Read Swahilli Mezali 25 Bible Online

Mezali 25 - Swahilli bible

Mezali 25

¹Hizi nazo ni mezali nyingine za mufalme Solomono zilizoandikwa na watu wa Hezekia, mufalme wa Yuda.

²Mungu anatukuzwa kwa kuficha mambo, lakini wafalme wanatukuzwa kwa kuchunguza mambo.

³Kama vile mbingu zinavyokuwa mbali juu na dunia mbali chini, ndivyo inavyokuwa vigumu kuelewa akili za mufalme.

⁴Toa takataka katika feza, na mufuaji wa vyuma atakutengenezea chombo kizuri.

⁵Uwaondoe waovu mbele ya mufalme, na utawala wake utaimarika katika haki.

⁶Usijipendekeze kwa mufalme, wala usijifanye mutu mukubwa,

⁷maana ni heri kuambiwa: “Kuja huku mbele”, kuliko kuporomoshwa mbele ya mukubwa.

⁸Mambo uliyoona kwa macho yako, usiharakishe kuyapeleka katika tribinali; maana utafanya nini kwa mwisho, kama jirani yako anakupatisha haya?

⁹Utengeneze ugomvi na mwenzako peke yake, na kila mumoja wenu asitoe siri ya mwenzake;

¹⁰watu wanaokusikia wasikuzarau, nawe usijiharibishie heshima kwa siku zote.

¹¹Neno linalosemwa kwa wakati unaofaa, ni kama michoro ya zahabu juu ya feza.

¹²Onyo la mwenye hekima kwa mutu musikilivu ni bora kuliko pete au ushanga wa zahabu safi.

¹³Mujumbe mwaminifu anamufurahia yule aliyemutuma, kama maji ya baridi wakati wa joto la mavuno.

¹⁴Kama vile mawingu na upepo bila mvua, ndivyo anavyokuwa mutu anayeahidi zawadi na haitoi.

¹⁵Kwa uvumilivu mutawala anaweza kusadikishwa; ulimi laini unavunja mifupa.

¹⁶Unapopata asali, kula sehemu ya kukutoshelea, kusudi usishibe na kuitapika.

¹⁷Usimutembelee jirani yako mara kwa mara, kusudi asichoke nawe na kukuchukia.

¹⁸Mutu anayetoa ushuhuda wa uongo juu ya mwenzake, ni hatari kama nyundo, upanga au mushale mukali.

¹⁹Kumutegemea mutu asiyeaminiwa wakati wa taabu, ni kama kutegemea jino zaifu au muguu ulioteguka.

²⁰Kumwimbia mutu mwenye huzuni ni kama kumuvua nguo wakati wa baridi, au kutia siki katika kidonda.

²¹Adui yako akiwa na njaa, umupe chakula; akiwa na kiu, umupe maji ya kunywa.

²²Hivyo utamufezehesha, kama vile kumwanga makaa ya moto juu ya kichwa chake. Yawe atakupa zawadi.

²³Upepo wa kaskazini unaleta mvua; vilevile mwenye kusingiziana analeta chuki.

²⁴Afazali kuishi pembeni juu ya paa, kuliko kuishi ndani ya nyumba pamoja na mwanamuke mugomvi.

²⁵Kama vile maji baridi kwa mwenye kiu, ndivyo habari njema kutoka mbali inavyokuwa.

²⁶Mwenye haki anayekubali kufuata mambo ya mwovu ni chemichemi iliyochafuliwa au kisima kinachotofuliwa.

²⁷Si vizuri kula asali nyingi sana; vilevile haifai kujipendekeza sana.

²⁸Mutu asiyeweza kuzuia hasira yake ni kama muji usiokuwa na ulinzi unaposhambuliwa.