Read Swahilli Ezra 5 Bible Online

Ezra 5 - Swahilli bible

Ezra 5

¹Wakati ule, manabii wawili, Hagai na Zakaria mwana wa Ido, wakawatolea unabii Wayuda waliokuwa wanakaa Yuda na Yerusalema, katika jina la Mungu wa Israeli.

²Nao Zerubabeli mwana wa Saltieli, na Yesua mwana wa Yosadaki, walipousikia ujumbe huo wakaanza tena kuijenga nyumba ya Mungu katika Yerusalema, wakisaidiwa na manabii wa Mungu.

³Kisha Tatenayi, mutawala wa jimbo la upande wa magaribi wa muto Furati, Setari-Bozenayi na wenzao, wakakwenda Yerusalema na kuuliza: “Nani aliyewaamuru kuijenga nyumba hii mpaka kuimaliza?”

⁴Tena wakauliza: “Ni nani wanaojenga nyumba hii? Tunataka majina yao.”

⁵Lakini Mungu alikuwa anawalinda viongozi wa Wayuda, kwa hiyo wakubwa hao hawakuwakataza mpaka pale walipomwandikia mufalme Dario na kupata maoni yake.

⁶Basi, Tatenayi, mutawala wa jimbo la upande wa magaribi wa muto Furati, Setari-Bozenayi na wenzao, wakamwandikia mufalme Dario.

⁷Walimutumia mufalme barua iliyoandikwa hivi: Kwa mufalme Dario, tunakutakia amani.

⁸Tungetaka kukufahamisha, ee mufalme, kwamba tulikwenda katika jimbo la Yuda kunapokuwa nyumba ya Mungu Mukubwa. Nyumba hii inajengwa upya kwa mawe makubwamakubwa na kuta zake zinawekwa nguzo za miti. Kazi hiyo inafanywa kwa uangalifu mukubwa na inaendelea vizuri sana.

⁹Tuliwauliza viongozi hao watuambie ni nani aliyewapa amri ya kuijenga upya nyumba hii mpaka kuimaliza.

¹⁰Tukawauliza vilevile majina yao kusudi tuweze kukujulisha wale wanaoongoza kazi hiyo.

¹¹Wao wakatujibu hivi: “Sisi ni watumishi wa Mungu wa mbingu na dunia, na tunaijenga upya nyumba ambayo ilikuwa imejengwa na kumalizika pale mbele na mufalme mumoja mukubwa wa Israeli.”

¹²Lakini kwa sababu babu zetu walimukasirikisha Mungu wa mbingu, yeye akawatia katika mikono ya mufalme Nebukadneza wa Babeli, Mukaldea, aliyeharibu nyumba hii na kuwapeleka watu katika uhamisho kule Babeli.

¹³Lakini katika mwaka wa kwanza wa utawala wa mufalme Kiro wa Babeli akatoa amri kwamba nyumba hii ya Mungu ijengwe upya.

¹⁴Vilevile akavirudisha vyombo vya zahabu na feza ambavyo mufalme Nebukadneza alikuwa amevipeleka kutoka katika hekalu kule Yerusalema na kuviweka katika hekalu la Babeli. Vyombo hivyo Kiro akaviondoa toka hekalu la Babeli na kuvipatia Sesebasari ambaye alikuwa amemuchagua akuwe mutawala wa Yuda; akamwamuru akisema:

¹⁵“Utwae vyombo hivyo na kuvirudisha katika hekalu la Yerusalema, na kuijenga upya nyumba ya Mungu pahali pake.”

¹⁶Kisha Sesebasari akakuja na kuweka musingi wa nyumba ya Mungu katika Yerusalema, na tangu wakati huo ujenzi umekuwa ukiendelea mpaka sasa, lakini bado haujamalizika.

¹⁷Basi, ikikupendeza, ewe mufalme, amuru uchunguzi ufanyike katika kitabu cha habari za kifalme katika muji wa Bebeli kama mufalme Kiro alitoa amri nyumba hii ya Mungu ijengwe upya katika Yerusalema. Kisha, tunakuomba utujulishe maoni yako juu ya jambo hili.