Read Boros Dusun JAKARIA 2 Bible Online

JAKARIA 2 - Boros Dusun bible

JAKARIA 2

¹Aya deui titingalan kaula, nya eta hiji lalaki nu mawa tali ukuran.

²Ku kaula ditanya, ”Rek ka mana?” Jawabna, ”Arek ngukur Yerusalem, hayang nyaho panjangna jeung rubakna.”

³Malaikat anu tadi cacarios ka sim kuring tea nyampeurkeun, tuluy aya nu mapag, malaikat hiji deui.

⁴Anjeunna sasauran ka dinya, saurna, ”Geuwat udag itu budak ngora nu mawa tali ukuran. Bejakeun yen pangeusi Yerusalem, jelema jeung ingon-ingonna bakal kacida lobana, nepi ka moal bisa lamun dikutaan sakurilingna, lantaran gede teuing.

⁵PANGERAN ku manten anu bakal jadi kutana teh, Mantenna geus jangji baris jadi kuta seuneu anu ngaraksa ka dinya, sarta Mantenna baris nanjeurkeun kamulyaana-Na di dinya.”

⁶PANGERAN ngandika ka umat-Na, ”Maraneh ku Kami geus dipabalencarkeun ka saban madhab. Ayeuna, maraneh para buangan kudu kalabur ti Babul, marulang ka Yerusalem.

⁸Sing saha anu narajang ka maraneh, narajang buah hate Kami.” Ku hal eta, PANGERAN Nu Maha Kawasa miwarang kaula ngemban ieu sabda pikeun bangsa-bangsa anu geus ngarampogan umat-Na:

⁹”PANGERAN ku manten nu bakal ngalawan maraneh, sarta maraneh bakal dirampog ku jalma-jalma urut badega-badega maraneh. Lamun hal eta geus kajadian, maraneh kakara bakal nyaraho yen PANGERAN Nu Maha Kawasa geus ngutus kami.”

¹⁰PANGERAN ngandika, ”Urang Yerusalem geura ngarawih, sing gumbira, Kami tereh datang, rek reureujeungan jeung maraneh!”

¹¹Dina mangsa eta, loba bangsa-bangsa nu daratang ka PANGERAN jaradi umat-Na. Mantenna bakal sasarengan jeung aranjeun, sarta aranjeun bakal nyaraho yen anu ngutus kaula ka aranjeun teh PANGERAN.

¹²Sakali deui Yuda baris jadi milik utama kagungan PANGERAN di tanah-Na nu suci, sarta Yerusalem bakal jadi kota anu pang dipikanyaahna ku Mantenna.

¹³Sing repeh kabeh di payuneun PANGERAN, karana Mantenna tereh sumping ti panglinggihana-Na anu suci.