Read Boros Dusun RASUL-RASUL 11 Bible Online

RASUL-RASUL 11 - Boros Dusun bible

RASUL-RASUL 11

¹Beja yen aya anu lain bangsa Yahudi narampa pangandika Allah geus nepi ka rasul-rasul, jeung geus nyebar ka anu geus palercaya di sakuliah Yudea.

²Waktu Petrus sumping ka Yerusalem, anjeunna dipaduan ku jelema-jelema anu disunat, pokna,

³”Ku naon anjeun dugi ka natamu ka bangsa anu henteu disunat, malah tuang sasarengan jeung maranehna?”

⁴Ku Petrus dicarioskeun hal ihwalna, ditetek ti barang mimiti, saurna,

⁵”Kaula meunang tetenjoan di Yopa sabot keur sembahyang. Aya anu diturunkeun ti langit siga lawon rubak ditalian opat juruna, diulur nepi ka deukeut kaula.

⁶Ku kaula ditempo, eusina rupa-rupa sato ingu jeung sato leuweung, sato-sato nu ngarayap, jeung manuk-manuk haram.

⁷Tuluy kaula ngadenge aya soara ngalahir ka kaula, ʼGeura cengkat, Petrus, eta peuncit, tuluy dahar!ʼ

⁸Walon kaula, ʼPaliyas, Gusti! Abdi tara neda barang haram atanapi anu najis!ʼ

⁹Tapi eta soara teh ngalahir deui ti langit, ʼAnu geus dihalalkeun ku Allah ku maneh ulah diharamkeun!ʼ

¹⁰Kitu jeung kitu bae nepi ka tilu kali, tungtungna eta barang teh kabeh ditarik deui ka langit.

¹¹Sawaktu pisan jeung eta aya tilu jelema daratang ka imah anu dianjrekan ku kaula, utusan ti Kesarea seja ka kaula.

¹²Kaula didawuhan ku Roh Suci yen kudu milu jeung maranehna, ulah asa-asa. Kaula milu indit, dibaturan ku urang Yopa genepan anu geus palercaya. Datang ka Kesarea tuluy sarerea asup ka imah Kornelius.

¹³Kornelius nyarita yen meunang tetenjoan, aya malaikat ngadeg di imahna, ngalahir kieu, ʼManeh geura ngajurungan jelema ka Yopa, angkir jelema anu ngaran lengkepna Simon Petrus,

¹⁴anu bakal nepikeun pangandika pisalameteun maneh sakulawarga.ʼ

¹⁵Sanggeus kaula medar perkara eta, Roh Suci lungsur ka maranehna, cara ka urang basa mimiti narima tea.

¹⁶Ras kaula inget ka anu dilahirkeun ku Gusti, nya eta, ʼYohanes ngabaptisna ku cai, ari maraneh mah bakal ngabaptis ku Roh Suci.ʼ

¹⁷Tetela Allah ku manten anu maparinkeun eta kurnia ka maranehna teh, cara ka urang bareto basa urang mimiti percaya ka Gusti Yesus Kristus. Ku sabab kitu pimanaeun kaula bisa nyegah pangersa Allah!”

¹⁸Sanggeus meunang katerangan kitu, anu nyaralahkeun ka anjeunna teh tungtungna mah maruji ka Allah, pokna, ”Leres upami kitu mah, sanes bangsa Yahudi ge ku Allah dipaparin kasempetan tobat sareng hirup anu sajati.”

¹⁹Para panganut Yesus anu diudag-udag basa Stepanus dipaehan tea, papencarna aya anu nepi ka Penesia, Siprus, jeung Antioki. Di ditu tetep nguarkeun pangandika Allah ka urang Yahudi deui.

²⁰Tapi aya anu asalna ti Siprus jeung Kirena daratang ka Antioki nguarkeun Injil Kasalametan hal Gusti Yesus ka nu lain urang Yahudi,

²¹tur disarengan ku kakawasaan Gusti, nepi ka loba pisan anu tuluy palercaya, aranut ka Anjeunna.

²²Tuluy eta hal kabejakeun ka jamaah di Yerusalem, anu terus ngutus Barnabas ka Antioki.

²³Barnabas kacida bingaheunana ningali maranehanana sakitu diberkahanana ku Gusti. Maranehna ku anjeunna dipeupeujeuhan supaya enya-enya satia satuhu ka Gusti.

²⁴Barnabas jalma berbudi, manahna pinuh ku Roh Suci, kacida percayana ka Gusti, nepi ka loba anu katarik aranut ka Gusti.

²⁵Ti dinya Barnabas ngalayad Saulus ka Tarsus.

²⁶Saulus dicandak ka Antioki, kumpul jeung jamaah di dinya sataun campleng lilana bari ngawulang ka jalma rea. Jalma-jalma panganut Yesus mimitina disarebut ”Urang Kristen” teh nya didinya, di Antioki.

²⁷Sawaktu keneh jeung eta aya sawatara nabi ti Yerusalem sarumping ka Antioki.

²⁸Nabi anu jenenganana Agabus ngaramal ku pangdorong Roh Allah, saurna bakal aya bahla kalaparan di sakuliah dunya. (Ramalanana teh enya ngabukti, kajadian dina jaman pamarentahan Prabu Klaudius.)

²⁹Ku sabab kitu para panganut Yesus di Antioki rempug rek arudunan sakamampuhna masing-masing, sumbangkeuneun ka dulur-dulur sakapercayaan di Yudea.

³⁰Sanggeus duitna kumpul, tuluy ngutus Barnabas jeung Saulus pikeun nyerenkeun eta duit sumbangan ka pangurus jamaah di Yudea.