Read Boros Dusun 1 SAMUEL 5 Bible Online

1 SAMUEL 5 - Boros Dusun bible

1 SAMUEL 5

¹Peti Perjangjian anu geus karampas ku urang Pelisti dibawa ti Eben Haeser ka Asdod, kota maranehna,

²diteundeun di kuil Dewa Dagon di gigireun eta brahala.

³Barang bray isuk kasampak arca Dagon teh nyuksruk kana taneuh, nyuuh hareupeun Peti Perjangjian. Seug eta arca teh ditangtungkeun deui dina tempatna.

⁴Isukna deui eta arca teh kasampak geus nyuksruk deui hareupeun Peti Perjangjian, malah huluna jeung leungeunna duanana geus marisah, ngagaloler dina bangbarung, ngan kari awakna. (

⁵Mana nepi ka ayeuna ge imam-imam Dagon, kitu deui sakur anu rek maruja ka kuil di Asdod tara aya anu nincak kana eta bangbarung, ngan ngalengkahan wungkul.)

⁶Urang Asdod ku PANGERAN dihukum jeung diguyurkeun. Urang dinya jeung sakurilingeunana digebug ku kasakit bungkul.

⁷Meunang balahi kitu urang Pelisti nyararita kieu, ”Urang, kitu deui batara Dagon, disiksa ku Allahna urang Israil. Eta Peti Perjangjian ulah aya di dieu.”

⁸Ti dinya maranehna nitah ngalulungsur raja-raja Pelisti anu kabehna limaan, dipentaan nasehat, ”Kedah dikumahakeun Peti Perjangjian Allahna urang Israil teh?” Jawabna, ”Pindahkeun ka Gat!” Tuluy dipindahkeun ka Gat, kota sejen di Pelisti.

⁹Ari nepi ka Gat, urang dinya ge ku PANGERAN diguyurkeun, digebug ku kasakit bungkul, kolot budak taya nu kari.

¹⁰Seug Peti Perjangjian teh dipindahkeun ka Ekron, di Pelisti keneh. Barang nepi, urang Ekron tingjerewet, pokna, ”Make dipindahkeun ka dieu eta Peti Perjangjian Allahna urang Israil teh, ngarah urang pararaeh!”

¹¹Ti dinya ngalulungsur deui raja-raja Pelisti anu limaan tea. Ceuk maranehna, ”Pulangkeun eta Peti Perjangjian urang Israil teh ka asalna, ulah nepi ka meakkeun bangsa urang!” Sakuliah kota eta jadi kacida guyurna nandangan panyiksa ti PANGERAN sakitu bangetna.

¹²Anu tacan paraeh, keuna ku eta bungkul, nepi ka jalma-jalma teh tingjarerit marenta tulung ka batarana.