Read Swahilli ZAKARIA 2 Bible Online

ZAKARIA 2 - Swahilli bible

ZAKARIA 2

¹Katika maono mengine, niliona pembe ine.

²Nami nikamwuliza yule malaika aliyezungumuza nami: Pembe hizi zina maana gani? Yeye akanijibu: Pembe hizi zina maana ya yale mataifa ambayo yaliwatawanya watu wa Yuda, Israeli na Yerusalema.

³Kisha, Yawe akanionyesha wafuachuma wane.

⁴Nami nikauliza: Watu hawa wanakuja kufanya nini? Yeye akanijibu: Watu hawa wamekuja kuyatisha na kuyaangamiza yale mataifa yenye nguvu ambayo yaliishambulia inchi ya Yuda na kuwatawanya watu wake.

⁵Katika maono mengine, nilimwona mutu aliyekuwa na kamba ya kupima katika mukono wake.

⁶Basi, nikamwuliza: Unakwenda wapi? Naye akanijibu: Ninakwenda kuupima urefu na upana wa Yerusalema.

⁷Yule malaika aliyezungumuza nami akaenda kukutana na malaika mwingine ambaye alikuwa anakuja kwake.

⁸Basi, huyo malaika aliyezungumuza nami akamwambia yule mwenzake: Kimbia umwambie yule kijana kwamba si lazima Yerusalema ukuwe na kuta, kama sivyo hapatakuwa nafasi ya kuwatoshelea wakaaji wake wengi na nyama watakaokuwa ndani yake.

⁹Yawe anasema kwamba yeye mwenyewe atakuwa ukuta wa moto kwa kuulinda muji huo pande zote, naye atakaa mule kwa utukufu wake.

¹⁰Yawe anasema hivi: Mukimbie kutoka katika inchi ya kaskazini ambako mimi nilikuwa nimewatawanya kila upande.

¹¹Haraka! Ninyi wote munaokaa katika inchi ya Babeli, mukimbilie Sayuni!

¹²Yawe wa majeshi, ambaye kwa utukufu wake amenituma, anasema hivi juu ya mataifa yaliyowakamata mateka watu wake: Hakika, anayewagusa ninyi anagusa mboni ya jicho langu.

¹³Kweli, nitawashambulia wale waliowakamata mateka, nao watakamatwa mateka na wale waliowafanya watumwa wao. Halafu kwa hiyo mutajua kwamba Yawe wa majeshi ndiye aliyenituma.

¹⁴Yawe anasema hivi: Enyi watu wa Sayuni, muimbe na kufurahi kwa maana ninakuja na kukaa kati yenu.

¹⁵Mataifa mengi yatajiunga nami Yawe, nao watakuwa watu wangu; nami nitakaa kati yenu. Halafu mutajua kwamba Yawe wa majeshi ndiye aliyenituma kwenu.

¹⁶Watu wa Yuda watakuwa tena mali ya pekee ya Yawe katika inchi takatifu, na Yerusalema itakuwa tena muji wake aliouchagua.

¹⁷Enyi wanadamu wote, munyamaze mbele ya Yawe, maana, yeye anakuja kutoka makao yake matakatifu.