Read Boros Dusun RASUL-RASUL 5 Bible Online

RASUL-RASUL 5 - Boros Dusun bible

RASUL-RASUL 5

¹Aya hiji jelema ngaran Ananias jeung bojona ngaran Sapirah, ngajual tanahna saluwuk.

²Tapi beubeunanganana henteu diserenkeun kabeh ka rasul-rasul, ditahan sawareh disalingkuhkeun keur dirina sorangan, sailon jeung bojona.

³Pilahir Petrus ka Ananias, ”Ananias, ku naon kawujuk ku Iblis nepi ka wani ngabohong ka Roh Suci? Ku naon duit beubeunangan ngajual tanah teh disalingkuhkeun sawareh?

⁴Memeh dijual eta rajakaya teh boga maneh, sanggeus dijual, duitna hak maneh keneh. Jadi ku naon nepi ka boga pikiran milampah saperti kitu? Maneh ngabohong teh lain ka manusa, enyana mah ka Allah!”

⁵Barang ngadenge lahiran kitu, bluk Ananias tibeubeut, paeh pisan. Eta kajadian estu matak gimir sakur nu ngadenge.

⁶Jol barudak ngora, mayit Ananias diboehan tuluy digotong ka luar dikuburkeun.

⁷Heuleut tilu jam datang bojona, teu nyahoeun ka nu anyar kajadian.

⁸Ku Petrus dipariksa, ”Duit bebeunangan maneh jeung salaki ngajual tanah teh bener sakieu kabehna?” ”Leres, sakitu sadayana,” jawabna.

⁹Pilahir Petrus, ”Ku naon maneh jeung salaki nepi ka wani ngadoja ka Roh Allah? Tuh di lawang, anu tas nguburkeun salaki maneh kakara daratang rek ngagotong mayit maneh!”

¹⁰Bluk Sapirah tibeubeut harita keneh, terus paeh. Barudak ngora tea arasup, nyampak Sapirah geus jadi mayit, tuluy digarotong ka luar, dikuburkeun gigireun kuburan salakina.

¹¹Ngadarenge aya kajadian kitu, jamaah jeung salian ti eta jadi kacida sarieuneunana.

¹²Kaajaiban jeung kaahengan anu diayakeun ku rasul-rasul teh loba-loba deui. Kumpulan anu palercaya sering karumpul di Tepas Suleman.

¹³Jalma-jalma sejen kacida marujina, ngan taya anu wanieun campur.

¹⁴Tapi anu palercaya ka Gusti saban poe nambahan bae awewe lalaki.

¹⁵Rasul-rasul pada mupusti, nepi ka loba anu marawa anu garering ka sisi jalan, dikedeng-kedengkeun dina bale-bale atawa dina samak, maksudna asal bisa kakalangkangan bae ku Petrus ari anjeunna ngalangkung.

¹⁶Loba jelema ti kota-kota sakurilingeun Yerusalem anu daratang marawa anu garering atawa anu kaganggu ku roh jahat, kabeh dicalageurkeun.

¹⁷Tungtungna Imam Agung jeung ihwan-ihwanna nya eta jalma-jalma golongan Saduki timbul dengkina, arek ngaganggu.

¹⁸Rasul-rasul ditangkep, diasupkeun ka panjara umum.

¹⁹Tapi peutingna panto-panto panjara teh dibuka ku malaikat Pangeran, rasul-rasul dituyun ka luar jeung dilahiran kieu,

²⁰”Terus bae ka Bait Allah, embarkeun ka jalma rea pangandika hal hirup anyar.”

²¹Rasul-rasul tumut, subuh-subuh lebet ka Bait Allah tuluy ngawulang. Imam Agung jeung ihwan-ihwanna nyaur para kokolot Yahudi ngayakeun sidang, tuluy nimbalan ngala rasul-rasul ti panjara sangkan dibawa ka hareupeun Mahkamah.

²²Tapi barang piwarangan nepi ka panjara, rasul-rasul teh geus teu araya, tuluy diunjukkeun ka Mahkamah,

²³”Pangberokan teh kasampak ku abdi-abdi ngonci pageuh keneh, nu jaraga narangtung payuneun panto, nanging barang pantona dibuka di lebet parantos teu aya saha-saha!”

²⁴Imam-imam kapala jeung kapala pangawal Bait Allah kacida karageteunana, teu ngalartieun ku rasul-rasul pang kajadian kitu.

²⁵Tuluy aya anu unjukan, ”Jalmi-jalmi anu diberok teh parantos aya di Bait Allah nuju ngawulang!”

²⁶Kapala pangawal indit jeung bawahanana ngala rasul-rasul. Tapi teu wanieun keras-keras sieuneun dibaledogan ku batu ku jalma-jalma.

²⁷Rasul-rasul dideuheuskeun ka Mahkamah. Ku Imam Agung dipariksa.

²⁸Saurna, ”Maraneh geus dilarang keras teu meunang ngajar mawa ngaran eta jelema! Tapi kumaha? Angger bae ngaliarkeun pangajaran kitu di sakuliah Yerusalem, rek neumbleuhkeun ka pihak kami perkara paehna eta jelema!”

²⁹Waler Petrus sarencang-rencang, ”Sim kuring sadaya ngaraos wajib tunduk ka Allah ti batan ka manusa.

³⁰Allahna karuhun urang parantos ngahirupkeun deui Yesus anu ditelasan ku Juragan-juragan, dipaku dina kayu salib.

³¹Anjeunna ku Allah parantos dijungjung, dijenengkeun Pamingpin sareng Jurusalamet, baris mingpin urang Israil kana pertobat supados kenging panghampura dosa.

³²Eta sagala perkawis teh sim kuring sadaya saksina, sareng Roh Suci anu ku Allah dikurniakeun ka unggal jalmi anu anut ka Yesus.”

³³Sakumna anggota Mahkamah kacida geregeteunana, meh bae rasul-rasul teh diparaehan.

³⁴Tapi aya hiji urang Parisi guru agama, anu kacida dihormat-hormatna ku sakumna rahayat, jenenganana Gamaliel. Anjeunna ngadeg, mundut ka sidang supaya rasul-rasul dikaluarkeun heula.

³⁵Geus kitu anjeunna nyarios, ”Para saderek, urang Israil! Sing sabar mutus perkarana eta jalmi-jalmi teh.

³⁶Tangtos para saderek aremut keneh ka Teodas, anu ngaku-ngaku jadi jelema luar biasa dugi ka gaduh panganut kinten-kinten opat ratus urang, nanging tungtungna dipaehan, para panganutna bubar, gerakanana kubra.

³⁷Saparantos eta, waktos di urang aya cacah jiwa, jol deui Yudas urang Galilea, anu tiasa ngicuk-ngicuk rahayat seueur pisan; nanging eta oge tungtungna dipaehan, para panganutna bubar.

³⁸Nyonto kana eta kajadian, sim kuring seja ngahaturanan nasehat, sawios eta jalmi-jalmi teh ulah dikieu-kieu. Upami paniatan atanapi gerakanana teh timbulna tina cita-cita manusa tangtos gagal.

³⁹Sawangsulna upami leres kalayan kersaning Allah, mustahil tiasa dibasmi, malah ahirna urang sorangan anu ngalawan ka Allah!” Nasehat Gamaliel ku Mahkamah katarima.

⁴⁰Rasul-rasul disalaur deui, sarta sanggeus dirangket jeung diancam teu meunang nyebut-nyebut deui jenengan Yesus, tuluy dibebaskeun.

⁴¹Rasul-rasul kalaluar ti Mahkamah, kalayan senang manah dumeh ngaraos geus dilayakkeun ku Allah kenging panghina ku karana jenengan Yesus.

⁴²Aranjeunna saban-saban poe teu eureun-eureun ngawuruk, boh di Bait Allah boh di imah somah-somah, ngawawarkeun Injil Kasalametan hal Yesus Jurusalamet.