Read Boros Dusun DANIEL 10 Bible Online

DANIEL 10 - Boros Dusun bible

DANIEL 10

¹Dina taun katilu Kores jumeneng raja Persia, Daniel, anu katelah Beltesasar tea, diebrehan deui pangandika. Eta pangandika teh ngeunaan perkara nu pijadieun saenyana, tapi hese pisan dihartikeunana. Kaalamanana ku Daniel dina hiji titingalian.

²Harita teh kaula keur tirakat meunang tilu minggu.

³Teu dahar nu ngeunah-ngeunah, teu dahar daging, teu nginum anggur, teu nyisiran, nepi ka tutup tilu minggu.

⁴Dina tanggal dua puluh opat bulan kahiji taun eta, kaula keur nangtung di sisi hiji walungan gede, Walungan Tigris.

⁵Ana tanggah, nenjo aya jelema, panganggona kaen lenen jeung make beubeur emas murni.

⁶Salirana cahayaan kawas permata. Rarayna gumebyar kawas cahaya kilat, socana ngagebur siga seuneu. Panangan jeung sampeanana gugurilapan kawas tambaga meunang ngagosok, soarana ngaguruh kawas sora rebuan jelema.

⁷Eta tetenjoan katenjona ngan ku kaula. Jelema-jelema sejen mah anu harita babarengan, teu narenjoeun naon-naon. Tapi maranehna lalumpatan terus nyarumput, bangun kacida sarieuneunana.

⁸Kari kaula bae sorangan, ngawas-ngawas eta tetenjoan anu ajaib. Tanaga musna, beungeut sepa pias nepi ka moal aya nu wawuheun.

⁹Komo barang ngadenge gentrana, leng bae katuralengan, terus ngarumpuyuk nyuksruk kana taneuh.

¹⁰Tuluy aya leungeun nyekel ka kaula, ngajungjungkeun nepi ka leungeun jeung tuur kaula kaangkat; kaula angger ngadaregdeg.

¹¹Eta malaikat ngalahir, ”Daniel, Allah asiheun ka maneh. Hudang, kami rek nyarita, regepkeun sing bener. Kami teh dipiwarang nepungan maneh.” Sanggeus anjeunna sasauran kitu, kaula tuluy nangtung bari ngadaregdeg.

¹²Saurna deui, ”Tong sieun, Daniel! Paneda maneh, ti poe mimiti keneh oge, ti barang maneh ngarendahkeun diri lantaran hayang jadi bijaksana, ku Allah enggeus didangu. Kami datang ayeuna, ngajawab paneda maneh.

¹³Kami dilawan ku malaikat pangawal karajaan Persia, nepi ka dua puluh hiji poe. Tapi datang Mikail, salah sahiji pamingpin malaikat, ngabantuan kami, da tadina kami ngan sorangan di Persia teh.

¹⁴Ayeuna kami datang supaya maneh bisa ngarti kana hal anu bakal kasorang ku bangsa maneh ka hareup. Tetenjoan anu ayeuna teh anyar, nembongkeun pikahareupeun.”

¹⁵Sajeroning anjeunna ngalahir kitu, kaula mah ngeluk bae bari teu kecet-kecet.

¹⁶Eta malaikat, anu katembongna siga jelema, ngulurkeun pananganana nyabak biwir kaula. Tuluy kaula unjukan, ”Juragan, ku ieu titingalan abdi dugi ka ngadaregdeg laleuleus,

¹⁷teu benten ti hiji jalma beulian di payuneun dununganana. Kumaha tiasana nyanggem ka Juragan? Karaosna laleuleus sareng areungap.”

¹⁸Ceg Anjeunna nyepeng deui, seug karasa awak jadi kuat meueusan.

¹⁹Ari saurna, ”Allah teh ka maneh asiheun. Teu kudu rentag, teu kudu sieun.” Sanggeus anjeunna sasauran kitu, awak karasana beuki tambah kuat. Tuluy unjukan, ”Kasauran Juragan matak teger. Mangga bade nyaurkeun naon?”

²⁰Ari lahiranana, ”Nyaho naon cik sababna kami nepungan maneh? Arek nembongkeun ka maneh sakur anu geus ditulis dina Kitab Kayaktian. Ayeuna kami kudu balik deui, rek tarung jeung malaikat pangawal karajaan Persia. Sanggeus kitu baris datang malaikat pangawal nagri Yunani. Moal aya nu bakal nulungan kami, kajaba ti Mikail, malaikat pangawal Israil.