Read Swahilli Mezali 30 Bible Online

Mezali 30 - Swahilli bible

Mezali 30

¹Maneno ya Aguri mwana wa Yake. Maneno ambayo mutu huyu alimwambia Itieli na Ukali.[11]

²Mimi ni mupumbafu sana, wala si mutu; sina akili ya mwanadamu.

³Sijajifunza hekima, wala sijui kitu juu ya Mungu Mutakatifu.

⁴Ni nani aliyepanda juu mbinguni na kushuka chini? Ni nani aliyekamata upepo katika mukono? Ni nani aliyefunga maji katika kitambaa? Ni nani aliyeweka mipaka yote ya dunia? Jina lake ni nani? Na ni nani jina la mwana wake? Uniambie kama unajua!

⁵Maneno yote ya Mungu ni ya kuaminiwa. Yeye ni ngao yao wote wanaomukimbilia.

⁶Usiongeze neno katika maneno yake, kusudi asikukaripie, nawe usionekane kuwa mwongo.

⁷Ee Mungu, ninakuomba mambo haya mawili, wala usikatae kunitimizia nayo mbele ya kufa kwangu:

⁸Uniondolee uongo na udanganyifu; usinipe umasikini wala utajiri; unipatie chakula ninachohitaji,

⁹maana nikipata mali mengi nitakusahau; nikisema: “Yawe ni nani?” Au nikiwa masikini nitaiba, na kuzaraulisha jina lako ee Mungu wangu.

¹⁰Usimuchongee mutumwa kwa bwana wake, kusudi asikulaani, na kuonekana kwamba uko na kosa.

¹¹Kuna watu ambao wanalaani baba zao, wala hawana shukrani kwa mama zao.

¹²Kuna watu ambao wanajiona kuwa safi, kumbe bado hawajatakaswa uchafu wao.

¹³Kuna watu ambao macho yao yanajaa kiburi. Wanazarau kila kitu wanachoona.

¹⁴Kuna watu ambao meno yao ni kama upanga, na mataya yao ni kama visu. Wako tayari kuwatafuna wamasikini wa inchi, na wakosefu wanaokuwa kati ya watu!

¹⁵Muruba ana wabinti wawili wanaosema: “Unipe, Unipe!” Kuna vitu vitatu ambavyo havishibi hata kidogo, hata vitu vine visivyosema: “Inatosha!”

¹⁶Kuzimu, tumbo la mwanamuke tasa, udongo usioshiba maji, na moto usiosema: “Inatosha!”

¹⁷Kama mutu akimuchekelea baba yake na kuzarau utii kwa mama yake, macho yake yataondolewa na kibombobombo wa pori na kuliwa na tai.

¹⁸Kuna mambo matatu yanayokuwa ya ajabu kwangu, hata mambo mane nisiyoyaelewa:

¹⁹njia ya tai katika anga, njia ya nyoka juu ya jiwe, njia ya mashua ndani ya bahari, na njia ya mwanaume kwa mwanamuke.

²⁰Mwenendo wa mwanamuke mwasherati ni hivi: yeye anakula, anajipanguza mudomo, na kusema: “Sijafanya kosa lolote!”

²¹Kuna mambo matatu ambayo yanaitetemesha dunia, hata mambo mane ambayo haiwezi kuyavumilia:

²²mutumwa anayekuwa mufalme; mupumbafu anayeshiba chakula;

²³mwanamuke asiyependwa anayeolewa; na mujakazi anapotwaa nafasi ya bibi yake.

²⁴Kuna viumbe vine vidogo sana katika dunia, lakini vina akili sana:

²⁵siafu ni wadudu wasiokuwa na nguvu, lakini wanajiwekea chakula wakati wa kipwa;

²⁶sungura ni nyama wasiokuwa na uwezo, lakini wanajitengenezea makao chini ya mawe;

²⁷nzige hawana mufalme, lakini wote wanaenda pamoja kwa vikundi;

²⁸mujusi, unaweza kumushika katika mukono, lakini anaingia katika nyumba ya kifalme.

²⁹Kuna viumbe vitatu vyenye mwendo wa kupendeza, hata viumbe vine vyenye mwendo muzuri:

³⁰simba, ambaye ni nyama mwenye nguvu kuliko wote wala hamwogopi nyama mwingine yeyote,

³¹jogoo anayetembea kwa maringo, beberu, na mufalme mbele ya watu wake.

³²Kama umekuwa mupumbafu hata ukajisifu, au kama umekuwa unapanga maovu, chunga mudomo wako.

³³Maana ukigandisha maziwa, utapata siagi; ukimupiga mutu kwenye pua, atatoka damu. Vilevile kuchochea hasira kunaleta ugomvi.