Read Swahilli Mezali 8 Bible Online

Mezali 8 - Swahilli bible

Mezali 8

¹Musikilize! Hekima inaita! Akili inapiga kelele yake!

²Juu kwenye vilima karibu na njia na katika masanganjia ndipo ilipojiweka.

³Karibu na milango ya kuingilia katika muji, pahali wanapoingilia watu inaita kwa sauti:

⁴“Enyi watu wote, ninawaita ninyi! Wito wangu ni kwa ajili ya wanadamu.

⁵Enyi wajinga, mujifunze kuwa na akili; musikilize kwa uangalifu, enyi wapumbafu.

⁶Musikilize maana nitakachosema ni jambo la lazima; katika midomo yangu mutatoka mambo ya haki.

⁷Kinywa changu kitasema kweli mutupu; uovu ni chukizo katika midomo yangu.

⁸Kinywa changu kitasema maneno ya haki, hakuna udanganyifu wala upotevu katika midomo yangu.

⁹Kwa mutu mwenye ufahamu kila kitu ni wazi, kwa mwenye maarifa yote imesawanishwa.

¹⁰Chagua mafundisho yangu pahali pa feza; na maarifa pahali pa zahabu safi.

¹¹“Hekima ina maana sana kuliko mawe ya bei kali; kitu chochote unachotamani hakiwezi kulingana nayo.

¹²Mimi Hekima nina ujuzi; nina maarifa na akili.

¹³Kumwogopa Yawe ni kuchukia uovu. Ninachukia kiburi, majivuno maisha mabaya, na luga mbaya.

¹⁴Nina uwezo wa kushauri na kuamua vizuri. Nina ufahamu na nina nguvu.

¹⁵Kwa musaada wangu watawala wanatawala na wakubwa wanaagiza kwa haki.

¹⁶Kwa musaada wangu viongozi wanaongoza na wakubwa wanaamua.

¹⁷Ninawapenda wale wanaonipenda; wanaonitafuta kwa bidii wananipata.

¹⁸Utajiri na heshima viko kwangu, mali ya kudumu na fanaka.

¹⁹Matunda yangu ni mazuri kuliko zahabu safi, na faida yangu inashinda ya feza bora.

²⁰Ninatembea katika njia ya haki; ninafuata sheria ya Mungu.

²¹Ninawatajirisha wale wanaonipenda, ninajaza tele hazina za wanaonipenda.

²²“Yawe aliniumba kwa mwanzo wa kazi yake, zamani za kale mbele ya kuumbwa kwa kitu chochote.

²³Nilifanywa kwa mwanzo wa nyakati, nilikuwa niko mbele ya dunia kuanza.

²⁴Nilizaliwa mbele ya vilindi vya bahari, mbele ya chemichemi zinazobubujika maji.

²⁵Nilizaliwa mbele milima na vilima havijaumbwa,

²⁶mbele Mungu hajaumba dunia na mashamba yake, wala chembe za kwanza za mavumbi ya dunia.

²⁷Nilikuwa niko wakati alipoweka mbingu, wakati alipofanya muviringo juu ya bahari;

²⁸wakati alipoimarisha mawingu mbinguni, alipofanya imara chemichemi za bahari,

²⁹wakati alipowekea bahari mupaka wake kusudi maji yake yasipate kuvunja amri yake, wakati alipoweka misingi ya dunia.

³⁰Nilikuwa pamoja naye kama fundi wa kazi,[2] nilikuwa furaha yake kila siku, nikishangilia mbele yake siku zote,

³¹nikifurahia dunia na wakaaji wake, na kupendezwa kuwa pamoja na wanadamu.

³²“Sasa basi, wana wangu, munisikilize: heri wale wanaofuata njia zangu.

³³Musikilize mafundisho mupate hekima, wala musiyakatae.

³⁴Heri mutu anayenisikiliza, anayeikaa kila siku kwenye mulango wangu, anayekesha karibu na milango yangu.

³⁵Anayenipata mimi amepata uzima, na upendeleo kutoka kwa Yawe.

³⁶Asiyenipata anajizuru mwenyewe; wote wanaonichukia wanapenda kifo.”