Read Boros Dusun BILANGAN 13 Bible Online

BILANGAN 13 - Boros Dusun bible

BILANGAN 13

¹PANGERAN ngandika ka Musa,

²”Maneh kudu milih salah saurang pamingpin ti saban kaom anu dua welas, tuluy utus sina ngintip ka tanah Kanaan anu ku Kami rek dibikeun ka urang Israil tea.”

³Ku Musa dilampahkeun, sarta anjeunna ti tanah gurun Paran ngirimkeun para pamingpin tea, nya eta: [Ti kaom] — [Nu dikirim] Rubin — Samua bin Sakur Simeon — Sapat bin Hori Yuda — Kaleb bin Yepune Isaskar — Igal bin Yusup Epraim — Hosea bin Nun Binyamin — Palti bin Rapu Sebulun — Gadiel bin Sodi Menase — Gadi bin Susi Dan — Amiel bin Gemali Aser — Setur bin Mikael Naptali — Nahbi bin Wapsi Gad — Guel bin Maki

¹⁶Sakitu jelema-jelema anu ku Musa diutus kudu ngintip tanah Kanaan teh. Aya anu diganti ngaranna ku Musa, Hosea bin Nun jadi Yosua.

¹⁷Memeh bral ku Musa dipaparin amanat heula, saurna, ”Ti dieu kudu ngaler nepi ka tanah Kanaan beulah kidul, tuluy arunggah ka pagunungan.

¹⁸Arintip ti dinya kumaha kaayaanana eta tanah, sabaraha cacah jiwana, sakumaha kakuatanana.

¹⁹Naha eta tanah teh alus atawa goreng, jelemana caricing di desa-desa anu bolongor atawa di kota-kota anu dikuta.

²⁰Pariksa taneuhna lendo henteuna, loba henteuna tatangkalanana. Jeung balikna omat kudu mawa conto bubuahanana.” Harita memang keur musimna buah anggur mimiti arasak.

²¹Bral utusan arindit maju ngaler. Tuluy ngintip eta tanah, ti kidulna mimiti ti tanah gurun Sin terus ngaler mapay jalan nepi ka Rehob, hiji tempat anu geus deukeut ka Hamat.

²²Ti dinya terus ka Hebron, wewengkon eta tanah beulah ti kidul, pamatuhan urang Ahiman, urang Sesai jeung urang Talmai; ieu tilu suku bangsa teh turunan bangsa Enak, hiji bangsa anu awakna jarangkung gede. (Hebron mimiti kabukana teh tujuh taun samemeh Soan, hiji tempat di tanah Mesir.)

²³Sanggeus nepi ka Lebak Eskol, maranehna ngala buah anggur saranggeuy. Ranggeuyanana kacida beuratna nepi ka digotong ku duaan. Ngala buah dalima deuih jeung buah kondang bawaeun mulang. (

²⁴Eta tempat anu matak dingaranan Lebak Eskol teh lantaran perkara eta buah anggur saranggeuy anu diala ku urang Israil tea.)

²⁵Sanggeus beres ngintipna nepi ka opat puluh poe, mata-mata teh marulang ka bangsana,

²⁶ka Musa, Harun, jeung bangsa Israil di tanah gurun Paran wewengkon tanah Kades. Sagala papanggihanana ditepikeun bari nembongkeun bubuahan babawaanana.

²⁷Kieu pupulihna ka Musa, ”Eta tanah parantos disidikkeun. Kaayaanana beunghar sareng subur. Ieu ngabantun bubuahanana saeutik.

²⁸Mung jalmi-jalmina kacida baredasna, kota-kotana nya arageung nya wareweg, dikuta kuat sakurilingna. Kajabi ti kitu di ditu teh aya suku bangsa anu jarangkung gede.

²⁹Palih kidul dicicingan ku urang Amalek. Pagununganana dicicingan ku urang Het, urang Yebus, sareng urang Emor. Tempat-tempat sapanjang basisir Laut Tengah sareng sapanjang Walungan Yordan dicicingan ku urang Kanaan.”

³⁰Ti dinya Kaleb ngarepehkeun jelema-jelema anu mimiti ngageder nembongkeun kateupanujuna ka Musa. Kieu ceuk Kaleb, ”Urang rurug eta tanah teh, urang rebut. Tangtu beunang ku urang.”

³¹Tapi ceuk nu sejen-sejenna anu arindit jeung Kaleb, ngaromongna teh kieu: ”Urang moal kuat ngarurug ka ditu. Urang ditu teh baredasna leuwih ti urang.”

³²Saterusna maranehna nyebarkeun carita palsu ka urang Israil perkara hasil lolongokna ka eta tanah, majar: ”Hasil eta tanah teh keur pribumina ge teu matak mahi. Jalma-jalmana jararangkung pisan,

³³malah di ditu teh loba raksasa turunan bangsa Enak. Dibanding jeung itu, urang mah mani asa sagede simeut. Moal teu kitu itu ge nganggapna ka urang.”