Read Boros Dusun RASUL-RASUL 8 Bible Online

RASUL-RASUL 8 - Boros Dusun bible

RASUL-RASUL 8

¹Saulus kacida panujueunana kana eta rajapati teh. Poe eta keneh gareja di Yerusalem mimiti dikaniaya bengis pisan. Anu palercaya ka Yesus jadi paburencay ka sakuliah Yudea jeung Samaria, ngan rasul-rasul anu kumpul keneh teh.

²Layon Stepanus dikurebkeun ku jalma-jalma anu sarieun ku Allah sarta kacida dicaleungceurikanana.

³Ari Saulus jadi terus ihtiar pikeun numpes gareja, ngadatangan imah-imah sarta nyeredan jalma-jalma awewe lalaki ti jero imah, tuluy diasup-asupkeun ka jero panjara.

⁴Tapi para panganut Yesus anu geus paburencay teh di mana-mana nguarkeun Injil Kasalametan.

⁵Ari Pilipus nguarkeunana hal Jurusalamet teh di hiji kota penting di Samaria.

⁶Urang dinya saregep pisan kana wawaran Pilipus, komo barang narenjo mujijat-mujijatna mah.

⁷Roh-roh jahat kalaluar tingjarerit ti jelema-jelema anu diasupanana, nu lalumpuh, nu dareog, dicalageurkeun,

⁸estu matak bungah urang dinya.

⁹Di eta kota aya hiji jelema ngaranna Simon, nyebut maneh jelema pinunjul, geus lila pada mikaserab lantaran bisaeun elmu sihir.

¹⁰Jelema-jelema ti saban lapisan kacida mupunjungna, nyarebutna ge, ”Anjeunna teh kakuatan Allah anu kawentarkeun ʼKakawasaan Pinunjulʼ.”

¹¹Geus lila urang dinya kapangaruhan ku elmu sihirna.

¹²Tapi sanggeus ku Pilipus diuaran Injil Kasalametan hal Karajaan Allah jeung hal Yesus Kristus mah tuluy palercayaeun kana wawaran anjeunna, nepi ka dibaraptis awewe lalaki.

¹³Simon oge percayaeun, sarta sanggeusna dibaptis teu daekeun jauh ti Pilipus, ngarasa helok ku mujijat-mujijatna.

¹⁴Rasul-rasul di Yerusalem ngadarangu warta yen urang Samaria geus daraekeun narima pangandika Allah, tuluy ngutus Petrus jeung Yohanes.

¹⁵Sasumpingna ka Samaria aranjeunna terus mangnedakeun sakur anu geus palercaya supaya dipaparinan Roh Suci,

¹⁶sabab saurang ge can aya anu nampa Roh Suci, kakara dibaraptis kalawan pajenengan Yesus.

¹⁷Sanggeus ku Petrus jeung Yohanes ditarumpangan panangan, seug bae narampa Roh Suci.

¹⁸Nenjo jelema-jelema anu palercaya narampa Roh Suci ku ditumpangan leungeun, Simon ngahaturanan duit ka Petrus jeung Yohanes,

¹⁹bari piunjukna, ”Abdi oge hoyong gaduh kawasa kitu, supados anu ditumpangan leungeun ku abdi tiasa nampi Roh Suci.”

²⁰Tapi waler Petrus, ”Laʼnat eta duit teh, kitu deui anjeun, boga sangka kurnia ti Allah bisa dibeuli ku duit!

²¹Anjeun teu meunang milu barang gawe jeung kaula, sabab hate anjeun serong ti Allah.

²²Buru-buru tobat, piceun eta pikiran goreng teh. Geura sasambat menta hampura ka Pangeran, lantaran geus boga pikiran anu sakitu nistana.

²³Sabab katilikna ku kaula anjeun teh pinuh ku kasirik, jadi budakna dosa.”

²⁴Simon ngalengis ka Petrus jeung Yohanes, ”Abdi nyuhunkeun dipangnedakeun ka Pangeran, mugi perkawis anu bieu disaurkeun ku anjeun teh ulah kantos tumiba.”

²⁵Sanggeus maparin panyaksi hal Yesus Kristus jeung ngawulangkeun pangandika Gusti, Petrus jeung Yohanes marulih deui ka Yerusalem, bari nguarkeun Injil Kasalametan ti Allah di kampung-kampung Samaria anu kaliwatan.

²⁶Aya hiji malaikat anu ngalahir ka Pilipus, ”Buru-buru geura leumpang ka beulah kidul, teang jalan anu ti Yerusalem ka Gasa.” (Eta jalan geus tara dipake.)

²⁷Pilipus geuwat angkat. Di eta jalan aya hiji pajabat luhur urang Etiopia, anu ngurus harta kakayaan Sri Kandasi ratu nagri Etiopia, tas ti Yerusalem ngalakonan ibadah. Eta pajabat tunggang kareta seja mulih ka nagarana, sajajalan ngaos Kitab Nabi Yesaya.

²⁹Saur Roh Suci ka Pilipus, ”Sampeurkeun itu kareta, deukeutan terus!”

³⁰Pilipus lumpat ngudag kareta; sanggeus deukeut kadangueun eta pajabat keur ngaos kitab Nabi Yesaya, tuluy ditaros, ”Kahartos aosanana, Juragan?”

³¹”Bade kahartos kumaha, teu aya anu nerangkeunana,” walerna bari ngahaturanan Pilipus naek kana karetana.

³²Anu keur diaosna teh bagian ieu, ”Ibarat domba ditungtun arek dipeuncit, ibarat anak domba keur diguntingan buluna, teu disada-sada, Anjeunna sakecap teu kedal saur.

³³Dihina-hina, teu kenging kaadilan. Nyawa-Na dicabut ti alam dunya, nepi ka teu aya anu bisa nyaritakeun turunana-Na.”

³⁴Saur eta pajabat, ”Hoyong terang, saha anu dicarioskeun ku nabi teh, salirana ku anjeun atanapi jalmi sanes?”

³⁵Pilipus nerangkeun hal Yesus Kristus mimiti tina ayat eta.

³⁶Kareta majuna geus nepi ka hiji tempat nu aya cai di hiji pupudunan. ”Kaleresan aya cai,” saur eta pajabat, ”kumaha Juragan teu kaabotan upami sim kuring dibaptis?” [

³⁷Waler Pilipus, ”Atuh mangga upami leres-leres percanten mah.” ”Kantenan percanten pisan, Yesus Kristus teh Putra Allah,” saur eta pajabat.]

³⁸Kareta dipiwarang eureun, eta pajabat jeung Pilipus lalungsur, terus alancrub ka cai, eta pajabat dibaptis.

³⁹Barang hanjat ti cai, Pilipus gaib tina paningali eta pajabat, dicandak ku Roh Allah. Eta pajabat ngalajengkeun perjalanan dipirig ku manah anu suka.

⁴⁰Ari Pilipus terang-terang geus aya di Asdod, ti dinya terus ka Kesarea bari nguarkeun Injil Kasalametan ti Allah di saban kota anu kalangkungan.