Read Boros Dusun RASUL-RASUL 19 Bible Online

RASUL-RASUL 19 - Boros Dusun bible

RASUL-RASUL 19

¹Waktu Apolos di Korinta, Paulus mah ngideran pilemburan di wewengkon eta, ti dinya tuluy sumping ka Epesus. Di Epesus mendak sawatara jelema anu geus palercaya ka Yesus.

²Ku anjeunna dipariksa, ”Ti saparantos palercaya, kumaha aranjeun parantos narampi Roh Suci?” Jawabna, ”Nguping oge nembe yen aya Roh Suci.”

³Paulus mariksa deui, ”Aranjeun dibaptis ku baptisan naon?” ”Sumuhun baptisan Yohanes,” jawabna.

⁴Saur Paulus, ”Baptisan Yohanes mah baptisan pertobat. Ari anjeunna nyaurkeun yen urang Israil kedah percaya ka anu bakal sumping pandeurieunana; nya eta ka Yesus.”

⁵Sanggeus meunang katerangan kitu, seug maranehna kabeh dibaptis ku pajenengan Gusti Yesus.

⁶Sanggeusna ku Paulus ditarumpangan panangan, seug nararima Roh Suci, tuluy mimiti ngaromong ku rupa-rupa basa jeung nyaturkeun pangandika Allah.

⁷Jumlah maranehna kira-kira dua belas urang.

⁸Paulus lebet ka imah ibadah, mituturan urang dinya kacida wanina nepi ka tilu bulan, sateka-teka ngayakinkeun ka maranehna hal Karajaan Allah.

⁹Tapi aya anu baredegong jeung arembungeun percaya, ngagogoreng kana ajaran rancangan Allah enggoning nyalametkeun manusa ku jalan Gusti Yesus ka jalma rea. Anu matak Paulus terus nyingkah ti maranehna, nyandak anu geus palercaya, ngawulangna ngalih ka rohangan perpustakaan Tiranus. Saban poe

¹⁰kitu bae nepi ka dua taun, datang ka urang Yahudi jeung bangsa sejen di sawewengkon Asia kabeh ngadarenge perkara pangandika Allah.

¹¹Pangeran nembongkeun mujijat-mujijat luar biasa ku jalan Paulus.

¹²Nepi ka salempay atawa beulitan urut Paulus lamun dibawa ka nu gering, panyakitna terus undur, roh jahat ge terus nyingkah.

¹³Aya sawatara dukun urang Yahudi anu sok ngider ka ditu ka dieu, wawanianan nyebut jenengan Gusti Yesus ka anu kasurupan roh jahat, pokna, ”Demi jenengan Yesus anu diuarkeun ku Paulus, maneh setan geura nyingkah!”

¹⁴Anu karitu teh tujuh jalma padudulur, anakna Skewa, Imam Agung.

¹⁵Tapi roh jahatna nembalan kieu, ”Aing ka Yesus wawuh, ka Paulus nyaho, ka maraneh mah aing teu nyaho!”

¹⁶Seug jelema anu kasurupanana teh nubruk ka maranehna terus ngekeyek, nepi ka maranehna raripuh, lulumpatan bari tararanjang, papakeanana rarangsak, awakna raruksak, raraheut.

¹⁷Terus kautarakeun ka urang Yahudi jeung ka bangsa sejen anu araya di Epesus, nepi ka sarieuneun, sarta pajenengan Yesus beuki seungit.

¹⁸Loba anu geus palercaya tuluy ngawakcakeun kalakuanana anu enggeus-enggeus ka umum.

¹⁹Loba deui anu tadina jaradi tukang sihir ngumpulkeun kitab-kitab paririmbonna, tuluy didaruruk kasaksian ku sarerea. Lamun diitung-itung harga eta kitab-kitab teh kabeh pangaji lima puluh rebu uang perak.

²⁰Pangandika Gusti gancang pisan nerekabna jeung nepi ka nyilepkeun nu sejen-sejen.

²¹Sabada kajadian eta, Paulus aya manah seja ngalayad ka Makedoni jeung Ahaya, terus rek ka Yerusalem. Jeung saurna, ”Sanggeus ti dinya, kaula oge perlu ka Rum.”

²²Memeh angkat, anjeunna ngutus heula rerencanganana, Timoteus jeung Erastus sina ti heula ka Makedoni, sabab anjeunna mah rek rada lila keneh calikna di Asia.

²³Nya dina mangsa eta di Epesus aya huru-hara gede tina sabab pangajaran hal Gusti Yesus.

²⁴Sabab di dinya aya hiji tukang karajinan perak, ngaranna Demetrius, nu sok nyieunan kukuilan Dewi Artemis. Usahana kacida nguntungkeunana ka buruh-buruhna.

²⁵Manehna ngumpulkeun babaturanana papada tukang karajinan perak, tuluy ngomong kieu, ”Batur-batur! Ieu usaha urang teh kacida nguntungkeunana.

²⁶Kari-kari, aranjeun oge tangtu moal bireuk deui ka jelema ngaran Paulus, anu nyebutkeun yen piraku aya dewa dijieun ku jelema. Loba pisan anu geus kagendam nepi ka palercaya kana omonganana, lain di Epesus bae, tapi meh di sakuliah Asia.

²⁷Ieu kacida ngabahyakeunana, palangsiang pacarian urang kubra. Malah boa-boa kuil Dewi Agung Artemis oge cambal moal dipupunjung deui, kaagungan dewi pupujan sa-Asia jeung saalam dunya teh palangsiang bakal musna!”

²⁸Ngadarenge kitu teh maranehna kacida arambekeunana, tuluy raong, ”Hirup Dewi Artemis, pupujan urang Epesus!”

²⁹Buriak budal nyieun rusuh di sakuliah kota. Malah terus newak Gayus jeung Aristarkus urang Makedoni, rencang nyaba Paulus, disered ka gedong kasenian, jalma-jalma abrul-abrulan.

³⁰Paulus rek muru, tapi dipegatan ku murid-murid.

³¹Gegeden-gegeden kota oge, anu sawareh mah geus nyobat ka anjeunna, wariat saur supaya anjeunna ulah nemonan ka gedong kasenian.

³²Di eta gedong kasenian jalma-jalma teh raribut teu puguh dengekeuneunana, ceuk ieu kieu, ceuk itu kitu, kawantu lolobana mah teu nyarahoeun naon tujuanana nu matak ka darinya.

³³Aya deui nu nyarangka, yen ulon-ulon karusuhan teh Aleksander, pedah eta disurung-surungkeun ku urang Yahudi sina ka hareup. Ari Aleksander tuluy pepeta ku leungeunna menta supaya jarempe, karepna rek ngabela diri.

³⁴Tapi barang jalma rea taregeseun yen manehna urang Yahudi, ger bae ngageder, ”Agung Artemis, dewi urang Epesus!” Kitu bae terus nepi ka dua jam.

³⁵Ahirna bisa oge direpehkeun ku panitera kota. Pokna, ”Dulur-dulur! Urang Epesus geus euweuh nu bireuk deui, kota Epesus teh purah ngariksa kuil Dewi Artemis jeung batu suci anu ragrag ti langit,

³⁶taya nu bisa ngabantah. Ku sabab kitu coba rarepeh, ulah gagabah teu paruguh.

³⁷Ieu dua jelema disered ka dieu, padahal teu ngarampog kuil-kuil, teu ngagogoreng ka dewi urang.

³⁸Upama Demetrius jeung babaturanana rek ngadakwa jelema, atuh kudu ka pangadilan, kantor pangadilan unggal poe oge muka.

³⁹Upama rek menta diurus perkara sejen, dibereskeunana kudu dina musawarah umum anu baku.

⁴⁰Kajadian poe ieu kacida ngabahyakeunana. Urang bisa dikelakkeun nyieun huru-hara, taya alesan pikeun bisa dibenerkeun!”

⁴¹Geus kitu jalma-jalma teh dibubarkeun.