Read Boros Dusun AMOS 3 Bible Online

AMOS 3 - Boros Dusun bible

AMOS 3

¹Eh, urang Israil, darengekeun ieu pangandika ti PANGERAN perkara maraneh, sakumna bangsa anu ku Mantenna enggeus dijait ti Mesir. Kieu pangandika-Na,

²”Ti sakumna bangsa sajagat, ngan maraneh anu ku Kami diperhatikeun jeung diurus. Eta sababna dosa maraneh teh pohara, sarta eta sababna dosa maraneh ku Kami bakal dihukum.”

³Naha bisa dua jalma indit babarengan lamun teu badami heula?

⁴Ari singa di leuweung naha osok ngagaur lamun tacan manggih mangsa? Ari singa ngora naha osok ngagerem dina guhana lamun tacan beubeunangan?

⁵Ari manuk naha beunang kaleugeut lamun henteu dibibitaan heula ku eupan? Ari senteg naha sok ngajeplak lamun taya nu narajang?

⁶Lamun tarompet perang geus disadakeun, naha lain matak ngadegdeg pangeusi kota? Naha balahi bisa tumiba ka hiji kota lamun lain kersaning PANGERAN?

⁷PANGERAN Nu Maha Agung moal waka midamel naon-naon samemeh ngawahyukeun heula rarancang Mantenna ka para abdi-Na, nya eta nabi-nabi.

⁸Lamun singa ngagaur saha anu teu ngarasa gimir? Lamun PANGERAN Nu Maha Agung geus ngandika, saha anu bisa nyegah sangkan ulah aya anu ngembarkeun?

⁹Umumkeun ka nu caricing di karaton Mesir jeung karaton Asdod, kieu: ”Geura kumpul di pasir-pasir nu ngalingkung Samaria. Tenjo kumaha poharana kakusutan jeung kajahatan di dinya.”

¹⁰Dawuhan PANGERAN, ”Eta jalma-jalma ngareusian gedong-gedongna anu galede ku barang-barang hasil kajahatan jeung katelengesan. Maranehna malah nepi ka teu nyarahoeun sangkan jujur teh kudu kumaha.

¹¹Ku sabab kitu nagrina bakal dikepung ku musuh, pertahananana bakal tumpur, gedong-gedongna ahu galede bakal dirayah.”

¹²Dawuhan PANGERAN, ”Saperti domba anu dihakan singa, anu beunang deui ku nu ngangonna ngan sukuna sapasang atawa ngan ceulina sabeulah, urang Samaria oge, anu ayeuna keur senang-senang ngaredeng dina katil nu aralus, engke ngan kari saeutik.

¹³Ayeuna darengekeun, sarta turunan Yakub bere nyaho,” timbalan PANGERAN Nu Maha Agung jeung Maha Kawasa.

¹⁴”Dina poean Kami ngahukum urang Israil, altar-altar di Betel ku Kami baris digempur, tungtung-tungtung juruna rek dipotong-potongkeun sina ragragan kana taneuh.

¹⁵Imah-imahna paragi musim tiis jeung musim panas rek diancur-ancurkeun. Imah-imah anu dihias ku gading rek diburak-barik. Imah-imah galede kabeh rek digempur.”