Read Boros Dusun YEHESKEL 13 Bible Online

YEHESKEL 13 - Boros Dusun bible

YEHESKEL 13

¹PANGERAN nimbalan ka kaula,

²”Eh anak manusa,” timbalana-Na, ”nabi-nabi Israil, anu sok nujum sakarep-karep, carekan ku maneh. Bejakeun, dengekeun kituh sabda PANGERAN.”

³Kieu timbalan PANGERAN Nu Maha Agung, ”Ieu nabi-nabi anu garejul teh tangtu carilaka! Maranehna ngarang-ngarang ilham, nyaritakeun pelengan ciptaanana sorangan.

⁴Eh urang Israil, eta nabi-nabi maraneh teh taya gunana naon-naon, kawas ajag di jero lembur kosong.

⁵Tempat-tempat anu kutana geus garorowong ku maranehna teu dijaga, teu diaromean. Jadi upama PANGERAN geus ngersakeun perang narajang Israil, moal kajaga.

⁶Eta nabi-nabi teh pelengan-pelenganana paralsu, ramalan-ramalanana barohong. Carekna mah maranehna teh ngucapkeun pesen Kami, padahal Kami henteu ngutus maranehna. Kilang kitu kahayangna mah ramalan-ramalanana teh bukti!

⁷Kieu kituh ceuk Kami: Pelengan maraneh paralsu, ramalan-ramalan maraneh bohong wungkul. Carek maraneh majar sabda Kami, padahal Kami henteu ngandikakeun naon-naon ka maraneh!”

⁸Ku sabab kitu PANGERAN Nu Maha Agung ngadawuh ka maranehna, ”Ucap-ucap maraneh palsu, pelengan-pelengan maraneh bohong wungkul. Ku sabab kitu maraneh ku Kami arek dilawan.

⁹Maraneh, tukang-tukang nujum purah ngarang pelengan palsu, purah nyieun ramalan-ramalan anu nyasabkeun, ku Kami arek dihukum. Ana umat Kami kumpul baradami, maraneh mah moal kabawa. Ngaran maraneh moal katulis dina daptar warga Israil. Jeung pamohalan maraneh bisa baralik deui ka lemah cai. Mun geus kitu kakara maraneh bakal nyaraho yen Kami teh PANGERAN Nu Maha Agung.

¹⁰Umat Kami disasabkeun ku nabi-nabina, dibobodo majar aman, padahal sama sakali teu aman! Umat Kami geus nyieun tembok anu pasangan batu batana laloncer, ari ku nabi-nabina tembok kitu teh anggur dikapur.

¹¹Bejakeun ka maranehna, eta tembok teh bakal runtuh! Ku Kami arek digeyer ku hujan, ditinggangan ku hujan es anu baradag, ditebak ku angin gede

¹²nepi ka rugrug, sarta maraneh bakal direntog ku jalma-jalma, naon gunana eta tembok dikapur teh?”

¹³Kieu timbalan PANGERAN Nu Maha Agung, ”Sajeroning Kami ambek, eta tembok ku Kami arek dibasmi, sina diteumbrag ku angin gede, digeyer ku hujan, ditinggangan ku hujan es anu baradag.

¹⁴Tembokan beunang ngapur nabi-nabi teh ku Kami rek dirugrugkeun, rek dibubukkeun, sina kari dasarna nonggerak. Runtuhna sina ninggang ka maraneh kabeh nepi ka paeh. Lamun geus kitu, kakara jelema-jelema bakal nyarahoeun yen Kami teh PANGERAN.

¹⁵Boh tembokna, boh nu ngapurna, bakal ngarasa hebatna amarah Kami. Maraneh engke ku Kami dibere nyaho, yen eta tembok geus euweuh, kitu deui jelema-jelema anu ngapurna,

¹⁶nya eta nabi-nabi anu nyebutkeun Yerusalem aman, padahal sama sakali teu aman!” Kitu timbalan PANGERAN Nu Maha Agung.

¹⁷PANGERAN nimbalan ka kaula, ”Ayeuna, eh anak manusa, tenget-tenget awewe-awewe bangsa maneh anu nyeta-nyeta nabiah. Weweleh,

¹⁸jeung tepikeun ieu sabda PANGERAN Nu Maha Agung ka maranehna: Maraneh awewe-awewe cilaka! Maraneh nyieunan gelang jimat nyieunan karembong jimat sina ditiungkeun ku jalma-jalma kana sirahna, ngarah bisa ngawasaan hirup jalma lian. Maraneh hayang bisa ngawasaan pati huripna umat Kami, keur kauntungan sorangan.

¹⁹Maraneh geus ngahina ka Kami di hareupeun umat Kami, ngarah hanjeli sakeupeul roti sawatara siki. Maraneh geus maehan jelema-jelema anu henteu pantes dipaehan. Ari jelema anu teu pantes dihirupan ku maraneh dihirupan. Ku jalan kitu maraneh ngabobodo umat Kami, ari umat Kami percaya bae.”

²⁰Ayeuna kieu sabda PANGERAN: ”Kami sebel nenjo geulang jimat maraneh pikeun ngawasaan pati hurip. Ku Kami rek didudut tina pigeulang maraneh, sarta jelema anu nyawana digenggem ku maneh ku Kami rek dibebaskeun.

²¹Karembong-karembong jimat maraneh ku Kami rek disosoeh, sarta umat Kami anu aya dina genggeman pangawasa maraneh rek dibebaskeun keur salalawasna. Engke maraneh bakal nyaraho yen Kami teh PANGERAN.

²²Bohong maraneh geus meunggaskeun pangharepan umat Kami, anu ku Kami dimuga-muga ulah meunang kasusahan naon-naon. Maraneh nyegah jalma-jalma jahat eureun tina kajahatanana, nyegah maranehna disalametkeun hirupna.

²³Ayeuna, pelengan-pelengan maraneh anu palsu jeung nyasabkeun teh ku Kami ditamatkeun semet ieu. Kami rek ngabebaskeun umat Kami tina genggeman maraneh, sangkan maraneh nyaho yen Kami teh PANGERAN.”