Read Swahilli Matendo ya Mitume 19 Bible Online

Matendo ya Mitume 19 - Swahilli bible

Matendo ya Mitume 19

¹Wakati Apolo alipokuwa Korinto, Paulo akasafiri akipitia katika inchi ya vilima na kufika Efeso. Kule akakuta wanafunzi wamoja;

²akawauliza: “Ninyi mulipokea Roho Mutakatifu wakati mulipoamini?” Nao wakamujibu: “Hapana! Hatujasikia hata kidogo kwamba kuko Roho Mutakatifu.”

³Halafu Paulo akawauliza: “Basi mulibatizwa kwa ubatizo gani?” Wakamujibu: “Tulibatizwa kwa ubatizo wa Yoane.”

⁴Paulo akawaambia: “Yoane aliwabatiza wale waliogeuka toka zambi zao na kuwaambia Waisraeli kwamba wamwamini yule atakayekuja nyuma yake, naye ndiye Yesu.”

⁵Waliposikia maneno haya, walibatizwa kwa jina la Bwana Yesu.

⁶Paulo akaweka mikono yake juu yao, na Roho Mutakatifu akashuka juu yao, nao wakaanza kusema kwa luga na kutabiri.

⁷Wote walikuwa kadiri ya watu kumi na wawili.

⁸Kwa muda wa miezi mitatu Paulo alikuwa akiingia katika nyumba ya kuabudia na kuhubiri watu kwa uhodari. Akabishana nao juu ya habari za Ufalme wa Mungu, akitaka wazisadiki.

⁹Lakini wamoja wakakuwa na mioyo migumu hata wakakataa kuamini, wakaanza kusema vibaya juu ya Njia ya Bwana mbele ya mukutano. Kwa hiyo Paulo akajitenga nao, akaenda na wanafunzi peke yao. Na kila siku alibishana na watu katika chumba cha kufanyia usomi cha mutu mumoja aliyeitwa Tirano.

¹⁰Mambo haya yakaendelea kwa muda wa miaka miwili hata Wayuda na Wagriki wote waliokaa katika jimbo la Azia wakasikia neno la Bwana.

¹¹Mungu akaendelea kufanya miujiza ya ajabu kwa njia ya Paulo.

¹²Na hata watu walitwaa vitambaa na nguo zilizogusa mwili wa Paulo, wakazipeleka kwa wagonjwa, nao wakapona na pepo wakatoka ndani yao.

¹³Na kulikuwa Wayuda wamoja waliotangatanga huku na huko kwa kufukuza pepo. Watu wale wakajaribu vilevile kutaja jina la Bwana Yesu, wakiwaambia vilevile pepo: “Ninawaamuru muondoke kwa jina la Yesu, yule anayehubiriwa na Paulo.”

¹⁴(Waliofanya hivi walikuwa wana saba wa Sikewa, Kuhani Mukubwa mumoja wa Wayuda.)

¹⁵Lakini yule pepo akawajibu: “Ninamujua Yesu na ninamufahamu Paulo, lakini ninyi ni nani?”

¹⁶Na yule mutu aliyekuwa na pepo ndani yake akawarukia, akawashinda wote nguvu na kuwatendea vibaya hata wakakimbia toka nyumba yake wakiwa uchi na wakijaa vidonda.

¹⁷Wakaaji wote wa Efeso, Wayuda na Wagriki wakajua habari hii. Halafu wote wakashikwa na woga na wakalitukuza jina la Bwana Yesu.

¹⁸Wengi kati ya wale walioamini walikuja kuungama na kutangaza waziwazi mambo waliyofanya.

¹⁹Na watu wengi kati ya wale waliofanya mambo ya uchawi wakaleta vitabu vyao vya uganga na wakavichoma mbele ya watu wote. Bei ya vitabu vile ilipohesabiwa, ikafikia vikoroti vya feza elfu makumi tano.

²⁰Ni hivi neno la Bwana lilivyoendelea kuenea fasi zote kwa uwezo wake na kuzidi kuonekana kuwa lenye nguvu.

²¹Nyuma ya mambo yale, Paulo alikusudia kwenda Yerusalema, akipitia katika inchi ya Makedonia na katika jimbo la Akaya. Akasema: “Nikisha kufika kule, ni lazima niende Roma vilevile.”

²²Halafu akawatuma wawili kati ya wasaidizi wake, Timoteo na Erasto watangulie kwenda Makedonia. Yeye mwenyewe akabaki tena kwa muda katika jimbo la Azia.

²³Katika siku zile kulitokea fujo kubwa kwa ajili ya Njia ya Bwana.

²⁴Kulikuwa fundi mumoja wa kufua feza, jina lake Demetrio. Alikuwa akitengeneza sanamu ndogo za feza zinazofanana na hekalu la mungu muke Artemi. Na kwa njia ile aliwapatia wafundi faida kubwa.

²⁵Yeye alikusanya wale wafundi wote pamoja na watu wengine waliofanya kazi sawasawa na ile na kuwaambia: “Wandugu, munajua kwamba sisi tunapata mali mengi kwa njia ya kazi hii.

²⁶Sasa ninyi wenyewe munaona na kusikia namna huyu Paulo anayofanya. Amekwisha kuwavuta na kuwaonya watu wengi, si hapa Efeso tu, lakini ni karibu katika jimbo lote la Azia. Anasema kwamba miungu inayotengenezwa na watu si miungu hata kidogo.

²⁷Hivi kunakuwa hatari, na si kwa kazi hii yetu kuzarauliwa tu, lakini vilevile hekalu la mungu mukubwa muke, Artemi, litahesabiwa kuwa kitu bure. Na tena utukufu wake utapunguka, yeye anayeabudiwa na watu wote wa Azia na dunia nzima!”

²⁸Watu wale waliposikia maneno haya, wakajaa na hasira na kuanza kulalamika wakisema: “Artemi wa Waefeso atukuzwe!”

²⁹Fujo ikajaa katika muji wote. Wale watu wakawakamata wanainchi wa Makedonia, Gayo na Aristarko waliokuwa wakisafiri pamoja na Paulo. Nao wote pamoja wakawapeleka kwa haraka katika nyumba ya makutano.

³⁰Paulo alitaka kujionyesha mbele ya lile kundi la watu, lakini wanafunzi wakamukataza.

³¹Hata wakubwa wamoja wa jimbo la Azia, waliokuwa warafiki zake wakamutumia ujumbe wakimusihi kwamba asiingie ndani ya nyumba ile.

³²Wakati ule, mukutano ulikuwa umejaa fujo kwa sababu watu wamoja walikuwa wakilalamika na kusema hivi na wengine hivi, na wengi kati yao hawakujua hata ni kwa sababu gani walikusanyika.

³³Watu wamoja katika mukutano wakaeleza mambo yaliyotokea kwa Alesanduro, yeye aliyesukumwa na Wayuda kwenda kusema mbele ya watu. Basi Alesanduro akainua mukono kwa kuwanyamazisha watu, kwa maana alitaka kujitetea mbele yao.

³⁴Lakini walipotambua kwamba yeye ni Muyuda, wakalalamika wote pamoja kwa muda wa saa mbili, wakisema: “Artemi wa Waefeso atukuzwe!”

³⁵Kwa mwisho katibu mukubwa wa muji akawatuliza watu, akisema: “Ninyi wanainchi wenzangu wa Efeso, watu wote wanajua kwamba ni wakaaji wa Efeso ndio wanaoshugulika na kulinda hekalu la mungu Artemi na sanamu yake iliyoshuka toka mbinguni.

³⁶Basi kwa maana hakuna anayeweza kukana maneno haya, ni lazima mutulie, wala musifanye kitu chochote kwa haraka.

³⁷Kwa maana mumewaleta watu hawa hapa, ingawa hawakuiba vitu vya hekalu, wala kumutukana mungu wetu.

³⁸Basi ikiwa Demetrio na wafundi wenzake wanakuwa na mashitaki juu ya mutu fulani, tuko na tribinali na wakubwa wako pale. Wanaweza kupeleka mashitaki yao kule!

³⁹Na kama mukiwa na neno lingine, litakatwa katika mukutano ulioruhusiwa.

⁴⁰Kwa maana kufuatana na mambo yaliyotukia leo, tunaweza kushitakiwa kwamba tumeleta fujo. Tena hakuna neno tunaloweza kusema kwa kueleza sababu ya kufanya mukutano huu.”

⁴¹Kisha kusema maneno haya, akaaga mukutano.