Read Swahilli Yobu 8 Bible Online

Yobu 8 - Swahilli bible

Yobu 8

¹Halafu Bildadi wa inchi ya Suhi akamujibu Yobu:

²Utasema mambo haya mpaka wakati gani? Mpaka wakati gani maneno yako yatakuwa matupu kama upepo?

³Maana, unazani Mungu anapotosha sheria? Au, Mungu Mwenye Uwezo anapotosha haki?

⁴Kama watoto wako wamemukosea Mungu, yeye amewalipiza matokeo ya makosa yao.

⁵Kama utamutafuta Mungu na kumusihi yule Mungu Mwenye Uwezo,

⁶kama wewe uko safi ndani ya moyo na wa usawa, kweli Mungu atakuja kukusaidia, na kukujalia makao unayostahili.

⁷Na ingawa ulianza kuishi kwa uzaifu, maisha yako ya mwisho yatakuwa bora zaidi.

⁸Tafazali, ujifunze kwa wale waliotutangulia; shika mambo ambayo wazee walitambua.

⁹Sisi ni watu wa juzijuzi tu, hatujui kitu; siku zetu katika dunia ni kivuli kinachopita.

¹⁰Lakini wao watakufundisha na kukuambia mambo waliyopata kuyatoa katika maarifa yao.

¹¹Nyasi zinaota tu penye tingitingi, matete yanastawi pahali panapokuwa maji.

¹²Hata kama yamechanua na bila kukatwa, yakikosa maji yananyauka mbele ya mimea mingine.

¹³Ndivyo wote wanaomusahau Mungu wanavyokuwa. Tumaini la wasiomwamini Mungu litapotea.

¹⁴Tegemeo lao linavunjika, tumaini lao ni utando wa buibui.

¹⁵Wanaegemea nyumba yao lakini haitasimama, wanaishikilia lakini haidumu.

¹⁶Wako kama ua ambalo jua linapotoka linastawi; linaeneza matawi yake katika bustani yake,

¹⁷mizizi yake inajisokotasokota kwenye mawe, nalo linaenda kuchunguza ndani ya jiwe.

¹⁸Lakini likiangamizwa kutoka makao yake, hayo yatalikana yakisema: “Sijakuona bado.”

¹⁹Ile ndiyo furaha ya mwisho wake, na pahali pake patachipuka mengine.

²⁰Sikia! Mungu hatakataa mutu mukamilifu, wala hatasaidia waovu.

²¹Lakini atajaza kinywa chako kicheko, na midomo yako sauti ya furaha.

²²Wale wanaokuchukia watapata haya, makao ya waovu yatatoweka kabisa.