Read Boros Dusun MATEUS 22 Bible Online

MATEUS 22 - Boros Dusun bible

MATEUS 22

¹Yesus nyarioskeun deui misil ka jalma rea.

²”Karajaan Sawarga teh saperti ieu misil. Aya hiji raja rek nikahkeun putra pamegetna.

³Miwarangan badega-badegana nyusulan ondangan sina geura daratang kana hajatna. Tapi nu disusulan arembungeun datang.

⁴Raja miwarangan badega-badega sejenna, nepikeun amanat ka para ondangan, ʼHajat geus tarapti, geus mencitan sapi jeung anak sapi nu pangalusna, geus sadia sagala rupa. Mangga sarumping nungkulan hajat nikah.ʼ

⁵Tapi nu diarondang teh arapi lain bae, tinglaleos ka pagaweanana, aya nu ka kebon, nu ka toko.

⁶Malah aya nu terus ngarejeng ka badega-badega teh, terus ditareunggeulan, diparaehan.

⁷Raja kacida benduna, tuluy ngirim balad numpes jelema-jelema nu maraehan, padumukanana dihuru.

⁸Tuluy nimbalan ka badega-badega, ʼIeu hajat geus sakieu sadiana, tapi nu diarondang teh ayeuna mah geus teu layak ka darieu.

⁹Ku sabab eta pegat ka jalan-jalan gede, nu laliwat saha bae ajak ka dieu, sing loba.ʼ

¹⁰Badega-badega arindit, sakur nu liwat, nu bageur nu jahat kabeh diajak kana pesta, balandongan hajat pinuh.

¹¹Raja lebet ka balandongan ningalian. Ret katingalieun aya semah saurang anu henteu make pakean pesta,

¹²tuluy dipariksa, ʼKi Sanak, ku naon henteu make pakean pesta?ʼ Jelemana ngabetem bae.

¹³Raja nimbalan ka abdi-abdina, ʼBarogod ieu jelema leungeunna jeung sukuna, alungkeun ka nu poek, sina ceurik nandangan sangsara.ʼ ”

¹⁴Saur Yesus deui, ”Anu disaur mah loba, tapi anu kapilih ngan saeutik.”

¹⁵Urang Parisi ngalaleos, tuluy badami rek ngajiret Yesus ku pertanyaan-pertanyaan.

¹⁶Ti dinya nitah murid-muridna nemonan Yesus dibarengan ku jelema-jelema golongan Herodes. ”Pa Guru,” ceuk maranehna, ”abdi terang Bapa jalmi jujur. Bapa ngawurukkeun pangersa Allah ka manusa kalayan satarabasna, henteu inggis ku pamanggih nu sanes, margi Bapa mah henteu pandang harkat.

¹⁷Ku margi kitu, kumaha pamendak Bapa perkawis mayar pajeg ka Prabu Rum, ngarempak Hukum Agama urang atanapi henteu?”

¹⁸Yesus, anu uningaeun kana eta maksud julig ngawaler, ”Eh, anu marunapek! Rek mancing kasalahan Kami maraneh teh?

¹⁹Coba kadieukeun duit anu ku maraneh sok dipake mayar pajeg!” Maranehna ngarasongkeun duit.

²⁰”Gambar jeung jenengan saha ieu?” Yesus mariksa.

²¹”Prabu,” jawab maranehna. Saur Yesus, ”Bayarkeun ka Prabu nu kagungan Prabu, bayarkeun ka Allah nu kagungan Allah.”

²²Diwaler kitu maranehna ngaharuleng tuluy arindit.

²³Dina poe eta keneh aya deui anu daratang ka Yesus, urang Saduki. Ieu golongan henteu percaya yen jelema bakal harudang deui tina maotna.

²⁴”Guru,” carekna, ”Musa ngajarkeun, upama hiji jelema maot teu gaduh anak, randana kudu dikawin ku dulur nu maot supaya gaduh anak anu bakal diakukeun ka nu parantos maot tea.

²⁵Kapungkur di dieu kantos aya tujuh jalmi adi lanceuk. Nu cikal kawin tuluy maot, urut bojona dikawin ku nu kadua.

²⁶Nu kadua maot, awewena dikawin ku nu katilu, kitu bae saterusna nepi ka maraot tujuhanana.

²⁷Ahirna awewena oge maot.

²⁸Tah dina waktos nu maraot teh dihirupkeun deui, bojo saha eta awewe teh? Margi tujuhanana parantos ngawin manehna.”

²⁹Waler Yesus, ”Aranjeun kacida kaliruna, lantaran tacan ngalarti kana Kitab Suci jeung kana kakawasaan Allah.

³⁰Jelema sanggeus hirup deui tina paehna, kaayaanana bakal saperti malaikat di sawarga jeung moal kawin deui.

³¹Kumaha aranjeun tacan maca timbalan Allah ngeunaan dihirupkeunana deui anu maraot? Dawuhan Allah kieu,

³²ʼKami teh Allahna Ibrahim, Allahna Ishak, jeung Allahna Yakub.ʼ Allah teh Allahna anu harirup, lain Allah pikeun nu paraeh.”

³³Jalma rea mah ngadenge eta piwulang teh kacida raresepeunana, mani arolohok.

³⁴Barang urang Parisi meunang beja yen Yesus geus ngabungkem urang Saduki, tuluy bareng ngadatangan ka Anjeunna.

³⁵Nu saurang guru agama Yahudi, nyual ka Anjeunna rek ngadoja,

³⁶pokna, ”Guru, parentah nu mana dina Hukum Agama anu pangutamana?”

³⁷Waler-Na, ” ʼMasing nyaah ka Pangeran Allah maneh terus jeung hate, terus jeung nyawa, sarta terus jeung budi akal.ʼ

³⁸Ieu parentah anu pangutamana jeung pangpentingna.

³⁹Nu kadua sarua pentingna, nya eta: ʼMasing nyaah ka batur kawas ka diri sorangan.ʼ

⁴⁰Sakabeh eusi Hukum Musa jeung pangajaran nabi-nabi lianna, gumantungna ka ieu dua parentah.”

⁴¹Sabot urang Parisi di darinya keneh ku Yesus dipariksa,

⁴²”Kumaha ari ceuk aranjeun, turunan saha ari Kristus?” ”Turunan Daud,” tembalna.

⁴³”Lamun kitu,” saur Yesus, ”ku naon Roh Allah maparin ilham ka Daud supaya nyebut ʼGustiʼ ka Kristus? Geuning saur Daud oge:

⁴⁴ʼPangeran ngadawuh ka Gusti kaula: Calik di dieu, katuhueun Kami, nepi ka sakabeh musuh Hidep taraluk nyaruuh ka Hidep.ʼ

⁴⁵Kumaha nu matak Kristus disebut turunan Daud, sabab Daud nyebut ka Anjeunna teh ʼGustiʼ?”

⁴⁶Maranehna teu bisa ngajawab sakecap-kecap acan ka Yesus. Ti semet harita teu aya anu wanieun deui nyual ka Anjeunna.