Read Boros Dusun JAKARIA 13 Bible Online

JAKARIA 13 - Boros Dusun bible

JAKARIA 13

¹”Lamun geus cunduk waktuna,” timbalan PANGERAN Nu Maha Kawasa, ”bakal aya cinyusu ngaburial, anu bakal nyucikeun turunan Daud jeung urang Yerusalem tina dosa-dosana, jeung tina nyembahna ka brahala.

²Harita, ngaran brahala-brahala teh ku Kami bakal dipupus ti jero nagri, moal aya nu nginget-nginget deui. Sing saha anu ngaku-ngaku nabi bakal diusir, sarta Kami bakal ngaleungitkeun kahayang jalma kana ngabakti ka brahala.

³Upama aya anu keukeuh ngawejang, indung bapana sorangan bakal ngomong ka manehna, nyebutkeun yen manehna kudu dipaehan, lantaran anu majar ngucapkeun sabda PANGERAN teh saenyana mah bohong. Lamun keukeuh sok ngawejang keneh, ku indung bapana bakal ditubles nepi ka paeh.

⁴Mun eta waktu geus cunduk, moal aya nabi anu agul-agul majar meunang tetenjoan, moal aya anu nyeta-nyeta nabi atawa make pakean nabi pikeun nipu jalma-jalma.

⁵Malah carekna teh, ʼKuring lain nabi. Kuring mah tukang tani, saumur-umur digawe teh di kebon.ʼ

⁶Upama aya nu nanya, ʼAri eta tatu-tatu dina dada ku naon?ʼ bakal ngajawab, ʼIeu mah raheut waktu keur di imah babaturan.ʼ ”

⁷Kieu timbalan PANGERAN, ”He, pedang, geura tandang. Tarajang itu pangangon anu digawe pikeun Kami! Paehan, dombana pabalencarkeun. Kami arek narajang ka umat Kami sorangan!

⁸Dua per tilu pangeusi nagri bakal paraeh.

⁹Anu sapertilu deui anu harirup keneh, ku Kami baris diuji, sarta rek diberesihan saperti perak dibesot ku seuneu. Arek diuji cara nguji emas. Geus kitu maranehna bakal sasambat ka Kami, tangtu ku Kami oge didangu. Rek diomongkeun ka maranehna yen maranehna teh umat Kami, sarta maranehna ge bakal ngaraku yen Kami teh Allah maranehna.”