Read Boros Dusun HAKIM-HAKIM 5 Bible Online

HAKIM-HAKIM 5 - Boros Dusun bible

HAKIM-HAKIM 5

¹Poe eta Debora jeung Barak bin Abinoam ngawihkeun ieu kidung:

²Puji PANGERAN! Urang Israil geus milih jurit, rahayat bungah, rampak maju andon suka.

³He raja-raja, darengekeun! He para kapala, raregepkeun! Kami rek ngawih jeung nabeuh bade ka lenggah Allah Israil, PANGERAN.

⁴Nun PANGERAN, nalika Gusti jengkar ti pagunungan Seir, majeng nilarkeun wewengkon Edom, bumi genjlong, der hujan turun ti langit, ngagurujug tina mega.

⁵Gunung-gunung araringgeung, payuneun Gustining Sinai payuneun PANGERAN Allahna Israil.

⁶Keur jaman Samgar bin Anat, keur jaman Yael, ieu tanah tara disorang deui ku kapilah, nu lalumaku jalanna ka pasisian.

⁷Kota-kota di Israil eusina suwung, Debora! Parongpong karosong. Ti dinya jol anjeun sumping, lir indung pikeun Israil.

⁸Der di dinya aya perang, dumeh Israil nyembah ka allah nu anyar. Ti antara opat puluh rebu urang Israil, na aya nu maju, top kana tameng atawa top kana tumbak?

⁹Hate kuring tibelat ka para panglima Israil, kagagas ku rahayat anu maju andon suka. Puji PANGERAN!

¹⁰Pek hal eta caritakeun ku aranjeun, he anu tarumpak kalde bodas, he anu dariuk dina sela, he aranjeun, nu tuman leumpang badarat!

¹¹Tah dengekeun, jalma-jalma galecok deukeut tampian-tampian, nyaritakeun kaunggulan PANGERAN, nya kaunggulan-kaunggulan rahayat Israil! Ti dinya umat PANGERAN budal ti kota-kotana.

¹²Pingpin, Debora, pingpin! Pingpin! Kawihkeun kidung! Pingpin! Maju, Barak bin Ahinoam, maju giringkeun para tawanan anjeun!

¹³Jalma-jalma anu saratia daratang ka pamingpin-pamingpinna. Umat Allah dararatang ka Anjeunna, tararandang seja perang.

¹⁴Daratangna ti Epraim, marudun ka lebak, nuturkeun kaom Binyamin, nu geus ngerid rahayatna. Tuh deui para panglima, daratang ti Makir, sarta para perwira, geus murubul ti Sebulun.

¹⁵Para kokojo kaom Isaskar daratangna jeung Debora. Enya, Isaskar, kitu deui Barak, seug ditaluturkeun, marudun ka lebak. Tapi kaom Rubin mah ngarancabang antara milu jeung moal.

¹⁶Anggur ngajarentul tukangeun domba-dombana. Naha arek ngadon ngadengekeun sora pangangon nyalukan domba-dombana? Enya kaom Rubin teh ngarancabang antara milu jeung moal.

¹⁷Kaom Gad ge jongjon bae di peuntas wetan Walungan Yordan. Kaom Dan ukur ngawaskeun ti kapal. Kaom Aser jongjon bae di basisir, tingjarentul sisi laut.

¹⁸Teu cara kaom Sebulun, teu cara kaom Naptali, ieu mah tararega kana pati, tarandang di medan perang.

¹⁹Di Taanak, sisi Walungan Megido, raja-raja rame tarung, raja-raja Kanaan tarurun perang, parandene taya anu ngarampas barang perak.

²⁰Di langit, bentang-bentang milu perang, tingjorelat di awang-awang merangan Sisera.

²¹Musuh beresih, palid ku banjir Walungan Kison, walungan anu biasana leuleuy. Kami baris maju terus, maju kalawan gagah perkosa!

²²Sora lumpatna kuda tingberetek, talapokna nejehan taneuh.

²³”Sumpahan Meros,” lahiran malaikat PANGERAN, ”sumpahan jelema-jelemana, lantaran taya nu datang ngabantu PANGERAN, henteu jaradi perjurit, teu milu tarung ngabantu Mantenna.”

²⁴Yael, wanita nu pangbagjana. Eta bojo Heber bangsa Keni, wanita pangeusi kemah nu pangbagjana.

²⁵Sisera menta cai, ana sok cisusu, susu kekentelna, dina pinggan anu endah.

²⁶Leungeunna nu sabeulah ceg kana pancuh kemah, sabeulah deui ceg kana palu. Jebrod sirah Sisera dipancuh, palebah palipisanana.

²⁷Bru Sisera ngarumpuyuk, ngarempeyek dina suku Yael, di dinya ngarumpuyukna, nya di dinya ngajoprakna, paeh henteu obah deui.

²⁸Indung Sisera ngalelengo, ngalong ti tukangeun sarigsig jandela, bari pokna, ”Naha si ujang karetana acan datang, kudana acan aya rentang-rentang?”

²⁹Dijawab ku inang nu pangpinterna, manehna oge ngalilipur maneh, mani pok deui, pok deui,

³⁰”Panginten nuju babagi, babagi heula barang jarahan, keur babagi mojang ka para perjurit, anu hiji, anu dua. Keur Sisera, anggoan nu arendah, kaen songket keur anggoeun prameswari.”

³¹Mugi sadaya musuh Gamparan, paehna sing cara kitu, nun PANGERAN. Mugi sadaya mitra Gamparan, maloncorong lir ibarat surya medal! Geus kitu tanah Israil teh kerta, opat puluh taun lilana.