Read Boros Dusun 1 SAMUEL 21 Bible Online

1 SAMUEL 21 - Boros Dusun bible

1 SAMUEL 21

¹Daud angkatna ngabujeng ka Imam Ahimelek di Nob. Ahimelek hariweusweus kageteun, tuluy mapag jeung mariksa, ”Geuning nyalira bae?”

²Diwaler ku Daud, ”Nuju ngemban timbalan raja. Timbalanana ieu perkawis anu diemban teh ulah aya anu terangeun. Rerencangan mah dipiwarang ngarantosan di Anu.

³Manawi Bapa kagungan keur bekel? Roti lima siki atanapi naon bae anu aya.”

⁴Ceuk imam, ”Roti biasa mah teu gaduh, aya oge roti suci. Eta bae candak, kitu soteh upami hidep sareng rencang-rencang parantos nyegah anjeun ti istri.”

⁵Saur Daud, ”Kantenan! Sarengna deui sadayana oge pimanaeun ka istri! Bujeng-bujeng keur ngemban timbalan anu sakieu pentingna, keur ngemban perkawis anu biasa ge rerencangan sok susuci heula.”

⁶Tuluy roti suci teh ku imam diserenkeun ka Daud, da ngan eta anu aya, nya eta roti anu dipake ngahaturanan ka Allah. Ngan rotina geus diangkat tina meja suci, geus diganti ku nu anyar. (

⁷Poe eta di dinya kabeneran aya kapala tukang ngangon ingon-ingon Saul, ngaranna Doeg urang Edom, keur nedunan ibadahna.)

⁸Daud misaur deui ka Ahimelek, ”Manawi kagungan tumbak atanapi pedang keur cekeleun putra? Putra teu kabujeng ngabantun heula pakarang ka rorompok, margi ku raja ditimbalan rurusuhan.”

⁹Saur Ahimelek, ”Aya oge pedang Goliat urang Pelisti tea, anu ku hidep ditiwaskeun di Lebak Ela. Mung eta-etana. Ari diperyogikeun mah mangga bae, itu pungkureun epod dibungkus ku lawon.” Saur Daud, ”Leres eta bae. Pedang pangsae-saena eta teh di mana-mana oge.”

¹⁰Ti dinya Daud kebat angkatna nyingkahan Saul, ngabujeng ka Gat, ka Raja Akis.

¹¹Ponggawa-ponggawa Raja Akis unjukan ka rajana, pokna, ”Eta teh sanes Daud tea, raja di nagarana? Kapan eta anu ku awewe-awewe dipapag ku igel sareng kawih anu pokna, ’Saul maehan mangrebu-rebu, Daud maehan manglaksa-laksa.’ ”

¹²Eta omongan kacida matak salempangna ka Daud, sarta anjeunna kacida sieuneunana ku Raja Akis.

¹³Barang dilingkung arek ditangkep, anjeunna api-api jadi jelema owah, kuat-koet kana panto lawang kota bari ludahna sina ngacay kana rumbah.

¹⁴Saur Akis, ”Geuning nu gelo! Rek naon dibawa ka kami?

¹⁵Na kami teh kakurangan nu gelo make ditambahan ku ieu, kudu ngalalajoan eta si burung ngamuk di imah kami?”