Read Boros Dusun HAKIM-HAKIM 4 Bible Online

HAKIM-HAKIM 4 - Boros Dusun bible

HAKIM-HAKIM 4

¹Sanggeus Ehud pupus, urang Israil doraka deui ka PANGERAN.

²Seug ku PANGERAN diselehkeun ka Yabin, raja Kanaan anu marentahna di kota Hasor. Panglima perangna ngaranna Sisera, cicingna di Haroset Hagoyim.

³Yabin kagungan salapan ratus kareta perang tina beusi. Marentahna ka urang Israil dua puluh taun, kacida kerasna jeung bengisna. Urang Israil sasambat menta tulung ka PANGERAN.

⁴Harita anu ngurus urang Israil teh hiji nabi istri jenengan Debora, istrina Lapidot.

⁵Anjeunna biasa sok calik di handapeun hiji tangkal korma, antara Ramah jeung Betel di kota pagunungan Epraim. Urang Israil sok daratang ka anjeunna menta bongbolongan.

⁶Dina hiji poe anjeunna miwarang sumping ka Barak bin Abinoam ti kota Kedes, wewengkon Naptali. Saur Debora ka anjeunna, ”Ieu aya timbalan ti PANGERAN, Allah Israil pikeun anjeun kieu, ʼKumpulkeun 10.000 urang jalma lalaki ti kaom Naptali jeung Sebulun, bawa ka Gunung Tabor.

⁷Engke Sisera, panglima angkatan perang Yabin, ku Kami rek disina datang jeung sabaladna katut kareta-kareta perangna, rek merangan ka maneh di Walungan Kison. Tapi maneh ku Kami baris dibere kaunggulan dina eta perang.ʼ ”

⁸Barak ngawalon, ”Upami miosna sareng Ibu, mangga. Upami teu sareng Ibu mah moal mios.”

⁹Waler Debora, ”Heug dibarengan ku Ibu. Tapi ari kitu mah hidep moal aya kasebutna, lantaran Sisera teh ku PANGERAN baris diselehkeun ka leungeun hiji awewe.” Ti dinya Debora jengkar ka Kedes, nyarengan Barak.

¹⁰Barak ngumpulkeun jelema ti kaom Sebulun jeung Naptali, tuluy maju ka Kedes diiring ku 10.000 urang, disarengan ku Debora.

¹¹Kocap Heber urang Keni turunan Hobab dahuan Musa tea, harita geus ngadegkeun kemah deukeut hiji tangkal kiara di Saanaim, misahkeun maneh ti urang Keni lianna.

¹²Sisera geus nyahoeun yen aya Barak unggah ka Gunung Tabor,

¹³geuwat ngumpulkeun balad katut kareta perangna anu salapan ratus, terus dikeprak ti Haroset Hagoyim ka Walungan Kison.

¹⁴Ari saur Debora ka Barak, ”Maju! PANGERAN anu mingpin hidep. Poe ieu Sisera baris taluk ka hidep.” Barak jeung sapuluh rebu perjuritna turun ti Gunung Tabor.

¹⁵Ari Sisera sabaladna kitu deui barisan karetana, barang breg diambreg ku balad Barak teh ku PANGERAN sina jadi pabaliut teu paruguh. Sisera ngajleng tina karetana, tuluy ngabecir kabur.

¹⁶Balad jeung barisan karetana, ku Barak diobrot nepi ka Haroset Hagoyim, di dinya balad Sisera beak ditumpes taya nu ngari.

¹⁷Ari Sisera kaburna muru ka pakemahan Yael, bojo Heber urang Keni tea, dumeh kulawarga Heber hirupna akur jeung Raja Yabin ti Hasor.

¹⁸Yael norojol mapagkeun Sisera bari ngahaturanan linggih, pokna, ”Mangga Juragan, lebet. Teu kedah asa-asa.” Sisera asup, ku Yael dititah nyumput tukangeun reregan.

¹⁹Sisera ngomong, ”Cik kami menta cai, hayang nginum.” Ku Yael diasongan cisusu, regot diinum, tuluy sina nyumput deui.

²⁰Ceuk Sisera ka Yael, ”Maneh tunggu di lawang. Mun aya nu mapaykeun, bejakeun euweuh sasaha.”

²¹Ku bawaning cape, reup Sisera sare tibra pisan. Yael nyokot palu jeung pancuh kemah, tuluy nyampeurkeun Sisera ati-ati pisan. Jebrod palipisan Sisera dipaseuk ku talutug kemah, dipancuhkeun kana taneuh.

²²Ti dinya Barak ngarongheap seja milarian Sisera. Yael norojol mapagkeun bari haturan, ”Tingali geura, jalmi anu dipilarian ku Juragan tea.” Anjeunna asup ka jero kemah jeung Yael, kasampak Sisera ngajoprak dina taneuh geus teu nyawaan, palipisanana dipaseuk ku pancuh kemah.

²³Poe eta PANGERAN maparin kaunggulan ka urang Israil. Yabin raja Kanaan teh kasoran.

²⁴Ku urang Israil hantem dibeberik nepi ka ahirna binasa.