Read Boros Dusun 1 SAMUEL 10 Bible Online

1 SAMUEL 10 - Boros Dusun bible

1 SAMUEL 10

¹Ti dinya Samuel ngaluarkeun buli-buli minyak jetun, minyakna dikucurkeun kana sirah Saul. Geus kitu anjeunna nyium ka Saul sarta ngalahir, ”Hidep ku PANGERAN dilisahan, dijenengkeun pikeun ngatur umat-Na urang Israil. Atur ku hidep, jaga ti musuh-musuhna. Tandana yen hidep dianggo ku PANGERAN jadi raja umat-Na teh kieu:

²Sanggeus hidep poe ieu pisah ti Bapa, engke di Selsah wewengkon Binyamin, deukeut makam Rahel, hidep bakal amprok jeung dua jelema anu rek pupulih ka hidep yen kalde nu keur diteangan teh geus kapanggih. Bapa hidep geus teteg manahna, kari melangna ka hidep mani pok deui, pok deui nataroskeun, ’Ka mana kudu diteangna atuh si ujang teh?’

³Ti dinya hidep kudu terus leumpang nepi ka tangkal karamat di Tabor. Di dinya bakal papanggih jeung tilu jelema anu rek ka Betel rek babakti ka Allah. Nu saurang nungtun tilu anak embe, nu saurang mawa roti tilu siki, nu saurang deui mawa cai anggur sawadah pinuh.

⁴Bakal nyalaman ka hidep jeung nawaran roti dua siki. Tarima!

⁵Ti dinya kudu terus ka Pasir Allah di Gibea, anu keur dipake masanggrahan ku urang Pelisti. Di lawang kota bakal pasanggrog jeung rombongan nabi anu keur marudun tas ngurban di luhur pasir, narabeuh kacapi, terebang, suling, jeung gambus, bari ngarigel jeung tinghaleuang.

⁶Sabot kitu hidep bakal katungtun ku Roh PANGERAN, jadi beda ti biasa, tuluy milu ngigel jeung ngahaleuang.

⁷Upama eta ciri-ciri enggeus bukti, turutkeun sagala tungtunan Allah.

⁸Hidep kudu miheulaan Bapa ka Gilgal, engke ku Bapa ditepungan di ditu, urang nyanggakeun kurban beuleuman jeung kurban karapihan. Dago bae di dinya tujuh poe nepi ka Bapa datang nuduhan pilakueun hidep.”

⁹Barang Saul malik ti Samuel neruskeun laku, ku kersaning Allah jadi asa salin jinis. Jeung ciri-ciri anu dilahirkeun ku Samuel tea poe eta kajadian.

¹⁰Jol ka Gibea, Saul jeung gandekna pasanggrog jeung rombongan nabi. Ku kersaning Roh Allah Saul ujug-ujug milu ngigel jeung ngahaleuang marengan eta nabi-nabi.

¹¹Urang dinya anu geus warawuheun ka Saul, narenjo Saul ngigel teh jadi tingtaranya, pokna, ”Keur naon eta anak Bapa Kis teh? Geus jadi nabi, kitu?”

¹²Ceuk nu saurang, ”Ari eta nabi-nabi anu loba, coba saha bapana?” Ti semet harita di dinya jadi aya kacapangan kieu, ”Kutan Saul oge jadi nabi?”

¹³Eureun ngigel jeung hahaleuangan Saul terus ka tempat babakti di luhur pasir.

¹⁴Pamanna nenjoeun ka Saul jeung gandekna, tuluy nanya, ”Tas ti marana?” Ceuk Saul, ”Tas milarian kalde leungit. Mung ku margi henteu kapendak, lajeng ka Bapa Samuel.”

¹⁵”Kumaha saurna?” ceuk pamanna.

¹⁶Jawab Saul, ”Saurna kalde parantos kapendak.” Ari pilahir Samuel perkara anjeunna bakal jadi raja mah disidem bae.

¹⁷Jalma-jalma ku Samuel dipiwarang kumpul di Mispa pikeun kumpulan ngabakti.

¹⁸Pilahirna, ”Kieu timbalan PANGERAN Allah Israil, ’Maraneh ku Kami dicandak ti Mesir, disalametkeun ti urang Mesir jeung ti bangsa-bangsa lianna anu ngagencet ka maraneh.

¹⁹Kami teh Allah maraneh, anu nyalametkeun maraneh tina sagala kacilakaan jeung kasukeran. Tapi ayeuna maraneh ka Kami marenta raja, jadi Kami teh ditoker. Tapi kajeun. Geura karumpul payuneun PANGERAN, nurutkeun kaom jeung golongan masing-masing.’ ”

²⁰Geus kitu unggal kaom ku Samuel dipiwarang ngasrog ka hareup. Seug ku PANGERAN katujul kaom Binyamin.

²¹Tuluy kulawarga-kulawarga ti kaom Binyamin sina maju ka hareup, tuluy katujul kulawarga Matri. Sanggeus kulawarga Matri ka hareup, anu katujul teh Saul bin Kis. Tapi barang ditareangan teh Saul teu aya di dinya.

²²Tuluy ditaroskeun ka PANGERAN, ”Dupi jalmina aya di dieu?” Waler PANGERAN, ”Saul keur nyumput di tukangeun barang-barang.”

²³Tuluy sawareh lalumpat neang, Saul tuluy dibawa ka hareupeun jalma rea. Ari beh kaciri jangkungna nyongcolang ti batur, nu sejen mah ngan semet taktakna.

²⁴Samuel ngalahir, ”Ieu anu ditujul ku PANGERAN teh! Di urang mah teu aya deui anu kawas anjeunna.” Ger jalma-jalma surak, pokna, ”Wilujeng raja!”

²⁵Ti dinya Samuel ngalahir ka jalma rea, ngadadar perkara hak jeung kawajiban raja, malah tuluy diseratkeun jadi kitab, anu saterusna disimpen di tempat suci. Geus kitu jelema-jelema dipiwarang marulang.

²⁶Saul oge mulih ka Gibea, disarengan ku sawatara urang jelema anu garagah, anu hatena digerakkeun ku Allah.

²⁷Tapi aya jelema-jelema anu bangkawarah ngaromong kieu, ”Mana bisa jelema kitu aya pigunaeunana keur urang?” Maranehna nganggap enteng ka Saul jeung teu mere hadiah naon-naon.