Read Boros Dusun LUKAS 24 Bible Online

LUKAS 24 - Boros Dusun bible

LUKAS 24

¹Poe Minggu rebun-rebun keneh wanita-wanita teh geus bral ka pajaratan marawa rampe beunang nyadiakeun poe mangkukna.

²Ari daratang, batu tutup guha pajaratan teh kasampak geus ngagoler.

³Tuluy bae ka jarero guha, tapi layon Gusti Yesus teu aya.

⁴Sabot keur tingharuleng, deukeut ka maranehanana ujug-ujug aya anu ngaradeg duaan, anggoanana gumebyar cahayaan.

⁵Awahing ku sarieuneun, maranehanana mani sarujud, ari anu duaan tea ngalahir kieu, ”Ku naon anu hirup diteang ka enggon anu paraeh?

⁶Anjeunna geus henteu di dieu, geus tanghi. Sing inget kana pilahir-Na ka maraneh basa di Galilea, anu kieu:

⁷ʼPutra Manusa teh kudu diserenkeun ka jelema-jelema doraka, disalib, dina katilu poena bakal hirup deui.ʼ ”

⁸Eta wanita-wanita teh terus aringeteun yen bener Yesus geus ngalahir kitu.

⁹Tuluy marulang popoyan ka murid-murid anu sawelas jeung ka nu sejenna deui.

¹⁰Eta anu barebeja ka rasul-rasul teh nya eta Maria Magdalena, Yohana, Maria ibuna Yakobus, jeung wanita-wanita sejenna deui.

¹¹Tapi caritaanana ku rasul-rasul teu dipercaya, dianggap omongan nu lain-lain.

¹²Ngan ari Petrus mah terus lumpat muru ka pajaratan; ari nempo ka jero pajaratan ngan ningal boeh bae ngalumbruk. Tuluy mulang semu teu ngarti bet aya kajadian kitu.

¹³Dina poe eta keneh aya dua jelema panganut Yesus, keur laleumpang ka hiji kampung anu ngaran Emaus, jauhna ti Yerusalem kira-kira sawelas kilometer.

¹⁴Laleumpangna bari guntreng nyaritakeun perkara anu anyar kajadian.

¹⁵Sabot kitu Yesus sumping, terus nyarengan maranehna.

¹⁶Tapi maranehanana teu warawuheun.

¹⁷Yesus mariksa, ”Keur nyaritakeun naon guntreng bari leumpang?” Anu duaan ngarandeg, pasemonna alum.

¹⁸Anu saurang, anu ngaran Kleopas, malik nanya, ”Naha mung Bapa bae urang asing di Yerusalem teh, henteu uninga kana kajadian anyar-anyar ieu?”

¹⁹”Perkara naon?” pamariksa-Na. ”Perkawis Yesus urang Nasaret tea,” jawabna. ”Anjeunna teh nabi. Sagala pilahir sareng dadamelana-Na sarwa kawasa; hal eta diangken ku jalmi-jalmi sareng ku Allah.

²⁰Nanging ku para imam kapala sareng ku para pamingpin urang diserenkeun kana hukum pati, pupus disalib.

²¹Padahal nya Anjeunna pisan anu diarep-arep piiasaeun ngabebaskeun bangsa Israil teh! Katambih-tambih ayeuna, saparantos katilu dinten ieu ti semet kajadianana,

²²aya wartos ti sawatara wanita urang, kacida ngagetkeunana. Eta wanita-wanita teh ngalayad ka pajaratan,

²³ari dongkap layon teh geuning teu aya. Warangsulna teras nyarioskeun yen naringal malaikat anu ngawartoskeun yen Anjeunna hirup.

²⁴Lajeng ku rerencangan disidikkeun ka pajaratan, leres cocog sakumaha wartos, nanging ari Anjeunna mah teu aya katingal di dinya.”

²⁵Lahiran Yesus, ”Ari maraneh ku barelet, seuseut rek percaya kana sagala kasauran nabi-nabi teh!

²⁶Ari Kristus teh lain geus mistina nandangan eta sakabeh panganiayaan pikeun jalan kana kamulyaana-Na?”

²⁷Ti dinya Anjeunna nerangkeun ka maranehna sagala anu dituliskeun dina Kitab Suci hal salira-Na, ti kitab-kitab Musa nepi ka kitab-kitab para nabi.

²⁸Sanggeus deukeut ka kampung anu dijugjug, Yesus nyemukeun anu rek lajeng;

²⁹tapi ku maranehna diandeg, pokna, ”Sae ngarereb bae di sim kuring, parantos burit, parantos reupreupan.” Anjeunna terus sindang ka maranehna.

³⁰Waktu tuang jeung maranehna, Anjeunna nyandak roti, muji sukur terus nyemplekan roti diasongkeun ka maranehna.

³¹Geus kitu kakara panon maranehna teges, warawuheun deui ka Anjeunna, tapi Anjeunna terus ngaleungit.

³²Ceuk maranehna, ”Paingan tadi waktu Anjeunna ngalahir jeung nerangkeun Kitab Suci, hate urang mani asa ajol-ajolan.”

³³Ti dinya harita keneh maranehna baralik deui ka Yerusalem. Di Yerusalem nyampak murid-murid anu sawelas geus kumpul jeung nu sejen-sejenna deui,

³⁴keur nyarita kieu, ”Gusti teh enya geus tanghi! Geus nembongan ka Simon!”

³⁵Geus kitu anu ti Emaus teh nyaritakeun papanggihanana di jalan, jeung peta Anjeunna waktu nyemplekan roti nepi ka maranehanana warawuheun deui ka Anjeunna.

³⁶Sabot eta anu duaan keur cacarita kitu, jleg bae Gusti ku anjeun geus ngadeg di tengah-tengah riungan, pok ngalahir, ”Bagea!”

³⁷Atuh kacida maranehna sarieuneunana, panyangkana jurig.

³⁸Tapi Anjeunna ngalahir deui, ”Ku naon sarieun? Ku naon hate maraneh cangcaya?

³⁹Tenjo ieu leungeun jeung suku Kami, teges-teges, ieu teh Kami. Rampa, tangtu karasa, da jurig mah henteu dagingan henteu tulangan, teu kawas Kami.”

⁴⁰Bari ngalahir kitu Anjeunna nembongkeun panangan jeung sampeana-Na.

⁴¹Maranehna can palercaya keneh tapi kacida barungaheunana pacampur jeung heran; ku sabab kitu Anjeunna tuluy mariksa, ”Maraneh boga dahareun di dieu?”

⁴²Ku maranehanana dihaturanan goreng lauk sakeureut,

⁴³tuluy ku Anjeunna dituang di hareupeun maranehna.

⁴⁴Anjeunna ngalahir deui, ”Hal-hal ieu bareto ku Kami geus diomongkeun ka maraneh waktu urang reureujeungan keneh; ceuk Kami harita, sagala rupa anu geus ditulis ngeunaan diri Kami dina Kitab Hukum Musa, dina Kitab Nabi-nabi jeung dina Kitab Jabur, kudu kajadian.”

⁴⁵Ti dinya Anjeunna mukakeun pikiran maranehanana supaya ngalarti kana Kitab Suci.

⁴⁶Saur-Na deui, ”Geus dituliskeun kieu: Kristus kudu disangsara jeung kudu gugah deui tina pupusna tilu poe ti sanggeusna.

⁴⁷Jeung kalawan jenengan Anjeunna warta hal pertobat jeung panghampura dosa kudu diuarkeun ka sagala bangsa, mimiti ti Yerusalem.

⁴⁸Maraneh saksina tina eta sagala kajadian.

⁴⁹Kami pribadi ka maraneh bakal maparin hal anu geus dijangjikeun ku Rama Kami. Tapi memeh eta maraneh kudu ngadago heula di Yerusalem, nepi ka mangsa maraneh geus diliputan ku kakawasaan ti sawarga.”

⁵⁰Ti dinya maranehna ku Yesus dicandak kaluar ti jero kota, jauhna nepi ka Betania. Di dinya Anjeunna ngangkat panangan duanana ngaberkahan ka maranehna.

⁵¹Sabot keur ngaberkahan, Anjeunna beuki misah tuluy diangkat ka sawarga.

⁵²Bruk maranehanana sarujud ngahormat, tuluy marulang ka Yerusalem, hatena mudal ku kabungah.

⁵³Saterusna sapopoena araya di Bait Allah maruji sukur ka Allah.