, ka nu poek,

³bari haben diteunggeulan, disiksa taya welasna.

⁴Saluar awak eumeur jeung barohak, tulang-tulang parotong.

⁵Ku Mantenna dikurung di jero panjara kaliwung jeung kalaraan,

⁶dipaksa cicing di nu poek mongkleng, poekna alam maot.

⁷Kuring dicangcang ku rante, jadi sakitan anu pamohalan bisa kabur.

⁸Jejeritan menta tulung ge ku Allah henteu didangu.

⁹Mun leumpang jajarigjeugan, kapeungpeuk sakurilingna ku tembok batu.

¹⁰Mantenna ngadago kawas biruang, tuluy ngarontok saperti singa.

¹¹Kuring diudag kaluar ti jalan, disasaak, tuluy ditinggalkeun.

¹²Mantenna mentang gondewa, jamparing-Na ditojokeun ka kuring,

¹³tuluy dilepas-lepaskeun narancleb jero kana awak.

¹⁴Sapoe jeput kuring pada nyeungseurikeun, ku jalma-jalma dijieun bahan luluconna.

¹⁵Sangsara nu pait peuheur, eta keur dahareun jeung inumeun kuring ti Mantenna.

¹⁶Beungeut kuring ku Mantenna diasah kana taneuh, huntu parunglak dibenturkeun kana batu.

¹⁷Kuring geus poho, kumaha rasana sehat, kumaha rasana tengtrem jeung bagja.

¹⁸Samar bisa hirup lila, harepan ka PANGERAN geus leungit.

¹⁹Ari ras kana kanyeri tur teu boga tempat cicing, karasana lir racun pait.

²⁰Hal ieu teu weleh jadi pikiran, jadi bangbaluh hate.

²¹Ngan hadena pangharepan timbul deui, lamun inget yen:

²²Asihing PANGERAN teh taya kandegna, welas-Na taya suda-Na,

²³tetep seger lir hawa isuk, tur pasti lir surya medal.

²⁴Kaboga kuring ngan PANGERAN, harepan ngan ka Mantenna.

²⁵PANGERAN teh murah asih ka nu ngandel ka Mantenna.

²⁶Hade lamun urang sabar, nunggu wancina urang dijait ku Mantenna.

²⁷Malah mun urang ti ngongora diajar sabar kitu, eta teh utama pisan.

²⁸Mun urang meunang kasusah, bawa diuk nyorangan bari sabar nyicingkeun diri,

²⁹tungkul sumerah, sabab bisa jadi harepaneun aya keneh.

³⁰Panyiksa, panghina, ulah weleh tarimakeun.

³¹Pangeran teh maha welas, moal salawasna ngantepna ka urang.

³²Mantenna sok maparin duka lara, tapi pasti jeung teguh asih-Na.

³³Najan maparin kasedih atawa kanyeri, saenyana Mantenna henteu iklaseun.

³⁴Pangeran uninga waktu hate urang ancur di jero panjara.

³⁵Mantenna uninga, waktu hak-hak urang paparin Mantenna dipungkir ku batur,

³⁶uningaeun waktu kaadilan diputer balik di pangadilan.

³⁷Ngan pangersa Pangeran bae nu pasti baris ngajadi.

³⁸Hade jeung jahat bisa jalan ngan ku karana parentah Mantenna.

³⁹Jadi lamun ku karana dosa sorangan urang dihukum ku Mantenna, ku naon make ngarasula?

⁴⁰Lenyepan lalampahan urang, tuluy balik deui ka PANGERAN.

⁴¹Bukakeun hate ka Allah di sawarga, sarta ngadoa,

⁴²”Abdi-abdi parantos dosa, ngalawan, sareng Gusti, nun PANGERAN, teu kersa ngahampura.

⁴³Gusti ngudag-ngudag, ngabinasa abdi sadaya, kawelas Gusti kasilep ku bendu.

⁴⁴Mega bebendu Gusti kacida kandelna, teu tiasa katembus ku paneda abdi sadaya.

⁴⁵Abdi sadaya ku Gusti didamel pangruntahan saalam dunya.

⁴⁶Dicarekan sareng dipoyok ku sadaya musuh.

⁴⁷Nyorang cilaka dugi ka runtuh lebur hirup diriung ku bahla sareng kasieun.

⁴⁸Cipanon bedah, caah sapertos walungan nyeungceurikan bangsa abdi nu parantos ruksak.

⁴⁹Kuring moal eureun-eureun ngocorkeun cipanon,

⁵⁰nepi ka PANGERAN neuteup ti sawarga sarta merhatikeun ka urang.

⁵¹Hate kuring ngangres nenjo anu tumiba ka para wanita di jero kota.

⁵²Kawas manuk, kuring ditaheunan ku musuh anu ngewaeun teu puguh-puguh.

⁵³Digebruskeun hirup-hirup kana sumur, liangna dipendet ku batu.

⁵⁴Cai geus mimiti ngalaput awak ceuk pikiran sakeudeung deui ge kuring paeh.

⁵⁵Ti dasar sumur abdi jumerit ka Gusti, nun PANGERAN.

⁵⁶Sareng waktos abdi nyuhunkeun supados panyambat abdi didangu, Gusti ngadangukeun,

⁵⁷sareng ngawaler yen abdi ulah sieun.

⁵⁸Teras Gusti sumping kangge ngajait abdi. Sareng nyalametkeun nyawa abdi.

⁵⁹Abdi nyuhunkeun dipaparin kaadilan, da Gusti uninga kajahatan batur ka abdi,

⁶⁰uninga kumaha geuleuheunana musuh, sareng kumaha sakaitna ngalawan ka abdi.

⁶¹Gusti ngadangu maranehna nyarekan ka abdi, nun PANGERAN, uninga kana pakarepan maranehna.

⁶²Sadinten jeput maranehna ngomongkeun abdi, sareng ngarang rarancangna.

⁶³Ti enjing dugi ka wengi maranehna guguyonan perkawis abdi.

⁶⁴Hukum kalakuanana kitu teh, nun PANGERAN.

⁶⁵Sapa maranehna sina pegat harepan!

⁶⁶Udag-udag, sapukeun sing leungit ti alam dunya.”