Read Boros Dusun 1 SAMUEL 8 Bible Online

1 SAMUEL 8 - Boros Dusun bible

1 SAMUEL 8

¹Sanggeus beuki sepuh Samuel ngangkat putra-putrana jadi hakim di Israil.

²Putra nu pangsepuhna jenenganana Yoel, ari raina Abia, duanana jaradi hakim di Bersyeba.

³Tapi lampahna henteu cara ramana, moro-moro duit bae, nepi ka daraek nampa pangruruba ari mutus perkara tara jujur.

⁴Pamingpin Israil kabeh baradami, geus kitu ngadareuheus ka Samuel di Ramah.

⁵Pok arunjukan, ”Bapa parantos sepuh, dupi putra benten deui ti rama. Ku margi kitu kedah aya raja anu pingatureun. Jadi abdi-abdi hayang gaduh raja cara nagara-nagara sanes.”

⁶Samuel teu raos manahna ngadangu nu marenta raja, tuluy neneda ka PANGERAN.

⁷Ari timbalan PANGERAN, ”Gugu sapamentana. Anu ditolak lain maneh, tapi Kami, raja maranehna.

⁸Ingkarna ti Kami geus ti bareto. Ti barang dibudalkeun ti Mesir ge geus mimiti nyarembah ka allah-allah sejen. Peta kalakuanana ka maneh ayeuna, nya kalakuanana ka Kami sapapanjangna.

⁹Mana keun bae turutkeun. Tapi omat-omatkeun kumaha kituh balukarna engke ari geus baroga raja.”

¹⁰Tuluy nu marenta raja teh ku Samuel dicariosan sakumaha timbalan PANGERAN, saurna,

¹¹”Kieu engke raja maraneh metakeun maraneh teh,” Samuel nerangkeun. ”Anak maraneh bakal disina arasup tentara, sawarehna disina mawa kareta perang, sawarehna dijieun tentara pasukan kuda, sawarehna deui dijieun purah lumpat hareupeun kareta perang,

¹²sawareh disina jaradi kapala balad sarebu, sawarehna deui jadi kapala balad lima puluh. Aya oge anu disina ngawaruluku di lahan-lahan raja jeung mibuatanana, jeung aya anu disina nyarieunan pakarang jeung nyarieunan pakakas kareta perang.

¹³Anu awewe disina nyarieunan seuseungitan pikeun raja, disina jaradi koki, disina jaradi tukang nyieun kueh tuangeun raja.

¹⁴Lahan-lahan maraneh anu pangalusna, kebon-kebon anggur, kebon-kebon jetun, ku raja bakal dicokot dibikeun ka para gegedenna.

¹⁵Gandum jeung buah anggur maraneh bakal dicokot saperpuluhna, pikeun para pangawal karaton jeung para gegeden lianna.

¹⁶Gandek-gandek, sapi-sapi nu pangalusna kitu deui kalde-kalde maraneh, aya anu dicokot sina dipake digawe pikeun raja.

¹⁷Ingon-ingon maraneh saperpuluhna dicokot, sarta maraneh sorangan kudu jaradi badegana.

¹⁸Jadi lamun geus baroga raja, maraneh bakal rumahuh ka raja beunang hayang maraneh. Tapi rumahuh ge ku PANGERAN moal didangu.”

¹⁹Kasauran Samuel teu dipirosea, pokna ge, ”Sawios da hayang gaduh raja,

²⁰hayang cara nagara-nagara batur gaduh raja sorangan, anu bakal ngatur sareng mingpin jurit di pangperangan.”

²¹Samuel mungkur ti maranehna. Sagala omongan jalma-jalma tea diunjukkeun ka PANGERAN.

²²Ari timbalan PANGERAN, ”Ayunkeun naon kahayangna, pek bere raja.” Ti dinya eta jelema-jelema urang Israil teh ku Samuel dititah baralik.