Read Boros Dusun HAKIM-HAKIM 9 Bible Online

HAKIM-HAKIM 9 - Boros Dusun bible

HAKIM-HAKIM 9

¹Abimelek putra Gidion, nepangan wargi-wargi ibuna di Sekem,

²mundut dipangnepikeun kasauranana anu kieu ka urang Sekem, ”Ari aranjeun naha mending diparentah ku sakabeh anak Gidion anu tujuh puluh, atawa ku saurang bae? Sing inget, Abimelek teh getih daging aranjeun sorangan.”

³Kasauranana kitu ku wargi-wargi ibuna ditepikeun. Seug urang Sekem rempug milih Abimelek, dumeh ka baraya.

⁴Abimelek ku maranehanana dibahanan duit tujuh puluh gebleg perak, beunang nyokot ti pura Baal Berit. Eta duit ku anjeunna dianggo nyewa jalma-jalma jahat dibawa sakait.

⁵Ti dinya anjeunna angkat ka bumi ramana di Opra. Saderek-saderekna anu tujuh puluh, putra-putra Gidion, ku anjeunna dipeuncitan hiji-hiji di dinya, dina hiji batu. Tapi aya saurang anu lolos, nya eta Yotam putra Gidion anu bungsu, lantaran nyumput.

⁶Geus kitu urang Sekem jeung urang Bet Milo kumpul di Sekem, handapeun tangkal kiara karamat, rek ngangkat Abimelek jadi rajana.

⁷Sanggeus hal eta kadangu ku Yotam, anjeunna unggah ka Gunung Gerisim, ngagero kieu ka maranehna ti puncak, ”Eh urang Sekem, darengekeun ieu kuring, sarta muga-muga aranjeun oge didangu ku Allah!

⁸Sakali mangsa tatangkalan baradami arek milih pirajaeunana. Pok marenta ka tangkal jetun, ʼAnjeun bae jadi raja.ʼ

⁹Tangkal jetun ngajawab, ʼAri kudu marentah ka aranjeun mah kuring teh kudu eureun ngabijilkeun minyak, heug eta teh paranti ngahormat dewa-dewa jeung manusa.ʼ

¹⁰Ti dinya tatangkalan teh marenta ka tangkal kondang, ʼAnjeun bae jadi raja.ʼ

¹¹Jawab tangkal kondang, ʼAri kudu marentah ka aranjeun mah kuring teh kudu eureun bubuah, heug buah kuring teh kacida amisna.ʼ

¹²Tuluy tatangkalan teh marenta ka tangkal anggur, ʼAnjeun bae jadi raja.ʼ

¹³Jawab tangkal anggur, ʼAri kudu marentah ka aranjeun mah kuring teh kudu eureun bubuah, heug eta teh paranti ngagumbirakeun dewa-dewa jeung manusa.ʼ

¹⁴Ku sabab kitu tatangkalan teh marenta ka rungkun cucuk, ʼAnjeun atuh jadi raja.ʼ

¹⁵Jawab rungkun cucuk, ʼHeug! Ari enya-enya mah hayang dirajaan ku kami. Pek geura ngariuhan di handapeun iuh-iuh kami. Tapi awas lamun henteu enya-enya, ieu regang-regang kami anu pinuh ku cucuk baris ngabijilkeun seuneu, terus ngahuru leuweung kiputri di Libanon.ʼ ”

¹⁶”Ayeuna,” saur Yotam deui, ”naha enya aranjeun milih Abimelek jadi raja teh kalawan maksud anu jujur tur hade? Seja ngahargaan kana jasa-jasa Gidion, seja narima kulawargina sakumaha layakna, satimbang jeung jasa-jasa Gidion?

¹⁷Sing inget, bapa kuring geus tarung kalawan nekad ngabelaan aranjeun, geus bibilasan naruhkeun nyawa keur ngajait aranjeun ti urang Midian.

¹⁸Kari-kari poe ieu aranjeun malik ngamusuh ka kulawarga bapa kuring. Tujuh puluh putrana ku aranjeun dipeuncitan hiji-hiji dina luhur batu anu eta-eta keneh, anu sahiji! Eta anak selir bapa kuring anu ngaran Abimelek, ku aranjeun dijieun raja di Sekem, pedah baraya!

¹⁹Lamun enya tea mah poe ieu aranjeun boga tekad anu lempeng sarta jujur ka Gidion jeung ka kulawargana, heug masing bagja boga raja Abimelek, kitu deui Abimelek masing senang ngarajaanana ka aranjeun.

²⁰Tapi lamun henteu kitu muga-muga ti Abimelek sing bijil seuneu anu ngahuru ka aranjeun urang Sekem jeung urang Bet Milo, sarta muga-muga ti urang Sekem jeung urang Bet Milo masing bijil seuneu nu ngaduruk Abimelek nepi ka beakna.”

²¹Geus kitu, ku bawaning sieun ka Abimelek saderekna, Yotam terus kabur ka Beer, sarta calik di dinya saterusna.

²²Ari Abimelek marentahna ka urang Israil meunang tilu taun.

²³Ku kersaning Allah, Abimelek jeung urang Sekem jadi silih satru, urang Sekem barontak ka anjeunna.

²⁴Kitu kajadianana, kajahatan Abimelek jeung urang Sekem anu ngabantu anjeunna meuncitan tujuh puluh putra-putra Gidion, ayeuna meunang wawales.

²⁵Urang Sekem nyieun tempat pamegatan di puncak-puncak gunung, pikeun nangkep Abimelek. Sakur anu ngaliwat ka dinya ku maranehna dirampog. Hal ieu geus diunjukkeun ka Abimelek.

²⁶Geus kitu ka Sekem aya anu daratang, Gaal bin Ebed jeung dulur-dulurna, sarta maranehna dipercaya ku urang Sekem.

²⁷Maranehanana arasup ka kebon anggur urang Sekem, mupu buahna tuluy diperes diparake sukan-sukan. Los deui ka kuil dewa urang dinya, ngadon dalahar, ngarinum bari susumbar ngahina ka Abimelek.

²⁸Kieu ceuk Gaal, ”Urang di Sekem teh jadi naon? Na make kudu ngabdi ka Abimelek? Saha saenyana eta jelema teh? Anak Gidion! Ari Sebul wakilna di dieu, ngawula ka dinya. Urang mah keur naon ngawula ka dinya? Rek ngawula mah ka Hemor karuhun urang, anu ngarundaykeun kaom aranjeun!

²⁹Coba lamun kuring anu jadi kapala di dieu, eta si Abimelek teh moal teu disingkahkeun! Rek kieu kuring ngomong teh ka manehna, ʼPek pepekan deui balad maneh, urang tarung, urang ngadu kakuatan!ʼ ”

³⁰Sebul, kapala pamarentah kota eta, ngadenge ucap-ucapan Gaal kitu teh hatena ngentab.

³¹Tuluy ngirim utusan ka Abimelek anu calikna di Aruma, mawa pesen kieu, ”Aya jalmi arasup ka Sekem, Gaal bin Ebed sareng dulur-dulurna, ngangsonan jalmi-jalmi sina ngalawan ka anjeun.

³²Anjeun engke wengi kedah jengkar sareng perjurit, lajeng ngintip di tegal.

³³Enjingna wanci meletek srangenge kedah ngadadak nyerang kota. Upami Gaal sabaladna kaluar ngayonan, gempur sakiat tanaga.”

³⁴Seug Abimelek sabaladna jengkar peuting-peuting, tuluy ngintip di luareun Sekem. Baladna dibagi opat bagian.

³⁵Barang katembong Gaal kaluar sarta ngajanteng di lawang kota, balad Abimelek carengkat tina panyumputanana.

³⁶Katenjoeun ku Gaal, pok manehna ngomong ka Sebul, ”Tenjo! Itu loba jelema tarurun ti puncak gunung.” Walon Sebul, ”Eta mah lain jelema, kalangkang gunung-gunung.”

³⁷Gaal pok deui, ”Tenjo! Itu loba jelema tarurun ti poponclot gunung. Itu sabubuhan deui turut-turut jalan ka dieukeun ti lebah tangkal kiara paranti tukang-tukang torah!”

³⁸Ari ceuk Sebul, ”Mana buktina omongan anjeun anu sakitu suabanana teh? Kapan ceuk anjeun keneh, keur naon urang make kudu ngawula ka eta jelema anu ngaran Abimelek. Tuh itu teh balad manehanana, anu ku anjeun ditangtang tea. Papag ka ditu, ayonan!”

³⁹Tuluy Gaal ngapalaan urang Sekem ngayonan Abimelek.

⁴⁰Gaal kabur, tapi ku Abimelek diudag. Geus loba baladna anu tararatu, kitu deui anu di lawang kota.

⁴¹Abimelek terus calik deui di Aruma. Ari Gaal sadulur-dulur geus teu bisa ngancik deui di Sekem, ditundung ku Sebul.

⁴²Poe isukna, kauninga ku Abimelek yen urang Sekem rek ka taregal.

⁴³Seug anjeunna ngumpulkeun balad, dibagi tilu bagian sina ngarintip di tegal. Barang urang dinya kalaluar ti jero kota, anjeunna bijil ti panyumputan rek mimiti ngagempur.

⁴⁴Sabot Abimelek jeung baladna maju gagancangan rek megat di lawang kota, anu dua pasukan deui narajang ka nu geus araya di tegal. Anu ditarajang beak dipaehan kabeh.

⁴⁵Sanggeus tarung sapoe jeput, eta kota geus beunang ku Abimelek, jelema-jelemana dipaehan, kotana diacak-acak tuluy diawuran ku uyah.

⁴⁶Barang pamingpin-pamingpin di benteng Sekem ngadarenge hal eta, tuluy marubus nyiar pisalameteun ka guha anu aya di jero pura Baal Berit.

⁴⁷Abimelek geus dibejaan yen maranehanana kumpul di dinya.

⁴⁸Seug anjeunna nanjak ka Gunung Salmon jeung baladna. Anjeunna nyandak kampak nutuh dahan kai tuluy dipanggul. Baladna oge diparentah sina buru-buru nutuh dahan kai cara anjeunna.

⁴⁹Tiap perjurit nutuhan dahan kai, tuluy naluturkeun ka Abimelek. Kai teh dibegbregkeun dina liang guha nu keur diparake nyumput, tuluy dihuru. Nu aya di jero, anu lobana kira-kira sarebu urang, lalaki jeung awewe, kabeh paraeh.

⁵⁰Ti dinya Abimelek ngepung kota Tebes, sarta tuluy ditalukkeun.

⁵¹Di eta kota aya hiji munara kacida wewegna. Pangeusi kota eta, lalaki, awewe, katut para pamingpinna lalumpatan ka dinya, tuluy ngonci maneh di jero, naraek ka tempat nu pangluhurna.

⁵²Barang datang ka dinya arek ngagempur eta munara, Abimelek nanjak ngadeukeutan pantona, maksudna eta panto rek dihuru.

⁵³Tapi ti luhur munara aya awewe ngaragragkeun batu panggilingan, ninggang kana sirahna nepi ka rengat.

⁵⁴Geuwat anjeunna nyaur budak ngora purah mawa pakarang anjeunna, pok marentah, ”Cabut eta pedang, sabetkeun ka kami. Kami embung kasebutkeun paeh ku awewe.” Seug budak ngora teh narajang ka anjeunna, seug anjeunna maot.

⁵⁵Sanggeus kanyahoan Abimelek maot, urang Israil baralik ka imah-imahna.

⁵⁶Ku jalan kitu Allah ngabales kajahatan Abimelek anu geus hianat ka ramana, meuncitan saderek-saderekna anu tujuh puluh tea.

⁵⁷Kitu deui kajahatan urang Sekem ku Allah dibales. Maranehna jadi salangsara, cocog jeung ucapan Yotam putra Gidion waktu nyumpahan ka maranehanana.