Read Boros Dusun 1 SAMUEL 16 Bible Online

1 SAMUEL 16 - Boros Dusun bible

1 SAMUEL 16

¹PANGERAN nimbalan ka Samuel, ”Arek sabaraha lila deui maneh kanyenyerian ku Saul teh? Eta ku Kami geus dipiceun, geus lain raja Israil deui. Maneh ayeuna kudu ka Betlehem, minyak jetun bawa. Tepungan jelema anu ngaran Isai. Anakna aya anu rek dijieun raja ku Kami.”

²Piunjuk Samuel, ”Kumaha tiasana? Upami kadangueun ku Saul tangtos abdi dipaehan.” Waler PANGERAN, ”Kudu mawa anak sapi hiji, sebutkeun ka ditu teh arek ngurban ka PANGERAN.

³Ondang Isai kana eta kurban, engke maneh ku Kami dibejaan kudu kumaha. Mana-mana anu ku Kami dituduhkeun engke, ku maneh minyakan.”

⁴Prak Samuel ngalampahkeun sapangandika PANGERAN, sarta geus sumping ka Betlehem. Para pamingpin di dinya kacida rareuwaseunana, tuluy daratang marunjungan, ”Dupi sumping teh nyandak salamet, Bapa juru tingal?”

⁵Walerna, ”Leres, Bapa ka dieu teh seja ngurban. Geura susuci, tuluy daratang kana kurban, urang ngariung jeung Bapa.” Kitu deui Isai jeung anak-anakna dipiwarang susuci sarta diondang ngariung.

⁶Sanggeus daratang, ret Samuel ningali ka anak Isai anu ngaran Eliab; panggalihna, ”Tangtu ieu, anu geus aya di payuneun PANGERAN anu ku Mantenna bakal dipilih teh.”

⁷Tapi dawuhan PANGERAN, ”Ulah nenjo kana dedegna, ulah ngareret kana kasepna. Eta mah teu kapake. Pamilih Kami teu sarua jeung pamilih jelema. Jalma mah nenjo luarna, Kami mah nilik eusina.”

⁸Isai nyalukan deui anakna anu ngaran Aminadab. Jol eta datang ka Samuel. Saur Samuel, ”Ieu oge teu kaanggo ku PANGERAN.”

⁹Isai ngadeuheuskeun Syama. Tapi saur Samuel, ”Ieu oge teu kamanah ku PANGERAN.”

¹⁰Geus tujuh anak Isai anu dideuheuskeun ka Samuel, tapi saur Samuel, ”Teu aya anu kamanah ku PANGERAN.”

¹¹Geus kitu Samuel mariksa, ”Aya deui anu sejen?” Jawab Isai, ”Aya, bungsuna, nuju ngangon domba.” Saur Samuel, ”Sina ka dieu. Samemeh eta datang moal waka prak ngariung.”

¹²Ku Isai dititah diteang, tuluy dideuheuskeun. Breh teh budak ngora nya kasep nya cangker, panonna cekas cureuleuk. PANGERAN nimbalan ka Samuel, ”Eta! Pek minyakan!”

¹³Samuel ngaluarkeun minyak jetun, Daud dilisahan kasaksian ku raka-rakana. Harita keneh Daud kasumpingan ku Roh PANGERAN, anu saterusna nyarengan salalawasna. Ti dinya Samuel mulih ka Ramah.

¹⁴Roh PANGERAN ti Saul geus undur, sarta Saul kaasupan hiji roh jahat ti PANGERAN anu sok nyiksa ka anjeunna.

¹⁵Mantri-mantrina arunjukan, ”Sang raja teh kasiksa ku roh jahat ti Allah.

¹⁶Mugi nimbalan milarian jalmi anu tiasa ngacapi. Sawaktos-waktos Gusti kasurupan ku eta roh jahat, kedah dipapalerkeun ku sora kacapi, tangtos damang deui.”

¹⁷Timbalan Saul, ”Heug kami pangneangankeun anu pinter ngacapi, bawa ka dieu.”

¹⁸Aya anu unjukan, ”Hatur uninga, di Betlehem aya anu pinter ngacapi, pecilna Isai. Kawuwuh gede wawanen sareng kasep, perjurit sajati, perceka, sareng disarengan ku PANGERAN.”

¹⁹Saul ngirim utusan diala ka Isai, pesenna, ”Anak maneh anu ngaran Daud purah ngangon domba kirimkeun ka kami.”

²⁰Daud ku Isai dijurungkeun, dibahanan anak embe hiji, kalde hiji, dipuatan roti jeung anggur sawadah keur kikintun ka Saul.

²¹Daud datang ka Saul sarta terus kumawula. Ku Saul kacida diasihna, diangkat jadi tukang mawa pakarangna.

²²Saul ngawartosan ka Isai, timbalanana, ”Kami resep ka Daud. Idinan cicing di dieu sina ngawulaan kami.”

²³Ti harita, unggal roh jahat tea nyiksa ka Saul, ku Daud dipangacapikeun, eta roh jahat sok terus nyingkah sarta Saul jadi ngaraos tengtrem jeung cenghar deui.