Read Boros Dusun LUKAS 1 Bible Online

LUKAS 1 - Boros Dusun bible

LUKAS 1

¹Teopilus anu mulya, Seueur jalmi anu parantos sateka-teka nyeratkeun perkawis anu parantos kajadian di urang.

²Hal-hal anu diserat ku maranehna cocog sareng carios anu katampi ku urang ti jalmi-jalmi anu ngawawarkeunana, nya eta anu nyaraksian sorangan eta kajadian ti awalna.

³Sim kuring, ku margi parantos nyukcruk kalayan taliti eta perkawis ti awit kajadianana, gaduh emutan aya saena nyeratkeun eta hal kalayan beres jujutanana, kangge Paduka.

⁴Maksad sim kuring nya eta supados hal leresna sagala perkawis anu parantos diwulangkeun ka Paduka teh ku Paduka kauninga sadayana.

⁵Keur mangsa Herodes ngarajaan di Yudea, aya hiji imam ti golongan imam-imam Abia, jenenganana Jakaria. Istrina oge turunan imam, jenenganana Elisabet.

⁶Istri pameget mulus lampahna di payuneun Allah, kacida taʼatna kana hukum jeung parentah Pangeran.

⁷Teu karagunganeun putra lantaran Elisabet gabug, jeung deui duanana geus kacida sarepuhna.

⁸Dina hiji poe Jakaria barangdamel mangku kawajiban imam di Bait Allah, giliranana laladen poean.

⁹Numutkeun undian anu biasa dijalankeun ku para imam, anjeunna anu kapilih kudu ngukus dina altar. Anjeunna lebet ka Bait Allah.

¹⁰Sabot anjeunna ngukus meuleum menyan, jalma rea ngadaroa di luar.

¹¹Breh malaikat Pangeran nembongan ka anjeunna, ngadeg di katuhueun altar paragi ngukus.

¹²Jakaria ngarenjag jeung kacida sieuneunana.

¹³Tapi malaikat teh ngalahir, ”Ulah sieun, Jakaria! Paneda anjeun ku Allah enggeus didangu. Elisabet bojo anjeun bakal boga anak, lalaki, pingaraneunana Yohanes.

¹⁴Pisakumahaeun anjeun bagjana upama eta geus lahir, nu sejen oge loba anu bakal bungah!

¹⁵Eta teh bakal jadi jelema penting di payuneun Allah. Ulah sina nginum anggur atawa inuman keras lianna. Ti barang dijurukeunana bakal dilinggihan ku Roh Suci,

¹⁶jeung bakal nungtun urang Israil baralik deui ka Pangeran Allahna.

¹⁷Manehna ku Pangeran diutus ti heula, bakal kuat jeung kawasa cara Nabi Elias; bakal ngarapihkeun kaom bapa jeung anak-anakna; bakal nungtun tukang ngaralawan baralik deui kana pikiran anu bener. Jadi eta teh bakal nyadiakeun keur Pangeran hiji umat anu daraek ngabdi ka Mantenna.”

¹⁸Piunjuk Jakaria ka malaikat, ”Perkawis eta kumaha bade buktosna? Abdi parantos kolot, pun bojo nya kitu keneh.”

¹⁹Waler malaikat, ”Kaula teh Jabrail, purah aya di payuneun Allah anu ngutus kaula ayeuna ka anjeun, nepikeun ieu warta anu pikabungaheun.

²⁰Ieu hal tangtu bukti dina waktuna, tapi ku anjeun teu dipercaya. Ku sabab anjeun henteu percaya, anjeun bakal pireu, moal bisa ngomong nepi ka mangsa anu diomongkeun ku kaula kajadian.”

²¹Jalma-jalma anu keur ngadaragoan Jakaria hareraneun dumeh anjeunna sakitu lilana di jero.

²²Ari kaluar, Jakaria bet teu iasaeun sasauran. Ku jalma rea kajudi yen anjeunna di jero mendak titingalian. Ku sabab teu iasa sasauran pisan, anjeunna tuluy pepeta ku panangan.

²³Sanggeus tutup giliran anjeunna laladen di Bait Allah, Jakaria mulih ka bumina.

²⁴Teu lila ti harita Elisabet geureuhana ngandeg, terus ngerem anjeun nepi ka lima bulan,

²⁵sarta misaur kieu, ”Ahirna Pangeran kersa mitulung, ngaleungitkeun kahinaan diri kuring.”

²⁶Sanggeus Elisabet ngandegna nincak genep bulan, Allah ngutus malaikat Jabrail ka Nasaret, hiji kota di Galilea,

²⁷nyandak amanat ka hiji parawan anu eukeur babakalan jeung Yusup turunan Raja Daud. Eta parawan ngaranna Mariam.

²⁸Jabrail sumping ka Mariam tuluy ngalahir, ”Salam rahayu! Pangeran nyarengan ka Nyai sarta pohara ngaberkahana-Na.”

²⁹Mariam ngarenjag nguping kasauran eta malaikat, jeung henteu ngartoseun naon maksudna.

³⁰Malaikat ngalahir deui, ”Ulah sieun, Mariam! Nyai kenging kurnia ti Allah.

³¹Nyai bakal ngandeg, bakal puputra anu ku Nyai kudu dijenenganan Yesus.

³²Eta putra Nyai bakal agung, jeung bakal disarebut Putra Allah Nu Maha Agung. Ku Allah Pangeran bakal didamel raja sakumaha Daud karuhun-Na,

³³bakal ngarajaan ka turunan Yakub salalawasna, sarta karajaana-Na moal aya anggeusna.”

³⁴Piunjuk Mariam ka eta malaikat, ”Eta perkawis teh kumaha pitiasaeunana, margi abdi teh parawan keneh?”

³⁵Malaikat ngawaler, ”Nyai bakal disumpingan ku Roh Suci, bakal diliputan ku kakawasaan Allah. Ku sabab kitu eta putra anu bakal medal teh suci, bakal disebut Putra Allah.

³⁶Sangkan Nyai terang, Elisabet baraya Nyai anu kacaturkeun gabug tur geus sakitu kolotna, ayeuna keur ngandeg geus kagenep bulan ieu.

³⁷Sabab mungguh di Allah mah henteu aya anu mustahil.”

³⁸Piunjuk Mariam, ”Abdi teh abdi Pangeran, mugia laksana sakumaha pilahir Juragan.” Ti dinya malaikat teh jengkar ngantunkeun Mariam.

³⁹Ti dinya Mariam geuwat angkat ka hiji kota pagunungan di Yudea,

⁴⁰ngajugjug ka bumi Jakaria. Sasumpingna tuluy uluk salam ka Elisabet.

⁴¹Barang Elisabet ngadangu salamna Mariam, bayi di jero kandunganana ngulisik. Elisabet dilebetan ku Roh Suci,

⁴²terus nyaur tarik, ”Nya Nyai anu pangdiberkahanana ti sadaya istri. Mugia wilujeng putra nu baris medal ti Nyai.

⁴³Karah naon ieu Ibu dugi ka kenging nugraha disumpingan ku Ibuna Gusti sembaheun Ibu?

⁴⁴Barang Nyai uluk salam, jabang bayi di jero kandungan Ibu dugi ka ajrug-ajrugan atoheun.

⁴⁵Nyai estu bagja parantos kersa percaya yen perkawis anu diandikakeun ku Pangeran teh tangtos buktos!”

⁴⁶Saur Mariam, ”Hate abdi muji ka Pangeran,

⁴⁷jiwa estu bingah, ku karana Allah Jurusalamet abdi,

⁴⁸reh Mantenna parantos mikaemut ka abdi, abdi-Na nu laip. Ti semet ayeuna, jalma rea ka abdi bakal nyarebat bagja,

⁴⁹reh abdi nampi perkawis anu marulya ti Allah Nu Maha Kawasa. Suci jenengan Mantenna.

⁵⁰Sugri nu mikaajrih ka Mantenna, turun-tumurun ku Mantenna dipikawelas.

⁵¹Mantenna metakeun panangana-Na anu santosa, ngubrak-ngabrik anu aradigung katut sagala paniatanana.

⁵²Raja-raja anu garagah perkosa, ku Mantenna dirurud tina tahtana, jalmi laip dijungjung harkatna.

⁵³Kaom lapar dicekapan ku sagala kasaean, nu baleunghar sina indit ngagilincing.

⁵⁴Mantenna sumping, nulungan Israil abdi-Na, sakumaha jangji-Na ka karuhun urang.

⁵⁵Emuteun yen seja mikawelas ka Ibrahim, sareng ka sugri turunanana, salalanggengna!”

⁵⁶Sanggeus nganjrekna di Elisabet kurang leuwih tilu bulan, Mariam tuluy mulih.

⁵⁷Sanggeus Elisabet bobotna jejeg bulanna tuluy babar, putrana pameget.

⁵⁸Tatangga-tatanggana jeung wargi-wargina anu nyarahoeun yen anjeunna mendak ganjaran anu taya papadana ti Pangeran, kabeh daratang ngawilujengkeun.

⁵⁹Sanggeus yuswa eta murangkalih jejeg saminggu, maranehna daratang deui arek nyepitan murangkalih, sakalian dipaparin jenengan Jakaria, cara ramana.

⁶⁰Tapi saur ibuna, ”Ulah eta ngaranna! Kudu Yohanes.”

⁶¹Tapi ceuk maranehna, ”Jenengan kitu mah teu aya di wargi-wargi Ibu!”

⁶²Ti dinya maranehna pepeta ka Jakaria, maksudna naranyakeun murangkalih teh kudu dijenenganan saha.

⁶³Jakaria mundut dipangnyandakkeun batu tulis, geus kitu nyerat kieu, ”Ngaranna Yohanes.” Jalma-jalma teh kacida hareraneunana!

⁶⁴Ari Jakaria harita keneh dadak sakala iasa deui sasauran, tuluy ngamulyakeun ka Allah.

⁶⁵Jalma-jalma jadi sarieuneun. Saterusna beja eta kajadian teh nyebar ka sakuliah kota pagunungan Yudea.

⁶⁶Saban anu ngadenge eta beja, hatena tingtaranya, ”Rek jadi naon eta murangkalih teh?” Kawantu eta murangkalih teh diaping ku kakawasaan Pangeran.

⁶⁷Jakaria, ramana Yohanes, dilebetan ku Roh Suci, tuluy ngawejang ngucapkeun amanat ti Allah:

⁶⁸”Sagala puji ka Pangeran, Allah Israil! Mantenna sumping seja nulungan umat-Na, ngabebaskeun maranehna.

⁶⁹Urang dipaparin Jurusalamet perkosa, turunan Daud abdi-Na.

⁷⁰Baheula Mantenna jangji, dikedalkeunana ku nabi-nabi pilihana-Na,

⁷¹bakal nyalametkeun urang ti musuh-musuh, tina genggeman anu gareuleuheun ka urang.

⁷²Dawuhana-Na, Mantenna baris mikawelas ka karuhun urang, sarta baris ngalaksanakeun jangji-Na nu suci.

⁷³Ka Ibrahim rama urang Mantenna sumpah, jangji ngaleupaskeun urang ti musuh-musuh, sarta ngidinan urang ngabdi ka Mantenna kalawan taya karisi.

⁷⁴

⁷⁵Sangkan urang di payuneuna-Na mulus jeung bener saumur-umur.

⁷⁶Ari hidep anaking, bakal disarebut nabi Allah Nu Maha Agung. Hidep ku Mantenna diutus ti heula, keur naratas jalan Mantenna.

⁷⁷Pikeun ngembaran jalma-jalma yen bakal disalametkeun, ku jalan dihampura dosa-dosana.

⁷⁸Allah urang sipat welas sipat kurnia, bakal nyorotkeun cahaya pisalameteun sina meletek luhureun urang,

⁷⁹sina sumorot ti sawarga, nyaangan ka sakur anu araya dina poekna kalangkang maot, baris nungtun lengkah urang ka jalan nu aman santosa.”

⁸⁰Murangkalih tea beuki ageung, jiwana beuki teguh. Anjeunna mukim di gurun keusik, ngantos mangsana nganyatakeun anjeun ka urang Israil.