Read Swahilli Wimbo wa Solomono 2 Bible Online

Wimbo wa Solomono 2 - Swahilli bible

Wimbo wa Solomono 2

¹Mimi ni kama ua la Saroni, ni yungiyungi ya mabonde.

²Kama yungiyungi kati ya michongoma, ndivyo mupenzi wangu anavyokuwa kati ya wabinti.

³Kama muti wa matunda kati ya miti ya pori, ndivyo mupenzi wangu anavyokuwa kati ya vijana. Ninafurahia kuikaa chini ya kivuli chake, na tunda lake tamu sana kwangu.

⁴Alinipeleka mpaka katika chumba cha karamu, akapandisha bendera ya mapenzi juu yangu.

⁵Munishibishe na zabibu kavu, munifurahishe kwa matunda, maana ninaugua kwa mapenzi!

⁶Mukono wake wa kushoto uko chini ya kichwa changu, mukono wake wa kuume unanikumbatia.

⁷Ninawasihi, enyi wabinti wa Yerusalema, kama vile paa au swala wanavyokuwa katika pori, musichochee wala kuamusha mapenzi, mpaka pale wakati wake utakapofika.

⁸Hiyo ni sauti ya mupenzi wangu, yeye anakuja mbio, anaruka milima, vilima anavipita haraka!

⁹Mupenzi wangu ni kama paa, ni kama swala muchanga. Anasimama karibu na ukuta wetu, anachungulia kwenye dirisha, anaangalia kwenye wavu.

¹⁰Mupenzi wangu ananiambia, akisema: Simama basi, ewe mupenzi wangu, unayependeza, kuja tuende zetu.

¹¹Wakati wa baridi umepita, nazo mvua zimekwisha kukoma;

¹²maua yamechanua kila pahali. Wakati wa kuimba umefika; sauti za njiwa zinasikilika katika mashamba yetu.

¹³Miti ya tini imeanza kuzaa na mizabibu imechanua. Inatoa harufu nzuri. Kuja, basi, ewe mupenzi wangu unayenipendeza, kuja tuende.

¹⁴Ee njiwa yangu, uliyejificha katika matundu kwenye mulima, uniache kuona uso wako na kusikia sauti yako, maana sauti yako ni nzuri na uso wako unapendeza.

¹⁵Mutukamatie mbweha, wale mbweha wadogowadogo, wanaoharibu mizabibu yetu inayochanua.

¹⁶Mupenzi wangu ni wangu, nami ni wake. Yeye anakulisha kondoo wake penye yungiyungi.

¹⁷Mpaka pale jua linapochomoza na vivuli kutoweka, rudi kama paa, mupenzi wangu, kama swala mudogo juu ya milima ya Beteri.