Read Swahilli Ezekieli 35 Bible Online

Ezekieli 35 - Swahilli bible

Ezekieli 35

¹Neno la Yawe lilinifikia kusema hivi:

²Wewe mwanadamu! Ugeukie upande wa mulima Seiri, utoe unabii juu ya wakaaji wake.

³Uwaambie kwamba: Bwana wetu Yawe anasema hivi: Mimi ninapingana nawe, ee mulima Seiri. Ninanyoosha mukono wangu juu yako na kukufanya ukuwe jangwa na ukiwa.

⁴Ninaifanya miji yako kuwa mabomoko nawe utakuwa jangwa. Halafu utatambua kwamba mimi ni Yawe.

⁵Ulikuwa adui wa siku zote wa Waisraeli, ukasababisha watu wake wauawe kwa upanga, wakati wa musiba wao, wakati wa azabu yao ya mwisho.

⁶Kwa hiyo, kama vile ninavyoishi, — ni ujumbe wa Bwana wetu Yawe — kifo kinakungoja na hautaweza kukiepuka. Uko na makosa ya mauaji, basi mauaji nayo yatakuandama.

⁷Nitaufanya mulima Seiri kuwa ukiwa na jangwa na yeyote atakayepitia huko nitamwangamiza.

⁸Nitajaza milima yako watu waliouawa; na katika vilima vyako na mabonde yako na mitelemuko yako yote kutakuwa watu waliouawa kwa upanga.

⁹Nitakufanya kuwa jangwa milele, na miji yako haitakaliwa tena. Halafu utatambua kwamba mimi ni Yawe.

¹⁰Wewe ulisema kwamba mataifa hayo mawili, ni kusema inchi ya Yuda na ya Israeli, ni mali yako na kwamba utazirizi! Ulisema hivyo ingawa humo ni makao yangu mimi Yawe.

¹¹Kwa hiyo, kama vile ninavyoishi, — ni ujumbe wa Bwana wetu Yawe — nitakutendea kadiri ya hasira na wivu wako, kulingana na chuki yako kwao. Nitakapokuazibu utatambua mimi ni nani!

¹²Wewe utajua kwamba mimi mwenyewe Yawe nimeyasikia matusi yote uliyoyatoa juu ya milima ya Waisraeli, ukisema: Milima ya Israeli imefanywa kuwa jangwa! Imetolewa kusudi tupate kuinyanganya!

¹³Nimesikia jinsi unavyojivuna na kusema maneno mengi juu yangu.

¹⁴Bwana wetu Yawe anasema hivi: Nitakapokufanya wewe Edomu kuwa jangwa, dunia yote itafurahi

¹⁵kama wewe ulivyofanya wakati inchi ya Waisraeli ilipoharibiwa. Utakuwa jangwa, ewe mulima Seiri, pamoja na inchi yote ya Edomu. Halafu watu watatambua kwamba mimi ni Yawe.