Read Swahilli 2 Mambo ya Siku 21 Bible Online

2 Mambo ya Siku 21 - Swahilli bible

2 Mambo ya Siku 21

¹Yosafati akakufa na kuzikwa pamoja na babu zake katika makaburi ya kifalme katika muji wa Daudi; naye Yoramu mwana wake akatawala pahali pake.

²Yoramu alikuwa na wandugu, wana wa Yosafati; Azaria, Yehieli, Zakaria, Azaria, Mikaeli na Sefatia.

³Baba yao aliwapa zawadi kubwakubwa za feza, zahabu na vitu vingine vya bei kali, na vilevile miji ya Yuda yenye kuta. Lakini kwa sababu Yoramu ndiye aliyekuwa muzaliwa wake wa kwanza, Yosafati akamupa ufalme atawale kwa pahali pake.

⁴Yoramu alipoikalia kiti cha kifalme na utawala wake ulipokuwa umekwisha kuimarika, yeye akawaua wandugu zake wote kwa upanga, na vilevile wakubwa wamoja wa Israeli.

⁵Yoramu alianza kutawala akiwa na umri wa miaka makumi tatu na miwili. Alitawala akiwa kule Yerusalema kwa muda wa miaka minane.

⁶Alifuata njia mbaya za mufalme Ahabu na za wafalme wengine wa Israeli kama vile jamaa ya Ahabu ilivyofanya kwa sababu muke wake alikuwa binti ya Ahabu. Akatenda maovu mbele za Yawe,

⁷lakini Yawe hakutaka kuangamiza ukoo wa Daudi kwa ajili ya agano alilokuwa amefanya na Daudi vilevile kwa sababu alikuwa ameahidi kwamba wazao wake wataendelea kutawala milele.

⁸Wakati wa utawala wa Yoramu, Waedomu waliasi utawala wa Yuda, wakaweka mufalme wao wenyewe.

⁹Kwa hiyo, Yoramu pamoja na wakubwa wake na magari yake yote akaondoka akawashambulia Waedomu waliokuwa wamemuzunguka yeye pamoja na wakubwa wake na magari.

¹⁰Hivyo Waedomu wakaasi utawala wa Yuda mpaka sasa. Wakati uleule, vilevile wakaaji wa Libuna nao wakaasi utawala wake kwa sababu Yoramu alikuwa amemwacha Yawe, Mungu wa babu zake.

¹¹Tena alitengeneza pahali pa kuabudia miungu mingine katika milima ya Yuda na kusababisha wakaaji wa Yerusalema kukosa uaminifu na watu wa Yuda kupotoka.

¹²Nabii Elia akamupelekea mufalme Yoramu barua hii: “Yawe, Mungu wa Daudi babu yako, anakulaani kwa sababu haukufuata mwenendo wa Yosafati baba yako, au wa Asa mufalme wa Yuda.

¹³Lakini umeifuata mienendo ya wafalme wa Israeli na kuwaongoza watu wa Yuda na wa Yerusalema katika kukosa uaminifu kama vile Ahabu, na wafalme wa jamaa yake waliomufuata walivyoongoza Israeli kukosa uaminifu. Vilevile umewaua wandugu zako, wandugu za baba mumoja waliokuwa watu wema zaidi kuliko wewe.

¹⁴Kwa sababu hiyo, Yawe atawaazibu vikali watu wako, wana wako, wake zako na kuharibu mali yako yote.

¹⁵Wewe mwenyewe utapata ugonjwa mukali wa tumbo, ambao utaongezeka siku kwa siku, mpaka matumbotumbo yako yatoke inje.”

¹⁶Kulikuwa Wafilistini na Waarabu wengine waliokuwa wakikaa karibu na Waetiopia. Hawa, Yawe aliwapandisha hasira kusudi wapigane vita na Yoramu.

¹⁷Basi, wakashambulia inchi ya Yuda, wakanyanganya mali yote iliyokuwa katika nyumba yake na kutwaa wana wake wote na wake zake, isipokuwa Ahazia, mwana wake mudogo.

¹⁸Nyuma ya hayo yote, Yawe akamuletea mufalme ugonjwa wa tumbo usioweza kupona.

¹⁹Aliendelea kugonjwa, na ugonjwa wake ukakuwa unaongezeka siku kwa siku, hata kufikia mwisho wa mwaka wa pili, akakufa katika maumivu makali. Watu hawakuwasha moto kwa kuomboleza kifo chake kama vile walivyowafanyia babu zake.

²⁰Yoramu alianza kutawala akiwa na umri wa miaka makumi tatu na miwili; akatawala kule Yerusalema kwa muda wa miaka minane. Wakati alipokufa, hakuna mutu yeyote aliyemusikitikia. Alizikwa katika muji wa Daudi, lakini si katika makaburi ya wafalme.