Read Swahilli Ezekieli 32 Bible Online

Ezekieli 32 - Swahilli bible

Ezekieli 32

¹Siku ya kwanza ya mwezi wa kumi na mbili, mwaka wa kumi na mbili tangu tulipopelekwa katika uhamisho, neno la Yawe lilinifikia kusema hivi:

²Wewe mwanadamu! Imba wimbo wa kuomboleza juu ya Mufalme wa Misri. Wewe Mufalme wa Misri unajiona kuwa simba kati ya mataifa, lakini wewe ni kama mamba tu katika maji: unachomoka kwa nguvu kwenye mito yako, unayavuruga maji kwa miguu yako, na kuichafua mito.

³Bwana wetu Yawe anasema: Nitautupa wavu wangu juu yako, nao watu watakuvua humo kwa wavu wangu.

⁴Nitakutupa juu ya inchi kavu, nitakutupa chini juu ya uwanja, nitaleta ndege wote watue juu yako, na kuwashibisha nyama wote wa pori kwa mwili wako.

⁵Nitasambaza nyama yako juu ya milima, na kujaza mabonde yote muzoga wako.

⁶Nitaikunywesha inchi damu yako mpaka juu ya milima, mashimo yatajaa damu yako.

⁷Nitakapokuangamiza, nitazifunika mbingu, nitazifanya nyota kuwa nyeusi, jua nitalifunika kwa mawingu, na mwezi hautatoa mwangaza wake.

⁸Nitaifanya miangaza yote mbinguni kuwa giza nitatandaza giza juu ya inchi. — Ni ujumbe wa Bwana wetu Yawe.

⁹Nitaihuzunisha mioyo ya watu wengi, nitakapokupeleka katika utumwa kati ya mataifa, katika inchi ambazo hauzijui.

¹⁰Nitayashitusha mataifa mengi kwa habari zako, wafalme wao watatetemeka kwa sababu yako, nitakaponyoosha upanga wangu mbele yao. Watatetemeka kila wakati, kila mutu akiogopea maisha yake, siku ile ya kuangamia kwako.

¹¹Kwa maana, Bwana wetu Yawe anasema hivi: Upanga wa mufalme wa Babeli utakufuatilia.

¹²Watu wako wengi watauawa kwa mapanga ya mashujaa, watu wa hatari kuliko mataifa yote. Watakomesha kiburi cha Misri na kuwaua watu wako wote.

¹³Nitawaangamiza nyama wako wote pembeni ya muto Nili. Maji yake hayatavurugwa tena na mutu wala kwato za nyama kuyachafua tena.

¹⁴Hapo nitayafanya maji yake yatulie na kuitiririsha mito yake kama mafuta. — Ni ujumbe wa Bwana wetu Yawe.

¹⁵Nitakapoifanya inchi ya Misri kuwa jangwa na mali yake yote kunyanganywa, nitakapowaua wakaaji wake wote, halafu watatambua kwamba mimi ni Yawe.

¹⁶Huo ndio wimbo wa maombolezo, wanawake wa mataifa watauimba, wataimba juu ya Misri na watu wake wote. — Ni ujumbe wa Bwana wetu Yawe.

¹⁷Siku ya kumi na tano ya mwezi wa kwanza, mwaka wa kumi na mbili tangu tulipopelekwa katika uhamisho, neno la Yawe lilinifikia kusema hivi:

¹⁸Wewe mwanadamu! Uwaombolezee watu wengi wa Misri. Uwapeleke chini kwenye inchi ya wafu pamoja na mataifa mengine yenye nguvu, waende huko pamoja na wanaoshuka chini kwa wafu.

¹⁹Uwaambie: Ninyi ni wazuri kuliko nani? Muende kuzimu mulalishwe pamoja na wasiomujua Mungu!

²⁰Wamisri wataangamia pamoja na watu waliouawa katika vita. Upanga uko tayari kuangamiza Misri pamoja na watu wake wengi.

²¹Wakubwa wenye nguvu pamoja na wasaidizi wao wakiwa huko katika shimo kwa wafu watasema hivi: Wamisri wameshuka chini kwa wafu, wanalala pamoja na watu wasiomujua Mungu, waliouawa katika vita.

²²Asuria iko huko. Makaburi ya waaskari wake yanaizunguka. Wote waliuawa katika vita.

²³Makaburi yao yako sehemu za chini kabisa katika shimo kwa wafu. Waaskari wao wanaizunguka. Wote waliuawa katika vita. Walipokuwa wangali wanaishi, walieneza vitisho vyao katika inchi ya wanaokuwa wazima.

²⁴Elamu nayo iko huko. Makaburi ya waaskari wake yanaizunguka. Wote waliuawa katika vita. Wakashuka kwenye inchi ya wafu, bila kujua Mungu. Walipokuwa wangali wanaishi, walieneza vitisho vyao katika inchi ya wanaokuwa wazima. Lakini sasa wanapata haya yao pamoja na wale wanaoshuka katika shimo kwa wafu.

²⁵Elamu imelalishwa kati ya wale waliouawa katika vita. Makaburi yao yanaizunguka. Wote waliuawa katika vita, bila kujua Mungu. Walipokuwa wangali wanaishi, walieneza vitisho vyao katika inchi ya wanaokuwa wazima, na sasa wako wanapata haya yao pamoja na wale wanaoshuka katika shimo kwa wafu. Wanawekwa kati ya wale waliouawa.

²⁶Mesaki na Tubali ziko huko. Makaburi ya watu wake wote yanazizunguka. Wote waliuawa katika vita, bila kujua Mungu. Walipokuwa wangali wanaishi, walieneza vitisho vyao katika inchi ya wanaokuwa wazima.

²⁷Hawakuzikwa pamoja na mashujaa wa zamani, ambao walikwenda katika kuzimu kwa wafu wakiwa na silaha zao, mapanga yao chini ya vichwa vyao na ngao zao juu ya miili yao. Mashujaa hao walipokuwa wangali wanaishi walijaza vitisho vyao katika inchi ya wanaokuwa wazima.

²⁸Basi, ninyi Wamisri mutaangamizwa na kulalishwa kati ya wasiomujua Mungu waliouawa katika vita.

²⁹Edomu iko huko pamoja na wafalme wake na wakubwa wao wote. Walipokuwa wangali wanaishi walikuwa na nguvu sana, lakini sasa wamelalishwa kwa wafu pamoja na wasiomujua Mungu waliouawa katika vita.

³⁰Wakubwa wote wa watu wa upande wa kaskazini wako huko vilevile; hata Wasidoni wote walikwenda kujiunga na wafu. Walipokuwa wangali wanaishi, walisababisha vitisho kwa nguvu zao, lakini sasa hao wasiomujua Mungu wamelalishwa chini na haya pamoja na wale waliouawa katika vita. Wanashiriki haya ya wale walioshuka ndani ya shimo kwa wafu.

³¹Mufalme wa Misri, atakapowaona hao wote atafarijika kwa ajili ya wingi wa majeshi yake yote.

³²Nilimuwezesha mufalme wa Misri aeneze vitisho katika inchi ya wanaokuwa wazima, lakini sasa yeye mwenyewe pamoja na jeshi lake lote watauawa katika vita na kulalishwa pamoja na wasiomujua Mungu, waliokufa katika vita. — Ni ujumbe wa Bwana wetu Yawe.