Read Boros Dusun HOSEA 1 Bible Online

HOSEA 1 - Boros Dusun bible

HOSEA 1

¹Ieu pangandika PANGERAN, anu ditimbalkeun ka Hosea putra Beri, waktu karajaan Yuda patuturut dirajaan ku raja-raja Usia, Yotam, Ahas jeung Hiskia, sarta karajaan Israil dirajaan ku Yarobam putra Yoas.

²Basa PANGERAN mimiti ngandika ka Israil nganggo perantaraan Hosea, kieu timbalana-Na ka Hosea, ”Maneh kudu kawin ka hiji awewe; engkena eta pamajikan maneh moal satia. Anak-anak maneh ge bakal cara tabeat indungna. Karana nya kitu kalakuan umat Kami teh, geus naringgalkeun Kami, teu saratia.”

³Tuluy Hosea nikah ka hiji wanita ngaran Gomer, anak Diblaim. Sanggeus anakna nu kahiji lahir, lalaki,

⁴Hosea ditimbalan ku PANGERAN, kieu timbalana-Na, ”Eta budak ngaranan Yisrel. Sabab sakeudeung deui Kami rek ngahukum raja Israil, geusan nebus pati Yisrel anu dipaehan ku Yehu, karuhun eta raja, di Yisrel. Turunan Yehu ku Kami rek dicabut hakna teu meunang ngarajaan deui.

⁵Angkatan perang raja Israil ku Kami rek ditumpes di Lebak Yisrel.”

⁶Gomer boga deui anak, nu kadua. Nu ayeuna mah awewe. Timbalan PANGERAN ka Hosea, ”Eta ngaranna Lo-Ruhama (hartina: ’Teu Dipikawelas’), sabab sakeudeung deui Kami moal mikawelas deui ka umat Kami Israil, sumawonna ngahampura.

⁷Tapi urang Yuda mah tetep dipikawelas, rek dirahayukeun ku Kami, PANGERAN, Allahna. Ngarahayukeunana lain ku jalan perang, lain ku pedang atawa gondewa katut jamparing, lain kuda jeung nu tarumpak kuda.”

⁸Sanggeus Lo-Ruhama disapih nyusu, Gomer ngandeg deui. Sanggeus ngajuru, anakna lalaki.

⁹Lahiran PANGERAN ka Hosea, ”Eta ngaranna Lo-Ami (hartina: Lain Umat Kami), geusan nandakeun yen Israil geus lain umat Kami deui. Kami lain Allahna.”

¹⁰Bangsa Israil bakal ngalobaan lir keusik lautan, moal kataker moal kaitung. Timbalan Allah ayeuna ka maranehna, ”Maraneh lain umat Kami,” tapi baris aya hiji mangsa PANGERAN bakal nimbalan kieu: ”Maraneh teh putra-putra Allah anu jumeneng!”

¹¹Bangsa Yuda jeung bangsa Israil baris dihijikeun deui. Maranehna bakal milih hiji pamingpin tunggal pikeun mingpin maranehna, sarta bakal ngajembaran tur hirupna baris mukti deui di nagrina. Satemenna, poean Yisrel baris jadi poe anu agung.