Read Boros Dusun BILANGAN 22 Bible Online

BILANGAN 22 - Boros Dusun bible

BILANGAN 22

¹Urang Israil maju deui, terus masanggrahan di hiji tegalan di Moab, peuntaseun Walungan Yordan beulah wetan nyanghareup ka Yeriho.

²Barang Balak bin Sipor raja Moab ngareungeu beja hal wewesen urang Israil ka urang Emor, jeung barang meunang beja sakumaha lobana urang Israil,

³Balak jeung rahayatna jadi sieuneun.

⁴Ti dinya urang Moab teh ngomong ka para pamingpin urang Midian, pokna, ”Eta gorombolan teh sakeudeung deui ge datang ngaruksak ka sakurilingeun urang cara banteng nyatuan di sampalan.” Geus kitu Balak

⁵nitah ngahaturanan Balhum bin Beor anu calik di Petor deukeut Walungan Eprat di tanah Amaw. Kieu amanat Balak, ”Hatur uninga, aya hiji bangsa datang ti Mesir, mani nakleuk pinuh di mana-mana ngancam rek ngajabel tanah kaula.

⁶Bilanganana langkung seueur ti batan bilangan kaula. Ku margi kitu saderek mugi kersa linggih ka kaula, pangnyapakeun eta bangsa supados kaula tiasa ngelehkeun atanapi ngabuburak. Kaula terang, mana-mana anu diberkahan ku saderek tangtos jamuga, anu disapa ku saderek tangtos cilaka.”

⁷Utusan Moab jeung para kapala urang Midian arindit nepungan Balhum, mawa duit pikeun upah nyapa, tuluy ngunjukkeun amanat Balak.

⁸Saur Balhum, ”Marondok heula di dieu sawengi, isukan aya wartos kumaha timbalan PANGERAN ka kaula.” Utusan Moab peuting eta marondok di Balhum.

⁹Allah sumping ka Balhum, mariksa, ”Saha eta jelema-jelema anu marondok teh?”

¹⁰Wangsul Balhum, ”Sumuhun utusan Raja Balak ti Moab, ngawartosan

¹¹yen aya hiji bangsa jebulna ti Mesir minuhan sakuliah tanahna. Sanggemna ku abdi kedah disapa supados tiasa dielehkeun atanapi diusir ti tanahna.”

¹²Dawuhan Allah, ”Ulah milu, jeung ulah daek nyapa ka urang Israil, sabab eta umat diberkahan ku Kami.”

¹³Isukna Balhum mendakan utusan Balak sarta saurna, ”Geura marulang. Kaula moal ka ditu, henteu widi ku PANGERAN.”

¹⁴Para utusan marulang, pupulih ka Balak yen Balhum teu kersaeun.

¹⁵Balak ngirim deui utusan leuwih loba tur jelema-jelemana leuwih parenting ti batan nu ti heula.

¹⁶Sadaratangna ka Balhum pok ngunjukkeun amanat Balak, ”Mugi saderek teu ngaraos kaabotan sumping ka kaula.

¹⁷Tangtos ku kaula dipulang tarima sapantesna, sareng naon bae sapamundut tangtos ditedunan. Ulah teu sumping, pangnyapakeun eta bangsa.”

¹⁸Waler Balhum, ”Masing Balak dugi ka maparin emas perak nu aya di karatonna, kaula teu werat ngalanggar dawuhan PANGERAN Allah kaula, teu wantun saeutik-eutik acan.

¹⁹Parandene, sae karulem heula sawengi di dieu sapertos nu ti payun, manawi kaula kenging deui pituduh ti PANGERAN.”

²⁰Peutingna Allah sumping deui ka Balhum, ngandika, ”Ari dikeukeuhan mah jig bae milu, tapi pilampaheun maneh kudu kumaha timbalan Kami.”

²¹Isukna Balhum nyelaan kalde, bral angkat jeung para utusan Moab.

²²Allah bendu ka Balhum dumeh Balhum ngiring ka nu ngangkir. Balhum jongjon dina tonggong kalde diiring ku dua gandek, teu uningaeun di hareup dipegatan ku malaikat PANGERAN anu ngadeg di tengah jalan.

²³Kaldena nenjoeun di hareup aya malaikat anu ngabar pedang, tuluy nyimpang mapay tegalan. Ku Balhum digitik sina ka jalan deui.

²⁴Malaikat megatan deui di lebah anu gupit, anu kahapit ku dua pager tembok kebon anggur.

²⁵Katenjoeun deui ku eta kalde, seug kalde teh meped kana pager tembok nepi ka sampean Balhum ngagasruk ka dinya. Ku Balhum digitik deui.

²⁶Sakali deui malaikat teh megatan, ngadegna di nu kacida gupitna, kenca katuhu taya lolongkrang deui.

²⁷Kalde nenjoeun, seug kalde teh ayeuna mah ngagolerkeun maneh. Balhum seep kasabaranana, jebrod deui kalde teh digitik ku teteken.

²⁸Kersaning PANGERAN, ngong bae kalde teh bisa ngomong ka Balhum, kieu, ”Na lepat naon kuring teh? Juragan dugi ka tilu kali ieu ngagitik, naon margina?”

²⁹Waler Balhum, ”Salah sia ngajengkelkeun ka aing! Cacak lamun aing nyekel pedang boa sia dipodaran!”

³⁰Kalde ngajawab, ”Sanes kuring teh kalde Juragan ti kapungkur, anu salamina dianggo ku Juragan? Na biasana kuring kieu peta ka Juragan teh?” ”Henteu!” walerna.

³¹Ti dinya Balhum ku PANGERAN dikersakeun iasa ningali ka eta malaikat anu keur ngabarkeun pedang. Bruk Balhum sujud kana taneuh.

³²Malaikat mariksa, ”Salah naon eta kalde digitikan nepi ka tilu kali ieu? Kami ngahaja megatan jalan sangkan maneh ulah laju.

³³Untung eta kalde nenjoeun ka kami nepi ka tilu kali nyisi. Cacak lamun henteu, maneh ku kami dipaehan, kalde mah moal.”

³⁴Balhum ngawangsul, ”Sadaya-daya rumaos dosa, sareng teu terang aya anu ngadeg megatan. Nanging bilih dimanah awon saupami teras ka ditu, sim abdi sumeja wangsul deui bae.”

³⁵Tapi waler eta malaikat, ”Jig bae rek diteruskeun mah. Tapi piomongeun maneh kudu kumaha timbalan kami.” Balhum ngalajengkeun lampah bareng jeung jelema-jelema anu ngangkir.

³⁶Barang Balak meunang beja yen Balhum geus aya di jalan tuluy mapagkeun ka kota Ar di wewengkon Walungan Arnon, wates tanah Moab.

³⁷Saur Balak ka Balhum, ”Ku naon kamari ieu teu sumping waktos diangkir ti payun? Bilih teu diutamikeun panginten, bilih kaula kirang panarima?”

³⁸Waler Balhum, ”Kapan ieu dongkap, geuning! Nanging bade tiasa naon ari kaula? Mung tiasa ngucapkeun naon-naon anu diandikakeun ku Allah bae.”

³⁹Balhum ku Balak dicandak ka kota Hasot.

⁴⁰Di dinya Balak meuncit sapi jeung domba dipake mupundutan ka Balhum jeung ka para kapala anu ngangkir anjeunna.

⁴¹Poe isukna Balhum ku Balak disampeur, tuluy dicandak ka Pasir Baal. Ti lebah dinya katingalieun ku Balhum sabagian urang Israil keur neba.