Read Boros Dusun LUKAS 4 Bible Online

LUKAS 4 - Boros Dusun bible

LUKAS 4

¹Waktu Yesus jengkar ti Walungan Yordan, Anjeunna dikawasaan ku Roh Suci, dicandak ka gurun keusik.

²Di gurun keusik digoda ku Iblis lilana opat puluh poe, sapanjang kitu henteu barangtuang naon-naon. Sanggeus waktu eta tutup Anjeunna ngaraos lapar.

³Ceuk Iblis ka Anjeunna, ”Lamun Anjeun Putra Allah, eta batu piwarang jadi roti.”

⁴Tapi waler Yesus, ”Ceuk Kitab Suci, ʼManusa moal bisa hirup ku roti wungkul.ʼ ”

⁵Yesus ku Iblis dibawa ka tempat luhur, sakolepat ditembongan sakabeh karajaan di alam dunya.

⁶”Eta sagala kakawasaan jeung kabeungharan ku kaula rek diserenkeun ka Anjeun,” ceuk Iblis ka Yesus. ”Sabab kabeh geus dipasrahkeun ka kaula, jadi kaula kawasa mikeun ka saha bae cocogna hate.

⁷Eta kabeh baris kapimilik ku Anjeun, asal Anjeun nyembah ka kaula.”

⁸Waler Yesus, ”Ceuk Kitab Suci, ʼManeh kudu nyembah ka Pangeran Allah maneh sarta kudu ngabakti ngan ka Mantenna!ʼ ”

⁹Ti dinya Yesus ku Iblis dibawa ka Yerusalem, ka puncak Bait Allah nu pangluhurna. Ceuk Iblis ka Anjeunna, ”Lamun Anjeun Putra Allah, coba geura ngaragragkeun anjeun ti dieu ka handap.

¹⁰Sabab ceuk Kitab Suci, ʼAllah bakal miwarang para malaikat-Na nangtayungan Anjeun.ʼ

¹¹Jeung, ʼPara malaikat bakal nyangga salira Anjeun, nepi ka Anjeun moal tigasruk sampean-sampean acan kana batu.ʼ ”

¹²Tapi waler Yesus, ”Ceuk Kitab Suci, ʼManeh ulah ngadoja ka Pangeran Allah maneh.ʼ ”

¹³Anggeus Iblis ngagoda Yesus ku rupa-rupa reka perdaya, terus indit ninggalkeun Anjeunna, saheulaanan henteu ngaganggu deui.

¹⁴Sanggeus kitu Yesus mulih deui ka Galilea sarta disarengan ku kakawasaan Roh Suci. Warta perkara Anjeunna nyebar ka sakuliah wewengkon eta.

¹⁵Anjeunna mimiti barangdamel, ngawulang di imah-imah ibadah, sarta unggal jelema pada muji ka Anjeunna.

¹⁶Yesus angkat ka Nasaret tempat Anjeunna diageungkeun. Dina poe Sabat angkat ka imah ibadah sakumaha kabiasaana-Na. Anjeunna ngadeg seja ngaos Kitab Suci,

¹⁷seug disodoran Kitab Nabi Yesaya. Gulunganana ku Anjeunna dibuka terus diaos ayat anu ungelna kieu,

¹⁸”Roh Pangeran ngauban Kami. Sabab Kami ku Mantenna ditangtukeun kudu mawa warta pikabungaheun ka nu mariskin. Kami ku Mantenna diutus kudu ngabewarakeun yen: para tawanan bakal dibebaskeun, nu lalolong bakal dibareuntakeun. Nu dikaniaya baris dileupaskeun.

¹⁹Jeung ngawawarkeun, yen geus waktuna Pangeran ngajait umat-Na.”

²⁰Kitab digulungkeun, dipasihkeun deui ka pangbantu, geus kitu Anjeunna calik, dipalencrong ku sakur anu hadir.

²¹Pok Anjeunna ngalahir, ”Ayat-ayat Kitab Suci anu bieu, poe ieu geus laksana waktu ku aranjeun kareungeu dibacakeun.”

²²Jalma-jalma mani harookkeun, katarik ku kacapetangan Anjeunna ngagunakeun kecap-kecap. Ceuk maranehna, ”Eta teh lain anak Yusup tea?”

²³Yesus ngalahir, ”Meureun aranjeun hayang ngeunakeun paribasa anu kieu ka Kaula, ʼTabib, cageurkeun diri sorangan.ʼ Jeung tangtu ceuk aranjeun, ʼCik anu ku Anjeun dipigawe di Kapernaum teh, anu aya bejana ka dieu, ayeuna jieun di dieu di lembur sorangan!ʼ ”

²⁴Saur-Na deui, ”Kaula ngabejaan, nabi teh di lemburna mah teu dihargaan.

²⁵Geura ieu reungeukeun: Jaman Nabi Elias, hujan henteu turun-turun nepi ka tilu taun satengah, sakuliah tanah Israil paceklik, jalma-jalma kalaparan. Harita di Israil loba pisan randa.

²⁶Tapi saurang ge ku Elias teu aya nu disumpingan, Elias henteu diutus ka maranehna. Anu disumpingan teh malah hiji randa anu aya di Sarpat daerah Sidon.

²⁷Jeung keur jaman Nabi Elisa, di tanah Israil loba anu katerap ku kasakit lepra. Tapi saurang ge ku anjeunna taya anu dicageurkeun. Anu dicageurkeun teh malah Naaman, urang Siria.”

²⁸Barang jalma-jalma di eta imah ibadah ngadarenge kitu kacida arambekeunana.

²⁹Maranehna carengkat, tuluy ngenyang Yesus ditarik ka luar kota, dibawa ka pasir padumukan kota maranehna, arek diragragkeun kana jurang.

³⁰Tapi Anjeunna norobos tuluy angkat ti dinya.

³¹Yesus angkatna ka Kapernaum, hiji kota di Galilea. Dina poe Sabat Anjeunna ngawulang di imah ibadah.

³²Piwulang-Na narik ati, sasaur-saur-Na ngandung wibawa.

³³Di dinya aya hiji jelema anu karanjingan ku roh jahat. Eta jelema teh ngagorowok pokna,

³⁴”Eh Yesus urang Nasaret! Aya maksud naon Anjeun ka urang? Arek nyilakakeun? Urang nyaho, Anjeun teh utusan suci Allah!”

³⁵Yesus marentah ka eta roh jahat saur-Na, ”Repeh maneh, jeung geura kaluar ti eta jelema!” Seug eta jelema teh ku eta roh jahat dijongklokkeun ka hareupeun jalma rea, tapi henteu dikikieu deui, roh jahatna tuluy ingkah.

³⁶Jalma-jalma barengong, ngomong pada batur pokna, ”Euleuh eta ucapana-Na! Parentah-Na matih gede kawasana. Roh jahat diparentah ingkah teh ingkah!”

³⁷Ti dinya beja ngeunaan hal Anjeunna nyebar ka sakuliah daerah eta.

³⁸Ti imah ibadah Yesus angkat ka imah Simon. Harita mitoha awewe Simon keur gering muriang panas, seug diunjukkeun ka Yesus.

³⁹Yesus lebet tuluy ngadeg gigireun ranjang nu gering, kasakit muriangna ditimbalan ingkah. Harita keneh nu gering teh terus cageur tuluy ngalalayanan tamu-tamu.

⁴⁰Sanggeus surup panonpoe jul-jol anu marawa nu garering, kasakitna rupa-rupa. Nu garering teh masing-masing ku Anjeunna dicabak awakna tuluy calageur.

⁴¹Anu kasarurupan ku roh jahat, roh-roh jahatna aringkah bari tinggarero pokna, ”Anjeun teh Putra Allah!” Sabab eta roh-roh jahat nyarahoeun yen Anjeunna teh Kristus. Tapi ku Yesus ditimbalan jarempe teu meunang ngaromong deui.

⁴²Isukna waktu meletek srangenge Yesus kaluar ti eta kota, angkat ka hiji tempat anu simpe, seug pada nareangan. Sanggeus kapanggih pada ngeukeuhan supaya ulah ngantunkeun.

⁴³Tapi saur-Na, ”Kota-kota sejen oge kudu diteang, perlu diwuruk hal Injil Kasalametan ngeunaan Karajaan Allah. Kami diutus ku Allah pikeun kaperluan eta.”

⁴⁴Ti dinya Anjeunna ngawulang di imah-imah ibadah di sakuliah daerah eta.