Read Boros Dusun JAKARIA 5 Bible Online

JAKARIA 5 - Boros Dusun bible

JAKARIA 5

¹Aya deui anu katingal ku kaula, nya eta kitab gulung keur ngalayang di awang-awang.

²Malaikat tea mariksakeun, saurna nenjo naon. Walon kaula, ”Ningal kitab gulung ngalayang di awang-awang, panjangna salapan meter, rubakna opat meter satengah.”

³Lahiranana ka sim kuring, ”Eta eusina panyapa, anu bakal sumebar ka sakuliah nagri. Nu sabeulah, unina nyebutkeun, unggal bangsat bakal disingkirkeun ti jero nagri; nu sabeulah deui nyebutkeun, sakur anu ngucapkeun sumpah palsu bakal digusur.

⁴PANGERAN Nu Maha Kawasa bakal nyebarkeun eta panyapa ka unggal imah bangsat jeung ka unggal imah jelema anu sok sumpah palsu, sarta eta panyapa teh baris terus aya di imah eta jelema-jelema, nepi ka imah-imahna rarubuh.”

⁵Malaikat tea tembong deui sarta ngalahir, ”Tenjo, aya deui anu datang!”

⁶”Naon eta?” kaula nanya. Walerna, ”Karanjang. Eta teh ngalambangkeun dosa di eta nagri sakuliahna.”

⁷Eta karanjang make tutup tina timah. Sabot ku sim kuring ditelek-telek, tutupna cengkat, bray muka. Breh di jerona aya awewe keur diuk!

⁸Pilahir malaikat, ”Eta awewe teh ngalambangkeun kajahatan.” Seug eta awewe teh ku anjeunna didedetkeun deui ka jero karanjang tea, karanjangna ditutupkeun deui.

⁹Barang sim kuring tanggah, breh ningal aya dua awewe keur hiber muru ka lebah sim kuring, jangjangna siga jangjang bango, kacida kekerna. Gapruk nyamber karanjang tea, terus dibawa ngapung.

¹⁰Sim kuring naroskeun ka malaikat, ”Bade dibantun ka mana eta teh?”

¹¹Waleranana, ”Ka nagri Babul. Ku urang ditu ayeuna keur dipangnyieunkeun candi. Upama candina geus anggeus, eta karanjang baris ditempatkeun di dinya, diparuja.”