Read Swahilli Mezali 2 Bible Online

Mezali 2 - Swahilli bible

Mezali 2

¹Mwana wangu, ukikubali maneno yangu, na kushika maagizo yangu,

²ukitega sikio lako kwa kusikiliza hekima, na kuelekeza moyo wako upate ufahamu,

³ukiomba upewe akili, ukisihi upewe ufahamu,

⁴ukitafuta hekima kama feza, na kuitaka kama hazina iliyofichwa,

⁵utaelewa maana ya kumwogopa Yawe, utafahamu maana ya kumujua Mungu.

⁶Maana Yawe anawapa watu hekima; katika kinywa chake kunatoka maarifa na ufahamu.

⁷Anawawekea watu wa usawa akiba ya hekima safi, yeye ni ngao kwa watu wanaoishi kwa ukamilifu.

⁸Analinda mienendo ya watu wanaofuata sheria yake, na kuchunga njia za waaminifu wake.

⁹Ukinisikiliza, utafahamu haki, usawa, na kufuata sheria ya Mungu; utafahamu kila njia nzuri.

¹⁰Maana hekima itaingia ndani ya moyo wako, na maarifa yatapendeza nafsi yako.

¹¹Hekima itakulinda, ufahamu utakuchunga;

¹²vitakuepusha na njia ya uovu, na watu wa maneno mapotovu,

¹³watu wanaoacha njia zenye kunyooka kwa kufuata njia za giza,

¹⁴watu wanaofurahia kutenda maovu na kupendezwa na upotovu wa maovu,

¹⁵watu ambao mienendo yao imepotoka, nazo njia zao haziaminiki.

¹⁶Utaepukana na mwanamuke mwasherati, mwanamuke kahaba wa maneno matamu,

¹⁷mwanamuke anayemwacha mwenzake wa ujana wake, na kusahau agano la Mungu wake.

¹⁸Nyumba yake inaelekea kifo, njia zake zinakwenda kuzimu.

¹⁹Yeyote anayemwendea harudi hata kidogo, wala harudilii tena njia ya uzima.

²⁰Kwa hiyo utafuata mufano wa watu wazuri, na kufuata mienendo ya wenye haki.

²¹Maana watu wa usawa watarizi inchi, na watu wakamilifu watadumu ndani yake.

²²Lakini waovu wataondolewa katika inchi, na watu wabaya watangolewa toka ndani yake.