Read Boros Dusun YOHANES 21 Bible Online

YOHANES 21 - Boros Dusun bible

YOHANES 21

¹Sanggeus eta, Yesus nembongan deui ka murid-murid-Na, di sisi Talaga Tiberias. Kieu kajadianana:

²Simon Petrus, Tomas (anu disebut si Kembar), Natanael (urang Kana, Galilea), dua anak Sebedeus, jeung dua murid deui, karumpul.

³Ceuk Simon Petrus, ”Kuring rek ngala lauk.” ”Kuring milu,” ceuk nu sejen. Tuluy sarerea kana parahu, tapi sapeuting jeput teu meunang naon-naon.

⁴Wanci meletek panonpoe Yesus ngadeg di sisi cai, tapi murid-murid teu warawuheun.

⁵Anjeunna mariksa, ”Barudak, can beubeunangan?” ”Teu acan!” jawab maranehna.

⁶Saur Yesus, ”Semprangkeun heurapna ka katuhueun parahu, tangtu aya nu beunang!” Seug heurapna disemprangkeun, barang ditarik meh teu kaangkat pinuh ku lauk.

⁷”Geuning Gusti!” ceuk murid anu dipikaasih ku Yesus ka Petrus. Dibejaan yen Gusti, rap bae Petrus make baju (sabab keur teu make baju), tuluy luncat kana cai.

⁸Ka darat teu pati jauh, kira-kira saratus meter. Nu sejen oge terus nyarisi dina parahu bari narik heurap anu pinuh ku lauk.

⁹Barang tarurun tina parahu nyampak geus aya seuneu areng ruhay, di luhurna diteundeunan lauk jeung roti sababaraha siki.

¹⁰Yesus ngalahir, ”Bawa ka dieu saeutik lauk beunang bieu.”

¹¹Simon Petrus unggah kana parahu narik heurap ka darat. Laukna galede aya saratus lima puluh tilu siki. Sakitu lobana lauk anu beunang, tapi heurapna teu nepi ka bedah.

¹²Yesus ngalahir, ”Ka darieu, dalahar.” Murid-murid teu aya anu wanieun nanya, ”Dupi Bapa saha?” da geus nyarahoeun yen Anjeunna teh Gusti.

¹³Ku sabab kitu Yesus terus nyandakan roti jeung lauk dibagikeun ka maranehna.

¹⁴Ti barang gugah tina pupus nepi ka harita, Yesus geus katilu kalina nembongan ka murid-murid.

¹⁵Sanggeus dalahar, Yesus mariksa ka Simon Petrus, ”Simon anak Yonas, enya hidep nyaah ka Kami leuwih ti nu sejen?” ”Sumuhun Gusti,” walon Petrus, ”Gusti uninga yen abdi teh nyaah ka Gusti.” Saur Yesus, ”Panguruskeun anak-anak domba Kami.”

¹⁶Geus kitu mariksa deui kadua kalina, ”Simon anak Yonas, enya hidep nyaah ka Kami?” Walon Petrus, ”Sumuhun Gusti, Gusti uninga yen abdi nyaah ka Gusti.” Saur Yesus, ”Panguruskeun domba-domba Kami.”

¹⁷Katilu kalina Anjeunna mariksa deui, ”Simon anak Yonas, enya hidep nyaah ka Kami?” Dipariksa nepi ka tilu kali, ”Enya hidep nyaah ka Kami?” Petrus jadi nalangsa, tuluy unjukan, ”Gusti, Gusti uninga kana saniskanten perkawis, tangtos uninga yen abdi nyaah ka Gusti.” Saur Yesus, ”Panguruskeun domba-domba Kami.

¹⁸Satemenna ceuk Kami: Maneh keur ngora mah biasa sok ras jig, indit ka mana kahayang. Tapi engke ari geus kolot, maneh kudu pasrah ngasongkeun leungeun dibarogod ku batur, indit ka mana karep nu mawa, lain kahayang sorangan.” (

¹⁹Ieu pilahir Anjeunna, ngagambarkeun carana Petrus nekanan ajalna engke sangkan Allah dimulyakeun.) ”Tuturkeun Kami,” saur Yesus ka Simon Petrus.

²⁰Petrus ngalieuk ka tukang, sihoreng dituturkeun ku murid anu dipikaasih ku Yesus, anu keur basa tuang peuting diukna nepi ka ngalendean ka Anjeunna jeung nanya kieu, ”Saha jalmina anu bade ngahianat teh, Gusti?”

²¹Barang Petrus nenjoeun ka manehna, tuluy nanya ka Yesus, ”Gusti, dupi manehna kumaha?”

²²Waler Yesus, ”Lain perkara maneh lamun manehna ku Kami dikersakeun hirup keneh nepi ka Kami datang deui. Tapi ari maneh, geura tuturkeun Kami!”

²³Tuluy rame di kalangan panganut-panganut Yesus, magar murid anu eta mah moal maot-maot. Padahal Yesus henteu nyaurkeun yen manehna moal maot-maot, nyaurkeun soteh, ”Lain perkara maneh lamun manehna ku Kami dikersakeun hirup keneh nepi ka Kami datang deui.”

²⁴Nya murid anu eta anu nyaritakeun ieu sagala perkara teh, jeung anu nuliskeunana, nepi ka urang teu hamham deui yen anu dicaritakeunana teh saestuna.

²⁵Loba keneh perkara-perkara salian ti ieu anu dipidamel ku Yesus. Upama eta kabeh ditulis sarupa-sarupana, kawasna sadunya ge moal cukup keur nyimpen kitab-kitab nu rek ditulisanana.